Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item die van Oostende vernamen hoe die vander Nieupoort huyt sonden.ij.scepen]

Item die van Oostende vernamen hoe die vander Nieupoort huyt sonden.ij.scepen van orloghen, ende wel.xij.huen met vele goets ende schats dat si sonden naer Antwerpen totten.coninc. vanden Romeynen. Ende dye van Oostende voeren huyte met wel.C.boots, ende si vinghen alle dye scepen met alle den volcke ende goede datter inne was, in welcke scepen waren vele lieden van Brugge.

[fol. CC.lx.v]

[Den.xviij.sten dach van Laumaent en den.xx.sten dach]

¶ Item commende tot den.xviij.sten dach van Laumaent so approcierde ons volc ende die garnisoenen vergadert tot.iij^m.toe ontrent Dixmude, omme te besiene wat si daer aen doen mochten, vanden welcken sy beuonden groot watere, ende dat nyet moghelick en was dat si daer yet mochten aen doen, wantmer maer eenen voet diepe en dalf men vant watere, wanttet daer te voren wel.x.weken lanc niet en hadde ghedaen dan ghereint, by den welcken dat dye engienen van Brugghe niet duere en mochten, ende die van Ipre haddender al ghenouch. Aldus waren si den.xx.sten dach vander maent voorseyde weder omme thuys ghebrocht.

[Den.xxiiij.sten en vi.sten dach vander maent]

¶ Item den.xxiiij.sten dach vander maent so begonste ons volc weder naer huys te commene, want si daer noch nyet doen en mochten om tgroot watere als voorseyde es, maer maecten drie blockhuysen daer ghesellen van orloghen vp bleuen liggende met den Scouteetene van Brugge, omme te beweerene die loopinghe vanden schamele lantslieden, ende maecten een stercte vander kercke te Eesene ende bedoluen die, ende met.ij.blochuysen der neffens aen, vanden welcken dye vianden wat cesseirden van so vele quaets te doene. Aldus houden tot den.vi.sten dach van Sporcle, so quam mijn here die Schouteetene van Brugge thuys omme eeneghe sonderlinghe saken diere hem toe porden.