Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item tes te wetene als mijn here van Nassauwe huyten Damme schiet]

Item tes te wetene als mijn here van Nassauwe huyten Damme schiet so liet hi daer twee capiteynen, ende wel.C.ghesellen duytsche knechten, die welcke trocken in Tghendtsche met eeneghe quaetwilleghe bouuen van Ghendt, ende van daer ontrent gheboren roouen ende pilgieren, want alsoot doe ghinc int lant deen ghebuer beroofde den anderen, deen broeder den anderen, ende tkijnt den vadere, ende trocken ooc voor tcasteel te Lichteruelde ende haelden daer gro

[fol. CC.lxxij.v]

ten butijnck, ende tcasteel wort ghewonnen metsgaders dat mijn heere van Lichteruelde was te Ghendt. Ende twas gheseyt dat die van Lichteruelde souden stille sitten ende niet doen dan tcasteel verwaren, vanden welcken si contrarie daden ende hadden ghenomen waghens met coorne dye te Brugghe waert quamen, hoe wel dattet die vanden Damme eerst berocten. Maer midts dat die van Lichteruelde dat ghedaen hadden so tracmen voor Lichteruelde, die capiteyn van Brugghe ende die vanden Damme, want si schotent so ontsticken dat sijn niet gehouden en mochten, wantter vele engienen van Brugghe daer om ghebrocht waren. Ende was met hem lieden ghetracteirt als dat si hem niet meer en moeyden, maer bleuen stille sittende.