Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.x.sten dach van Ougst]

Item vp den.x.sten dach van Ougst, so quam die nyeumare te Brugghe als dat die vier coninghen veraccordeirt waren, ende hadden tsamen ghesloten eene warachteghen paeys. Te wetene eerst den coninc van Vranckerijcke, den coninc van den Romeynen, den coninc van Inghelant, ende den coninc van Spaengien, in welc accoort si ghesloten hadden eenen paeys te maken tusschen Vlaendren ende Brabant, ende Hollant, ende Zeelandt inder ghelijcke. Dies soude tseggherscip van Vlaendren blijuen ende staen inden coninck van Vranckerijcke, ter cause

[fol. CC.lxiij.r]

vanden iniurie ende cleenicheyt die si ghedaen souden moghen hebben den coninc vanden Romeynen vadere van onsen natuerlicken here ende prinche, ende dat si dat beteren souden ten segghene ende bi wille ende bi aduijse vanden Coninck van Vranckerijcke, vp twelcke waren gheordonneirt den.xx.sten dach vander seluer maent sekere ambassaden huyter name vander stede van Brugghe, die welcke trecken souden byden Coninc van Vranckerijcke, omme al daer tseggerschip tontfanghene, ende te vulcommene dat hem lieden daer belast ende beuolen souden wesen. Ende die naeruolghende waren die ambassaden. Eerst mijn heere vanden Gruythuyse, mijn here Ian van Nieuwenhoue, ons vpper Burchmeestere, ende twee Scepenen Ian de Keyt, ende Cornelis van halewijn, ende den abt van sinte Pieters te ghendt ende noch meer ander abten ende prelaten.

¶ Item achteruolghende so sijn onse Ambassadeurs ghecommen, ende gherocht ghesauueirt te Parijs, metsgaders dat si met machte van volcke vanden fransoysen gheconuoyeert waren, twelck wel noot was, want die vanden westquartiere waren seere huyte omme die selue ambassaduers te lettene of te vanghen hadden si gheconnen of ghedoruen, ende hem sterc ghenouch ghekent. Ende es de wetene datter ooc waren Ambassaduers van sconincx weghe vanden Romeynen, om daer present te sijne int voorseyde seggherschip.