Van wonder dat in] die lucht ghesien wert, ende van eenen groten slach bi Mylanen, tusschen den Coninck van Vranckerijcke ende die Zwitsers.
[IN Septembre vp heylich cruys dach en Anno.xvc.ende.xvi.vp sinte Steuens nacht]
IN Septembre vp heylich cruys dach doen wert gesien des auents eenen clomp viers vliegen recht bouen die huysen, also groot als een biertonne, ende achter haddet stralen, ende lichte seere, ende tot sommege plaetsen viel van desen viere. Dit ghebuerde alle dese landen duere opten seluen tijt. Ende sommege die vp die heyen waren die hoorden een bijstier ghetier in die lucht, ende saghen in dye lucht mannen van wapenen dye duer die lucht reden. In desen seluen tijt so gheuiel eenen groten vreeselicken slach bi Mylanen, tusschen den Coninck van Vrancrijck, dye dat iaer eerst coninck gheworden was, dye selue daer in persoone was inden strijt teghen die Zwitsers, die welcke waren ende dienden den hertoghe van Mylanen. Desen slach duerde bi de.xxiiij.hueren sonder cesseren, so datter menich duysent mannen versleghen worden. Ende die coninc van Vranckerijc behielt dat velt, ende creech corts daer naer die stadt van Mylanen.
¶ Item in desen tijt so wert het huwelijck ghetracteirt tusschen hertoghe Karel, ende des conincx sustere van Vranckerijck.
¶ Item vp desen tijt so was die borsse Tantwerpen ghemeerdert.
¶ Anno.xvc.ende.xvi.vp sinte Steuens nacht doen blixemdet ende donderdet seere, ende doen stonter eenen grooten storm vp, so datter so groten vloet vp ghinc alst ghedaen hadde sint den iare.xiiijc.lxxij.soe dattet in vele plaetsen grote schade dede, sommeghe torren vielen vanden winde, ende den blixem deder ooc groote schade.
¶ Inden Mey wert gheordonneirt datmen tgulden vlies Tantwerpen houden soude, ende die schilden waren ghehanghen, maer ter causen dattet den prinche ouerdraghen was hoe datter daer seer starf vander peste, so waren die schilden van daer ghedaen ende te Bruessel gheuoert, ende men hilt daer die schone feeste vanden gulden vliese als hier naer volcht.
Auteursrechtvrij