Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item den laetsten dach van April en den eersten dach van Meye]

Item den laetsten dach van April, so quamen binnen der stede van Brugghe twee Capiteynen van Hulst die welcke quamen met saufconduyt vander stede van Brugghe. Ende binnen Brugghe sijnde ende ghesproken hebbende met den Roomschen coninc, ende met mijn here van Rauesteyn, ende met mijn here van Beuere, ende oock metter wet ende met den Dekenen van Brugghe. Ende den seluen Capiteynen was logijs bewesen inden vlieghenden hert, maer si deden ter contrarie als openbaer bleec. Ende ter cause van dien so waren si gheaenuaert ende gheleyt vp sinte Kathelijne poorte, ende den voys ghinc ouer al als datmense ghehouden soude hebben in onse stede ende niet laten gaen. Maer daer was anderen Raet vp ghehouden, ende

[fol. CC.xliiij.r]

het was geconsidereirt dattet niet wel ghedaen en hadde gheweist, een saufconduyt te gheuene ende dat te wederroupene, want wi van Brugghe en souden nyeuwers hebben moghen trecken, men soude ons vanghen ende van ghelijcken doen, aldus so bleef haerlieder saufconduyt van weerden Ende si vertrocken vp den eersten dach van Meye, ende si beloofden ooc tbeste daer inne te doene, dat het volck van wapenen gheen quaet doen en soude, twelcke al ter contrarie gheschiede, want si verbarnden dach ende nacht alle die huysen ende dorpen daer si quamen, ende sonderlinghe wel deene helft van Eeclo ende gheheel Heyle, ende meer andere dorpen ende passaedgien.

[Den.ij.sten en den derden dach van Meye]

¶ Achteruolghende vp den.ij.sten dach van Meye, so waren die.xvij.neeringhen ende alle dandere ambachten sprekende te gadere, ende veraccoordeirden so dat si weder ter marct quamen met hueren standaerden ende pingioenen met eendrachtigheden, ende seyden dat si ghemeenlic paeys wilden hebben ende een eynde vander orloghe diere was, ende noch gheschepen was meerder te sijne, aenghesien den grooten quets ende verdriet dat voor ooghen was. Ende voort vp den seluen.ij.sten dach van Meye, so quamen xvi.mannen te peerde ontrent den vossesteerte buyten Brugghe vp den wech van Male. Ende als doe veruoorderden hem huyt te loop ene Anthonis kaerle, Dekenen van den schilders, Ghelein dye wintere ende meer andere tot.xiiij.personen toe, die welcke worden terstont alle omreden vanden voorseyde peerdevolcke, ende wierden alle gheuanghen, huyte ghedaen den voornomden Anthonis Kaerle Deken vanden schilders, die welcke met eender lanchie duerreden was, so dat hi daer doot bleef ter stede. Ende doe was Dekene vanden schilders ghemaect Iacob van Galdere, die welcke daer naer vermoort bleef vp tcasteel van Cocxye. Ende al dese gheuanghene waren gherentsoeneirt.ij.^c.ponden groten, waer of dat een van hem lieden quam om trensoen vp den derden dach daer naer.

¶ Item vp den derden dach van Meye als costume es, soe was het weerde heleghe bloet seer simpelick omme ghedreghen metten kerckelicken persoonen binnen den westen, ende die wet, hooftmannen ende Dekenen volchden der processye, maer si en waren niet nyeuwe ghecleet, noch dambochten en hilden gheenen staet, noch men drouch gheene keerssen vanden ambochten, maer si droughen toortsen maer gheen trompetten, noch gheenderhande gheluyt, ende was thelege bloet also simpelick weder besteit.