Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hoe die edele Prinche Hertoghe Phelips trauwede binnen der stede van Liere in Brabant, sijne weerdeghe bruyt Iohanna des Conincx dochter van Spaengien.

[fol. CC.lxxxiij.v]

ITem corts daer naer quam hertoge Phelips te Mechelen, die welcke bi sijnen vader geweest hadde den coninc vanden Romeynen in Almaengien met seer schoonen state ende trac vandaer te Liere in Brabant, ende daer trauwede hy sijne weerdeghe bruyt Iohanna des conincx dochter van Spaengien, ende was daer beslapen, maer men hielt noch gheene openbare feeste vander brulocht, ende dat omme dat hy corts moeste beweghen sijn sustere Margriete naer Spaengien. Ende die voornoemde Hertoghe Phelips met sijne gheselnede trocken nae Berghen met sijnder suster Margriete, om huer van daer te beweghene naer Zeelant, om van daer te treckene naer Spaengien.