[Item vp den.x.sten en xi.sten en den.xiij.sten dach van Meye]
Item vp den.x.sten dach van Meye, so quammer een alaerme, ende daer was vele volcx voor dye poorte ontrent den.xi.hueren snoens, ende quamen ghereden ende ooc met vele voetknechten tot byder poorte. Ende vele cloucke knechten vander gaedge vander stede, ende ooc eeneghe die vander gaedge niet en waren, veruoorderden hem huyt te loopene yeghens den vianden, ende wesende sonder ordonnancie, auentuerden hem seluen te varre huyt huerlider stercte, so datter wel x.personen vander stede doot bleuen, ende vanden vyanden wasser wel.xij.onder te peerde ende te voet doot gheschoten metten engienen vander stede. Ende dese schermutsinghe gheduerde lange, ende int wech trecken si roofden wel vier hondert beesten onder coeyen ende peerden, die si alle met hem lieden dreuen. Ende daer waren twee mooren int gheselschap vanden vianden die staken tvier in die coornemuelene voor die cruyspoorte, ende in die huysen daer ontrent staende. Ende men schoot huyter stede met een serpentijne, met welcker schote den eenen moor doot gheschoten was, ende meer andere van haren volcke, ende daer souder wel meer ghebleuen hebben ne hadden ghedaen dye groote boomen dye ontrent der stede stonden. Ende daer omme was vp den xi.sten dach van meye een trompet ghesleghen, so wie wilde boomen vellen of huyt deluen, men soude hem lieden arbeyts loon gheuen, te wetene tusschen sinte Kathelijnen ende sinter Cruys kercke. Ende vp den.xi.sten dach van Meye so ontboodtmen alle die heren ende die poorters die hem gheabsenteirt hadden te recht te stane. Ende binnen den seluen daghe quam een tijdinghe van Gendt van viere daghen bestant tusschen ons ende ons vyanden, ende dat den paeys ghenouch ghesloten was, ende corts besegelt soude worden, daer hem tvolc seere in verblijde. Ende den.xiij.sten dach van Meye so quamen van Ghendt ghereden dye staten vanden vier landen, te wetene Holland, Zeelandt, Brabandt, Henegauwe, ende Vlaendren, omme te accoordeirene metten Coninck, ende hem te doene beseghelen den seluen paeys. Ende es oock te wetene dat alle dye heeren vanden lande quamen te Brugghe binnen den seluen auende. Ende binnen den seluen auende so deidemen dye galghe ende tschauot of, ende men ghinck maken inden middele vander marckt een parck, daer inne datmen den paeys vertooghen ende openbaren soude. Ende achteruolghende vp den.xiij.sten dach van Meye, so maectemen inden middele vanden parcke een grote viercante staedgie, daermen met eenen steeghere van.viij.trappen vp ghinc, ende was bouen ront omme ghebaelget daer vp datmen tconsilie hilt vanden paeyse openbaer ten aensiene van elcken. Ende mijn here van Rauesteyn dede vp dien seluen dach sijnen eedt Tsinte Donaes in dye kercke, voor den hooghen outaer, als momboor van onsen gheduchten here den Hertoghe Phelips huyter name vanden lande van Vlaendren, ende ten profijte vanden Hertoge Phelips voorseyde. Ende belouede al daer te houden ende te helpen onderhoudene den paeys al daer ghemaeckt, met al sijnder macht ende mueghentheyt. Ende hi track binnen den seluen daghen naer der Sluys om aldaer het garnisoen te doen cesseirene van
Auteursrechtvrij