Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Reysende van Orleans, so sijn die Eertshertoge ende Eertshertoghinne ghecommen te Bloys]

[Reysende van Orleans,] so sijn die Eertshertoge ende Eertshertoghinne ghecommen te Bloys, daer die coninck hem met hueren state was verbeydende, ende sijn al daer byden coninck ende Coninghinne met alsulcker magnificencien ontfanghen dat onsprekelic es, want dye coninc ende coninghinne anders hem niet ontfanghen en hebben dan oft hem eyghenen sone ende dochter gheweest hadden. Het ware langhe te verhalen die grote chiere, die bancquetten ende spelen dye daer ghebuerden tot der voorseyde princhen eeren, die thien daghen dat si daer stille laghen. Binnen welc-

[fol. CC.xciiij.r]

ken tijde si tsamen ghesloten hadden eenen eeweghen paeys. Ende naerder voorseyde thien daghen es die coninck mede ghereyst tot Tours, ende heeft betaelt al tghene des dye voorseyde prinche ende princersse met hueren edelen ende gheselschape vertheert hebben ghehadt, so te Bloys ende ooc te Tours, ende hem gheheelic ghedefroyeert, ende alsoo voorts ghereyst door trijck van Nauarre, daer hy ooc triumphelic ontfaen es, na dat conincrijcke van Spaengien, daer si in alle steden met grooter blijschap ontfanghen es gheweest. Commende daer na ontrent der stadt van Toleten, so hebben hem met vieregher begheerten ontfaen die coninc Ferdinandus ende Elyzabeth sijn alder edelste coninghinne, seer verblijt wesende vander blijder comste van haren sone ende dochtere, hem vertooghende alle blijscap die hem mogelic was te doen

¶ Item daer naer es met groten solempniteyte ende ceremonien, die voorseyde Eertshertoghe in onser lieuer vrauwen kercke van Toleten, ten by sijne vanden princhen edelen, ende den staten vanden lande, ende oock by eendrachteghen consente vanden lande, ghehouden warachtich successuer vanden Conincrijcke van Castilien, ende daer naer int eynde van October in dye stadt van Cesar augusta, diemen heet Saragossa inden coninckrijcke van Arragon ghecroont.