[Item aldus monseur de Cordes wesende te Doornicke]
[Den.xxiiij.sten dach van Sporcle en den.xxvij.sten vander seluer maent en den.xxviij.sten]
Item aldus monseur de Cordes wesende te Doornicke ,so ghebuerdet dat het garnisoen vander Nyeupoort ende den capiteyn van tlant van Ghijse, trocken te sint Omaers waert, ten versoucke van sommeghe van hem lieden, dat si commen souden ende in nemen die stede van sint Omaers ten behouue van onsen natuerlicken heere ende prinche. Twelc also ghebuerde den.vi.sten dach, ende sloughense doot alle die hem ter weerre stelden. Ende dit die Fransoysen verhorende, waren seer tonvreden. Ende monseur de Cordes trac haestelicke met dye.ij.gheuanghene byden coninck van Vranckerijcke, al daer hi den seluen nacht vant mer Phelips van Rauesteyn commende, die welcke seere wel ende blijdelick ontfanghen was vanden coninc, ende ooc van alle die heeren die byden coninc waren, ende was ooc vanden coninc seer grotelic beghift van penninghen van yuweelen, ende van schone artijlgerye, dat noeyt nyet vele sghelijcx ghesien en was, want hi hem schanc,xij.duysen croonen van goude, ende.x.duyst vrancken alle iare, ende.iiij schoone baghen, ende.xij.schoone sticken engiens, sesse serpentijnen, ende.vi.cortauwen, ende.xij.waghens met yseren clooten, viere waghens met buspoer, ende twee wagens salpetre, ende een koste vul selueren yuweelen ende hondert gulden iorneyen. Ende die coninck schanc het landt.xviijc.peerdevolcx drie maenden te voren betaelt. Ende mer Phelips van Rauesteyn quam met den volcke ende met den engienen in schoonder ordonnancie te Cortijcke den.xxiiij.sten dach van Sporcle, ende bleef daer om Raet te houdene tot den.xxvij.sten vander seluer maent. Ende track van daer ende quam den.xxviij.sten te Ghendt, daer hi raet hilt met den.iij.leden slandts van Vlaendren, ten oorbore ende profijte vanden hertoghe Phelips, ende dede bi subtijlheden bi hem ontbieden alle die Henewiers die hem dienden, ende huyt sijnder name te bewaerne hadden beede die casteelen vander Sluys. Ende die daer huyt sijnde, ontboot hi terstont datmen daer capiteynen van Brugge in stellen soude, twelcke also ghedaen was. Ende dit dede hy omme datmen die Casteelen te bet bewaren soude, want men die Henewiers niet wel en betraude want si altijts beter Conincx vanden Romeynen waren dan anders, ende meer ionsten met hem droughen dan metten lande.
Auteursrechtvrij