Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hoe die alder doorluchtichtse Prinche ende Vorst Phelippus, die Eertshertoghe van Oostenrijc, inden iare xvc.ende een, een accoort ende paeys gemaect heeft met Lodewijc Coninc van Vranckerijcke]

Hoe die alder doorluchtichtse Prinche ende Vorst Phelippus, die Eertshertoghe van Oostenrijc, inden iare xvc.ende een, een accoort ende paeys gemaect heeft met Lodewijc Coninc van Vranckerijcke, ende die selue Eertshertoge met vrau Iohanne die Eertshertoghinne, midts der doot van dom Iehan, duer Vranckerijcke triumphantelijc ghereyst es na Spaengien Ende hoe blijdelic die selue te Parijs ontfaen sijn, ende wat magnificentie dat hem ghetoocht es al daer, ende voorts tot Orleans, ende te Bloys daer hi vanden.Coninc.van Vranckerijcke te Toleten vanden.Coninc. Ende coninginne van Spaengien, ende van ander vreemde dinghen ontrent dien tijde gheschiet.

¶ Dat.lxxi.Capittel.

[fol. CC.xcij.v]

ALso Marcus Tullius Cicero, prince vanden Roomschen Oratueren, louende die bescriuenesse vanden voorgaende gesten, scrijft dat die hystorie es een ghetuyge des tijts een licht der waerheyt, een leuen vander ghedenckenessen, een meestersse des leuens ende een voorbode vanden voorledenen iaren. So eest dat ic hier in ghedenckenisse ende ghetuyghenisse, omme te doen vol schijnen ende ter memorien te reducerene saken dye ouerstreken sijn, nae mijnder cleender begrijpenissen hebbe by ghescrifte ghestelt int corte tghene dat my condich ende kenlic es ghebuert te sijne, beginnende vanden iare.xv^c.ende een totten overlijdene vanden alder duerluchtichsten ende alder moghensten Philippus, Coninc van Castilien, Leons ende Granaten etc. Eertshertoghe van Oostenrijcke, hertoge van Bourgoengien etc. Graue van Vlaendren etc.

¶ Int iaer.xv^c.ende een, naer tgulden iaer dwelck men heet van Iubileen, heeft dye Eertshertoge Phelips met Lodewijc, dye xij.ste van dien name Coninck van Vranckerijcke een generael accoort ghemaect, ende hebben met malcander gheloeft vrientscap ende eendrachticheyt te onderhoudene Ende int selue iaer na dien die eerwerdeghe vader in gode heer Fransoys van Busleid Eertsbisschop van Bysanson, die in Ambassaden ghesonden es gheweest in Spaengien, sijn rappoort ghedaen heeft ghehadt, aengaende der doot van dom Iehan van Castilien, ende des dien aencleefde, ende me vrauwe Iohanne die naeste oor was van den landen van Spaengien. so eest ghebuert dat die voorseyde Eertshertoghe ende sijn ghesellinne, nae rijpen Rade, bij edelen ende staten vanden lande daer vp ghehadt, ouer draghen hebben, dat sy omme haer recht van successien te bewarene groot ghereeschape ghemaect hebben, omme te reysene na tconincrijcke van Castilien, ende heeft ghesonden sijn Ambassaden aen den coninc Lodewijck van Vranckerijcke voorseyde, omme te passerene met sijnen volcke duer tselue Conincrijck, die welcke coninc die altijt fauorabel gheweest hadde den tijde van coninck dachste van dyen name, doen hi noch was

[fol. CC.xciij.r]

hertoghe van Orleans den huyse van Bourgoengien, gheerne consenteerde met blijder herten, ende heeft den voorseyde Eertshertoge ghethoont alle eere diemen doen mochte, ghelijc hier naer breeder bescreuen sal worden. Ende alsoo die voorseyde Eertshertoghe met vrauwe Iohanne sijnder princersse, hem princhelijcken ende chierlicken toe ghemaect hebben ghehadt, ende meestendeel die edele heeren vanden lande hem rijckelic vp gherust hebben, om te reysen metten voorseyde Eertshertoghe, so dat sijn gheselschap wel ghedraghen heeft twee duysent peerden sonde die muylen, waghenen, rosbaren bagagien, dienaers, is hi triumphantelic ghereyst duer Piccaerdien, daer hi in allen steden heerlicken ontfanghen is gheweest, als sinte Quintens ende elders. Ende ghecommen tot Parijs, ende heeft sijn incomst ghedaen vp sinte Katherinen dach, ende es al daer met grooter solempniteyt ontfanghen, ende sijn sijnder maiesteyt te ghemoete ghereden. Die graue van Niuers ende die graue van Lingui, met grooten ghetale van schiltbuerteghe mannen ende notabele personagien, so clercken ende so leeke, hebben sijnder maiesteyt ghemoet tusschen Parijs ende sinte Denijs bi een cappelleken, ende daer met blijschapen ghegruet ende willecome gheheeten, bloots hoofts ende met een schone arenghe ghesaluteert, ende daer na heeft die voorseyde Eertshertoghe ghereden tusschen beyden naer der stadt van Parijs. Ende commende inder stadt, reedt die Preuoost van parijs metten graue van Lingui vp die rechte sijde, ende dye graue van Niueers metten grooten meester van Vranckerijcke vp die slincke sijde, ende daer naer volchden grote Vorsten, Baroenen, Grauen, rudders ende andere ghebuerteghe persoonen met grooten gheschalle van trompetten ende claroenen. terstont daer naer es gheuolcht dye Eertshertoghinne vrou Iohanne, ghecleet wesende met een seer costelic gouden abijt vol ghesteenten ende peerlen, sittende vp een witte Hackeneye, ghecompaingneert met xxv.ioncfrauwen rijckelicke verchiert met gouden ende sijden lakene, sittende elck vp een witte hackeneye, seer costelic toegemaect, sonder dandere edele ioncfrauwen ende camerieren die rijckelic toeghemaect sijnde, saten vp vergulde waghens ende rosbaren, dier vele waren.

¶ Item die voorseyde Eertshertoghe ende Eertshertoghinne quamen inne duer sinte Denijs poorte, ende stont voor die poorte een stellinghe oft personagie al becleet met sijden lakene. Daer bouen int vpperste stont den schilt van Vranckerijcke, ende int midden stont een vlieghende peert constelijck ghemaect, ende daer sadt vp een man diens name was Paris, ende twee goddinnen hielden tpeert, deen aen die rechte hant staende was ghenaemt Iusticia, ende dandere aen die slincke hant Minerua goddinne der wijsheyt, ende ontrent tselue peert stont een Riuiere, in die welcke tvoorseyde peert treede met sijnen eenen voete, welcke riuiere was spruytende wt een fonteyne, ende daer stont bouen in een rolle ghescreuen in latine)

Fluminis impetus letivicat ciuitaten dei.

Ende tvoorseyde peert was ghenaemt Pegasus, ende beteekende, dat ghelijckerwijs Pegasus es vlieghende, so vliecht die iusticie ende wijsheyt, (daer bi die stadt van Parijs gheregeert word ouer alle die weerelt.