Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item es te wetene, dat den paeys gheconcludeirt ende huyt gheroupen was vp sinte Nyclaes dach]

Item es te wetene, dat den paeys gheconcludeirt ende huyt gheroupen was vp sinte Nyclaes dach, den.vi.sten in Decembre, ten.iiij.hueren naer der noene. Ende es te wetene datmen die.xxx.duyst gheuen moeste binnen.viij.daghen als doe eerst commende. Ende daer waren huyt ghelesen.lvi.personen, die welcke alle ghesloten waren buyten den paeyse, ende hadden verbuert lijf ende goet soomen seyde. Vanden welcken.lvi.personen eeneghe maecten hem wech, ende quamen wel daer nae tharen paeyse met mijn here van Nassauwen, ende die sommeghe trocken ter sluys bi mijn here phelips van Rauesteyn. Ende die gheuanghen wierden waren alle onthooft, als ghy hier naer horen sult.

¶ Item es te wetene dat dye stede lange tijt gheregiert hadde gheweist van.ix.mannen, ghenomen huyt den.ix.leden, wantter vele wethouders huyter stede gheulucht waren. Ende die wet en hadde niet vermaect gheweist sichtent septembre. Anno.lxxxix. Dus warense wel.xiiij.maenden in die wet. Ende waren sommeghe vander wet die hem altemets met den.ix.mannen vouchden ende vertoochden, waer of Ioos van Wulfsberghe ons Burchmeestere een was dye altoos stede hielt. Maer vp wint Gillis dach hier voren int iaer.xc.en wasser gheen wet vermaect, ter cause vander orloghe voorseyde.

[Vp onser vrauwen dach den.viij.sten in Decembre en den.xxviij.sten dach van Nouembre en den.ix.sten dach van Decembre]

¶ Item vp onser vrauwen dach den.viij.sten in Decembre, so drouchmen te Brugge eene processie generale met den fiertre van.s.Donaes, om god te danckene vanden paeyse. Ende alsmen metter processie quam vp dye marct, so stont dat noch den standaert die daer ghebrocht was den.xxviij.sten dach van Nouembre, ende was als doe of ghelicht vanden Capiteyn Ian Heyndricx, ende ghebrocht metter processie inde kercke van sinte Donaes. Ende terstont daer naer so was die wet vermaect byden Commissaresen vanden hertoghe Phelips ende van mijn here van Nassauwen. Ende waren doe Burchmeesters van Brugge ghemaect Clays van Delft, ende Cornelis van Halewijn, ende die Scouteetene mer Cornelis metteneye, ende Baliu mijn here van Huytkercke. Ende naer den.ix.sten dach van Decembre, soe begonste alle vitaelgie te lichtene, ende daer quam vele goets huyten westlande, so dat een broot dat langhe ghegolden hadde.xij.mijten dat cochtmen om.vi.mijten, ende een libra bueters dat ghegolden hadde.xvi.groten dat cochtmen om.vi.groten. Een hoet tarwen dat ghegolden hadde.iiij.libra groten dat cochtmen terstont om.ij.libra groten, ende alle ander vitaelgie in aduenante. Ende van dier tijt voort

[fol. CC.lxx.v]

so began alle dinghen te lichtene, wantter vele goets quam van alle canten.