[Item in desen seluen tijde]
Item in desen seluen tijde, dede die Coninck vergaderen die staten van Vlaendren, omme te verstane totter consenteringhen van te vercoopene seker demeynen ende heerlicke goeden vanden graefschepe van Vlaendren, maer si en wouden daer toe niet verstaen, midts goede redenen die si wijselick wisten te alligeren. Ende es die coninc omme voorts sijn affairren te doene, ende sijn saken van sijnder reyse die hi naer Spaengien doen woude te volbrenghene, ghereyst naer Atrecht, ende van Atrecht te Hesdijn, ende van Hesdijn te Betunen, ende soe voorts te Rijssele, ende van Rijssele tot Ghent, daer hy grote communicatie hadde van sijn aenstaende reyse na tconincrijc van Spaengien, van Castilien etc. Ende heeft al daer met sinen edelen state grote ghereetschape ghemaeckt, omme te doene ouer die zee zijn nauigacie naer Spaengien.
¶ Item alle ghereetscap ghemaect sijnde omme anderwerf te reysen na Spaengien, so heeft hi gheordonneert, vp dat dese landen wel gheregeert souden werden heer Willem van Croy, here van Chieures ende van Arschot als Stadthoudere generael ouer alle dese landen, die de selue in peyse ende vrede gehouden heeft, want het was een seer wijs ende voorsienich here, weert wesende menegen tijde te leuene, hoe wel sijnen goeden name ende renommee nemmermeer steruen en sal.
Auteursrechtvrij