Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hoe dye Coninc van Inghelant met alle sijn edelen ende vrome capiteynen, ende met veel schepen vol volcx ende artellerien ouer zee ghecommen es na Vlaendren]

Hoe dye Coninc van Inghelant met alle sijn edelen ende vrome capiteynen, ende met veel schepen vol volcx ende artellerien ouer zee ghecommen es na Vlaendren, verbeydende seker capiteynen vanden nederlanden, die hem te dienste quamen, ende es na Teruwane getrocken, ende heeft die stede swaerlick beleghen, ende dye victaelliers ter neder gheworpen, ende die stadt ghewonnen.

[fol. CC.xcix.v]

ITem int iaer.xv^c.ende derthiene es die coninck van Inghelandt Henricus, met sijnen edelen ende ander vrome capiteynen ende groote menichte van schutters, ende anderen volcke wt Yrlandt, al ghecleet groen ende wit, met vele schone schepen vol volcx, vol artelleryen, bussen ende wapenen, ouer dye zee ghecommen na Calys, ende so voorts nae Vranckerijcke, ende heeft sijnen wech ghenomen na den palen van Vlaendren, verbeydende sekere capiteynen vanden nederlanden die hem te dienste quamen, seer wel toe gherust ende opgheseten. Ende es die coninck ghereyst met sijnder heyrcrachte naer die stadt van Teruwane, die bi Talboten ende den Inghelschen metten Vlaminghen, ende anderen ruyteren, als Henegouwiers, Namuroysen, Brabanders, hoochduytschen swaerlic beleghen was Ende gheduerende desen belegghen, heeft die heere van Piennes als capiteyn vanden fransoysen, dye stadt van Teruwane willen spijsen, want die heere van Pont darremy ende die heere van Canaple, beyde capiteynen van binnen Teruwane, ghescreuen hadden dat si in grooten noode waren van victaellien. Maer dye Henegouwiers wesende in ghetale van twee duysent peerden, ende Maximilianus die keyser metten Coninck van Inghelant sijn gheslaghen vp die fransoysen die dye voorseyde stadt van Teruwane hebben willen sercoursen, ende hebbense daer neder gheworpen, maer die sommeghe sijn gheuloden in bosschen ende velden, onder dander edelen warender gheuanghen die Hertoghe van Longeville ende die heere van Bussy. Ende corts naer desen swaren recontre, heeft die heere van Pont darremij, wt beuele van den coninc van Vranckerijcke, vpghegheuen in handen vanden Keyser ende den coninc van Inghelant die voorseyde stede van Teruwane. Ende na dien die voorseyde fransoysen daer wt ghescheyden sijn, so es die coninc van Inghelant victorieuselic daer inne ghecommen ende werdt die voorseyde stadt eensdeels daer na af ghebrant, ende tvolc al veriaecht.