Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Item vp den seluen tijt verbarnden die van Ghendt tclooster vanden Satreusinnen]

Item vp den seluen tijt verbarnden die van Ghendt tclooster vanden Satreusinnen, ende namen daer coeyen, schapen ende peerden. Ende vp desen tijt so was verpacht dye kalioote vanden houte, dat mans vrauwen ende kinderen ten halfe in brochten ende moeste gheuen elcken bont dye wat groot was.iiij.mijten, ende eenen cleenen bont.ij.mijten, ende telcker poorte daer si in quamen waren lieden ghestelt die tghelt ontfinghen.

¶ In desen seluen tijt vercochtmen altoos broot ten braemberghe, ende oock thout vp die marct by cleenen pennewaerde, twelck groot gherief was voor tschamel volc.

¶ Item.xxviij.in Sporcle Anno.xci.naer dat dye stede aldus ghetrauelgiert was van gheuene, so moestense noch gheuen den Capiteyn ende den ruyters.iij^c. guldenen, sonder alle tverlies dat si van te voren ghehadt hadden, of si dreechden tvier in die stede te stekene, ende moesten borghen stellen teenen sekeren daghe dye voorseyde penninghen te betalene.