Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Ende onse ghedeputeirde vanden Damme commende]

Ende onse ghedeputeirde vanden Damme commende, daden tver-

[fol. CC.lxviij.v]

tooch voor al tghemeene vander begheerte van mijn heere van Nassauwe, welcke pointen men som niet en consenteren en wilde. Maer was ghesloten ende ouer een ghedreghen bi rijpen Rade datmen soude antwoorden ende alligieren, als dat die van Brugghe niet ghebroken noch ghedaen en hadden yeghens den paeys van Tours die daer ghesloten was, ende waren vulueerdich daer of te antwoordene int parlement te Parijs. Ende ooc aengaende vanden paymente dat gheuallen was te sint Ians messe. Anno.xc.dat wilden sie gheerne ende minlick vp legghen, ende hem lieden dochte dat si daer inne niet mesdaen en hadden, ende die voorseyde ghecommitteirde trocken met der antwoorde naer den Damme. Ende mijn heere van Nassauwe beantwoorde verstaende, seyde yeghen dye voorseyde ghedeputeirde dat si vertrecken souden, hi soude doen dat in hem ware, ende was tonvreden ende qualick ghemoueirt.