Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den eersten dach van Wedemaent. Anno.xcij.]

Item vp den eersten dach van Wedemaent. Anno.xcij.so quamen eeneghe vanden garnisoene van Damme te Brugghe, wel voorsien, ghewapent ende met ghespannen boghen. Ende quamen achter tschepen huys, ende vonden daer Roelant de Feuere capiteyn van Cortrijcke ende ontfangher generael van Vlaendren, die welcke meende te gane inde tresorye, ende si namen hem daer vp ende droughen tot vp den braemberch, daer si hem stelden vp een peert ende voerden hem ter cruyspoorte huyt ende trocker mede naer den Damme, ende daer en was nyement dier yeghen seyde. Ende dit daden si om betaelt te sijne van harer saudye.

¶ Item vp den vierden dach van Wedemaent so trocken die van Ghendt huyte met eenen groten heyrcrachte ontrent Deynse, ende metsgaders die prochien daer ontrent, ende sommege heren vanden voorseyde prochien, ende quamen daer die gaerde was ende versloughender grote menichte ende daer wasser vele gheuanghen, ende die gaerde was seer gheschoffiert.

¶ Item vp den.ix.sten dach van Wedemaent so hadde den ontfangher van sint Truwen gheweist om ghelt in Zeelant, ende hi quam int wederkeeren met sijn medegeselle in Brugghe, ende tsanderdaechs verwachte men hem thuys, maer hy en quam niet, ende men wiste wel dat hi veel ghelts ontfaen hadde, ende niement en wist waer hi beuaren was die tijt.