Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.v.sten dach van Ougst waren gheleyt weder eenighe saudeniers in Oudenborch]

Item vp den.v.sten dach van Ougst waren gheleyt weder eenighe saudeniers in Oudenborch, die welcke behoorden onder mijn heere van Meerwe, want mijn heere hem houdende was binnen der stede van Brugghe ter bewaernesse vander seluer stede. Ende vp desen tijt began alle vitaelie wat te lichtene. Ende vp den.xxij.sten dach van Ougst so gaf mijn here van Lichteruelde ouer sijn casteel inden handen vanden ruyters van mijn here van Rauesteyn ende die van Ghendt, ende hy track selue in persoone naer Ghendt ende hilt hem daer, ende me vrauwe sijn gheselnede bleef daer in tcasteel met huere kinderen. Ende in dese selue maent so starf Cornelis van Halewijn Burchmeester vander Courpse vander stede van Brugghe.

[Den.ij.sten dach van Septembre. Anno.xci]

¶ Item den.ij.sten dach van Septembre. Anno.xci.so was die wet te Brugghe vermaect byden Commissaresen vanden Hertoghe Phelips, ende waren die Burchmeesters mer Iacob de voocht, ende meester Anthonis Spylgaert.