Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hoe alle de edele ende tghemeene lant van Vlaendren raet hilden, hoe men tlant van Vlaendren bewaren soude.

[fol. CC.lxxi.v]

[Vp den.xviij.sten dach van Lauwe]

ITem vp den.xviij.sten dach van Lauwe was tghemeene landt van Vlaendren vergadert ende ooc alle die edele, omme raet ende aduijs te nemene hoemen tlant van Vlaendren bewaren soude eyghens mer Phelips van Rauesteyn ende die vander Sluys, vp twelcke gheordonneirt was datmen legghen soude volck van wapenen Tardenburch ende ten Damme ende Theys, omme die vander Sluys te besluyten. Ende datmen te Bieruliet soude legghen schepen van orloghen om die vander sluys ooc te besluytene byder zee, vp dat si gheen vitaelgie en souden ghecrijghen.

[Den.ix.sten dach van Lauwe en den.xv.sten dach van Ougst]

¶ Item die Henewiers, te weten die gaerde die Toudenburch gheleghen hadde sichtent den.xv.sten dach van Ougst, die vertrocken van daer den.ix.sten dach van Lauwe ende ghinghen liggen Tardenburch ter assistencie van die van Brugge, wantter gheene cooplieden van gheenderhande steden en mochten te Brugge commen, huyt vreese van dye vander sluys die roofden ende pilgierden al dat si vonden. Ende sommeghe vanden capiteynen van den voorseyde Henewiers waren te Brugghe, ende men dede hem lieden betalinghe van dies men hem lieden tachter was.

[Den.ij.sten dach van Sporcle]

¶ Item vp den.ij.sten dach van Sporcle was te Brugghe vp dye marckt ghemaect een galghe, ende daer waren aen ghehanghen.vi.ghesellen die welcke alle dag die lieden roofden ende pilgierden ontrent der stede van Brugghe. Ende doe was gheboden dat eeneghe die ter Sluys waren van Brugghe dat si thuys commen souden binnen.vi.daghen, vp gherekent te sijne viant tslants ende der stede van Brugghe, ende vp die verbuerte van huerlieder goet.