Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den vierden en vij.sten dach van Ougst]

Item vp den vierden dach van Ougst, so quam te Brugghe naer die noene yeghen den auent inne mer Phelips van Rauesteyn met vele frissche heeren huyt Vranckerijcke, ende neffens hem reedt mijn here van Spiers, ende den capiteyn van den Schotten, ende noch vele meer ander groote capiteynen, die mer Phelips conuoyierden ghewapender hant met wel onderhalf hondert glauyen, ende waren seere costelic ende triumphelic toeghemaect, met vele ghebardeerde peerden, costelick verchiert met goude ende met seluere ende met costelicke plumaegien, hangende achter tot vp den rugghe vanden peerden, ende quamen met opene bannieren en trompetten, ende daer wasser wel hondert al met selueren iorneyen. Ende dye vander wet van Brugghe redender eyghens ende haeldense eerlicken inne, ende conuoyierdense elc in sijn logijts. Ende waren hier tot den.vij.sten dach van Ougst, doe trocken si weder met mer Phelips van Rauesteyn ten Damme, ende vanden Damme ter Sluys. Ende si keerden wedere den viij.sten dach, ende die Schotsche Capiteyn ende den capiteyn van Aryen trocken Typre waert den.ix.sten dach van Ougst, met wel hondert peerden, ende vele voetknechten.

[Den ix.sten dach van Ougst]

¶ Item vp den seluen.ix.sten dach van Ougst soe quamen die vander Nyeupoort ende van Dixmude wel met hondert peerden ontrent Oostende, ende te Lombaertchye daer sy wat volcx vinghen, ende namen die beesten, ende beroofden tgheheele dorp van Lombaertchye, ende vinghen alle tvolck dat si ghecrijghen consten, ende voerdense ter Nyeupoort ende te Dixmude.