Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Van den Coninck Dennemercke, ende van sijnder Coninghinne Ysabele, hoe si tsamen tschepe ghinghen.

¶ Dat.vi.Capittel.

[fol. xv.r]

INt iaer van.xv^c.xxij.quam Coninc Christiernus gereyst wt sijn rijck van Dennemercken ende Zweden, met drie oft vier mannen onbegrepen door sijnder vianden landen onbekent, ende quam int ouerstichte van Vtrecht in dye stadt van Campen. Ende hy ghinck van daer te schepe, ende arriueerde ouer dye zuyder Zee tot Amsterdamme, daer hi sijn coninclijcke maiesteyt, ende hem persoonlijck eerst mael liet kennen, daer hi doen van die heeren vander Stadt eerlijcken ontfanghen was, ende quam daer nae so voort door Hollant ende ander plaetsen tot Antwerpen, daer hi ooc seer weerdichlijc van die Heeren vander Stadt ontfanghen was, ende reysde so voort tot Mechelen, daer hem dye heeren vander Stadt oock weerdichlijc ontfinghen. Ende als die Coninc hier een tijt lanck gheweest hadde, so track hy weder nae Cuelen, daer hem dye Bisschop ooc seer weerdichlijck ontfinck, ende nae sommighe daghen dede hem die Bisschop gheleyden tot int landt van Hessen, Ende die Lantgraue gheleyde hem tot int landt van Bremen, Ende die Bisschop gheleyde hem tot int landt vanden Marckgraue van Brandenborch, die sijn suster hadde getraut.ende die Marcgraue brachte hem so bedectelijk wten lande, dat hi quam in Dennemarcke tot Coppenhaue. Ende die Coninck beschicte doe sommighe dinghen ende goeden, ende sommige bussen ende engienen in sijn groote schepen, sterc sijnde als een casteel vpt water. Ende die coninc Christiernus is doe te schepe gegaen, met sijn Coninghinne Ysabele, ende met sijn kinderen, ende hi passeerde so die Zee met goeden winde, sonder eenich auontuere weerdich om scriuen, arriuerende met sijn Crakoen, ende met twee schoon creueel schepen, ende met twee iaech schepen in Walcheren in Zeelant in die stadt vander Vere, ende is so voort ghecomen wt Zeelandt met sijn Coninghinne tot Mechelen, daer si met haren kinderen eerlijcken ontfanghen wert. Ende so bleefse hier in haer broeders landt, daer si nae luttel iaren sieck wert ende starf, ende wert begrauen in die stadt, daer die Keyserlijcke maiesteyt gheboren was tot Ghendt Ende haer kinder als die Prince van Dennemercke, ende haer dochteren werden met eerlijcken state onderhouden, int hof van Bourgoengien tot Mechelen.

¶ Item int iaer.xv^c.ende.xxiiij.so wast cooren ende alle nootlijcke dinghen, redelijcken coop maer dit iaer hadde eenen quaden oegst, ende veel coorens verslaghen vanden haghel.

¶ Item int eerste van desen Iare, ende noch dickwijlen int iaer waren vele consilia ghehouden in sonderlinghe steden, om ghelt te hebben.om daer mede te oorloghen, alte met op die acsise van die gheestelijcheyt, altemet met acsise vp tlant, op schapen, coeyen peerden.etc.maer niet wel en costen die heren al naer haren wille ghecrijghen, mer die landen presenteerden selue volc wt te maken, ende die selue te betalen, so datter niet vele dit iaer en ghebuerde vander oorloghe.

Maer die Paeus Adrianus die seste, screef vriendelijcke brieuen om paeys te maken, dewelc niet wel voortgaen en wilde, want die coninc van Vrancrijck wilde Mylanen weder hebben, ende dye Keyser en wilde dat niet ouer gheuen.

¶ Item in dit selue iaer gaf hem dat Casteel van Mylanen vp, in des Keysers handen in die Paesch heylich daghen, waer duere dat die oorloghe stercker wert, dan si te voren oeyt gheweest hadde.

¶ Item in die selue iaer van die maent van Iulius, doen wast te Roomen so grooten tempeeste van winde, van dondere, van blixem, so datter grote huysen omme waeyden, ende houen, ende casteelen verbernden, ende seer grooten tempeeste wasser oock inden Tyber te Roomen.

¶ Item in die maent van Augusto den.xxiiij.dach, doe vierdemen al omme, ouermidts het beueel vanden heylighen vader den Paeus Adrianus, ende dat ter causen dat paeys ghemaect was tusschen allen kersten coninghen, wtghesteken Vranckerijcke ende Schotlant.