Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hoe die fransoysen metten Gheldersche weder na Brabant ghecommen sijn]

Hoe die fransoysen metten Gheldersche weder na Brabant ghecommen sijn, ende vander orloghe van Ghelre, van den paeyse van Camerijc, vander comste van Maximilianus die keyser van Ghendt, ende voorts vanden orloghen vanden.Coninc.van Inghelant yegens die fransoysen. Ende den paeys midts thuwelic tusschen den coninc van Vranckerijcke ende des conincx van Inghelants sustere, ende die doot des conincx van Vranckerijcke, ende ander saken weerdich om lesen.

¶ Dat.lxxiiij.Capittel.

[fol. CC.xcviij.v]

INt iaer.xv^c.ende.vij.sijn die fransoysen metten Ghelderschen weder met crachte ghecommen in Brabant, ende hebben grote schade ghedaen voor diest, maer si werden wederstaen, so dat si van daer ghetoghen sijn naer Thienen, ende hebben dye stadt midts datse gheen volck van wapenen inne en hadden, foortselic ghenomen ende ghepilieert. Maer corts daer naer werden die fransoysen ghesleghen bi nachte int dorp van Sinte Hubrecht bi sekere Namuroysen, daer capiteyn of was mijn here dispontijn

¶ Item daer naer so hebben vergadert in Vlaendren mijn heere van Berghen, mijn heere van Fiennes metten Gouuernuere van Bresse, ende heere Ian Sauuaige President van Vlaendren, ende sijn in ambassaden ghetoghen naer Inghelant, omme thuwelic tusschen den ionghen Eertshertoghe, ende dochtere van Inghelant, ende es tselue gheschiet met grote ceremonien ende grote triumphe, hoe wel dat niet vol comen en es.