Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item sachternoens ontrent den.iij.hueren]

Item sachternoens ontrent den.iij.hueren, so quam inden burch Cornelis Pieters Lambrecht taeye, ende een backere, ende een schoemakere Heyndrick van Bruwaens sone, ende riepen alle ghelijck huyt eenen voyse, alle die de stede van Brugghe liefhebben ende paeys begheeren, die commen by ons ter marct. Ende es te wetene dat alle dye meeste menichte, alsoo wel poorters als ambochtslieden, begheerden ende riepen om paeys, midts welcken si die bende tonder brochten sonder bloetsturttinghe, maer twas een werc van gode, dat dese.iiij.voorseyde personen dit so stoutelic begrepen ende bestonden, ende vele volcx quam terstont bi hem lieden. Ende dit ramoer ghedaen sijnde, Iacob clays die buersemakere, Adriaen floreins, ende ioncker Hans van Rans, ende die Baliu van Haerlebeke, dese waren die personen die wel meenden een quaet voorstel ghedaen te hebbene inden burch, metsgaders hare medepleghers, maer si en vonden gheen assistencie aen die ambochten. Ende dese quamen wel ghewapent ende voorsien, ende seyden men wil doot slaen die vrienden van mijn here phelips. Ende doe

[fol. CC.lxix.v]

wasser eenen roup ghegeuen alle die paeys begheeren, die willen der poorterye ende den ambochtslieden by staen. Ende doe was den voorseyde Iacob Claeys dye buersemakere ghesleghen onder die voeten, Ende was seere ghequetst, ende si vinghen oock Adriaen Floreins die soutcoopere, ende dandere namen die vlucht. Ende terstont begonsten alle die notable te vergaderen vp die marct onder des prinche banniere, ende die ambochtslieden onder die hare, maer het volck viel al meest der wet by, want elc riep om paeys.