Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item eerst dat dye drye landen slandts van Vlaendren belooft hebben]

Item eerst dat dy drye landen slandts van Vlaendren belooft hebben ende sullen ghehouden sijn ons te stellene vp onse voeten ende in onse vryheyt ende liberteyt, omme terstont te vertreckene daert ons ghelieft. Dies sullen wi laten in versekerthede ende in ostaedgien binnen der stede van Brugghe den Margraue van Baden, ende den hertoge Christoffels in Beyeren. Ende binnen der stede van Ghendt mer Phelips van Cleuen heere van Wijnghendale.

¶ Item die welcke Marcgraue, hertoge, ende mer Phelips, ter bede ende begheere van ons sullen sweeren vp thout vanden helegen cruyce, ende vp die helege Euangelien, ende ooc vp haer lieder eere ende trauwe, dat si huyt dye voorseyde steden niet scheeden en sullen tot anderstont, dat alle die pointen ende articulen begrepen in desen yeghenwoordeghen paeys wel ende duechdelic vulcommen sullen wesen, ende noch in meerder versekerthede hebben begeert ende ghebeden den voorseyde mer phelips, dat waert dat wy eenichsins in ghebreke waren te vulcommene dye selue pointen, of dat yement wie hi ware in faueur van ons of andersins hem veruoorderde eenich belet daer inne te doene, dat in dien gheualle dye selue mer Phelips scheedene van ons, assisteren ende bystaen soude den voorseyde lande van Vlaendren met alle sijnder macht ende cracht yeghen ons ende alle den onsen, ontlastende den seluen mer Phelips van allen eeden ende beloften die hi ons ghedaen mach hebben. Ende van dyt aldus te doene ende te vulcommene, sal dye voorseyde mer Phelips eedt doen ende gheuen sijne brieuen den voorseyde lande van Vlaendren sulcke als daer toe dienen ende behooren sullen.

¶ Item ende bouen dien hebben gheconsenteirt ende gheordonneirt, consenteren ende ordonneren die ghedeputeirde vanden staten vanden landen van Brabant, Henegauwe, Hollant, Zeelant, Namen, ende vander stede van Valenchienes Rijssele, Duway, ende andere yeghenwoordelic vergadert binnen der stede van ghendt, dat si niet en scheeden huyter seluer stedene maer daer blijuen staetwijs, al of som tot den paeys van Vranckerijcke, die vnye ende alianchie tusschen den landen, ende alle andere pointen deser materie aengaende, ghesloten ende versekert sullen wesen.

¶ Item hebben belooft ende by desen belouen terstont de doen cesseren alle tvolc van wapenen van onser sijde, van allen den exploten van orloghen, ende tselue volck metsgaders onse garnisoenen te doen scheedene ende vertreckene huyt Vlaendren binnen viere daghen, naer dat wi in onse vryheyt ghestelt sullen sijn. Ende binnen vier daghen daer naer huyt allen anderen landen of eer, in dien dat moghelick si, ende sullen besorghen noch onder weghe, nyet en sullen roouen noch pilgieren, barnen noch rensoeneren, noch eeneghe andere quaden doen in die voorseyde landen, ende ooc dat si gheene gheuanghene met hem leeden en sullen huyt Vlaendren, ne maer sullen ghehouden sijn dye te stellene ten redelicken rent-

[fol. CC.l.r]

soene, sonder dye te mogen veruoerene. Ende waert dat si die contrarie daden, so sullense die schade verhalen vp tpencioen dat ons die van Brugge ende van Vlaendren gheconsenteirt hebben of consenteren sullen.

¶ Item die van Vlaendren sijn ghehouden in sghelijcx te doen cesseirene haerlieder volc van wapenen ende garnisoenen van allen exploten van orloghen, ende die selue te doen vertreckene huyt alle den landen, ende sullen bewachten dat van hem den seluen lande gheen quaet noch achterdeel en ghebuere.

¶ Item te dyen eynde dat wy te bet sullen doen vertrecken ende scheeden ons voorseyde volc van wapenen ende garnisoenen, so hebben die voorseyde staten van alle den landen ons gheconsenteirt te betalene binnen eender maent eerst commende, die somme van.xxv.duysent guldenen, te wetene elcken gulden.xl.groten. dat met condicien, dat waert dan tselue garnisoen ende volc niet en vertrocken noch en waren huyt alle den landen binnen den voorseyde tijde, dat in dien gheualle dye voorseyde.xxv.duysent guldenen bekeert sullen worden in betalinghe van anderen volcke van wapenen, omme bi crachte, in dien dat anders niet wesen en mach, tvoorseyde volc te verdrijuene ende te veriaghene, volgende der alianchie die daer of es tusschen die voorseyde landen.

¶ Item voorts consenteren ende sullen ghehouden sijn terstont te stellene alle dye sloten ende stercten ende plaetsen van fortresse vanden lande ende Graefschepe van Vlaendren inden handen vanden here vanden bloede, ten profijte van onsen seere ende lieue beminden sone omme daer inne ghestelt te sijne sulcke casteleyns ende officiers alst behooren sal, naer die preuilegien vanden lande', ende byden aduijse ende consente vanden voorseyde drie leden, achteruolghende der seluer alianchie.