Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶opye vanden paeyse

Mijn here die hertoghe van Zassen als regent van Vlaendren, des Roomsch Conincx ende mijnen gheduchten here den hertoghe Phelips van Bourgoengien sijnen sone, sullen te vreden sijn die van Ghendt in gracien te nemene, ende in ghenaden te ontfanghene vp die condicien ende pointen hier naer volghende. Eerst dat dye voorseyde van Ghent onsen alder ghenadichsten here den coninc vanden Romeynen, ontfaen ende kennen sullen als vader voocht ende momboer van onsen edelen gheduchten heere den hertoghe Phelips, als huerlieder natuerlick here ende prinche. Ende in sijne ghenade ende qualiteyt eedt doen ende onbedieren also goede ende ghetrauwe ondersaten schuldich sijn van doene ende te obedierene haren prinche. Voort sullen betalen haerlieder porcie ende hantdeel van.v^c.ende.xx.duysent ponden paresysen daer inne dat si ghehouden sijn inden tractiet van Tours, ende dat inder manieren ende termijnen hier naer volghende. Te wetene.xxv^c.libra paresysen binnen vier weken naer tbesluyten vanden paeyse, ende daer of versekeren mijnen gheduchten heere oft ostagiers stellen oft by brieuen van te verbuerene haerlieder preuilegien. Ende dye reste binnen.ij.iaren ten viere paeymenten, dat eerst nu te midwintere eerstcomende, ende voort telcken haluen iare totter vulder betalinghe. Ende men sal hem lieden gheuen certificatie ende satisfactie van den coninc vanden paeyse van tours. Voort sullen consenteren ende betalen die gheuanghene van Ghendt dat si hem lieden schuldich sijn naer tractiet van franckeuoort. Ende als vanden delay vanden paeymente sy sullen mueghen spreken metten heeren voorseyde, die welcke si sullen redelic vinden. Ende om twelcke te bet te moghen doene die voorseyde heeren en sullen haerlieder schult nyet moghen volghen bi riguere van iusticien tot sinte Martens messe nv eerst commende, omme binnen den voorseyde tijt hopende by vriendelicken apointemente dese sake in state ghehouden te sijne, ende alle arreesten ter cause van dien ghedaen, sijn ontsleghen. Voort omme die heerlicke deliberacie van diligencie, ende messusen bi hem lieden ghedaen ende ghecommitteirt, gheduerende dese laetste gheschillen alle dye ghene die in wetten sijn metsgaders alle die Dekenen ende ghesworene vanden ambochten oft ommer sulc ghetal van hem lieden als mijn voorseyde heere den hertoghe van Zassen ghelieuen sal sullen commen vp mijn gheleede in een vanden smalle steden vanden quaertiere van Ghent met swarte cleederen onghegort Ende al daer vallen vp haerlieder knien voor den hertoghe Phelips of voor den hertoghe van Zassen huyt sijnder name als Stedehoudere generael, seggende bi een vanden Pensionarisen van Ghendt dat hem lieden seer hertelicken leedt es dat si hem yeghen den Roomschen coninc Maximiliaen ende sijnen sone erfachtich heere ghestelt hebben, ende dat si hem voort aen wachten sullen van ghelijcken te doene. Ende sullen bidden om dit bitter passie van onsen heere omme in gracien ende in ghenaden ontfanghen te sijne.