Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[So vergaderden vp een tijt die knechten bi een met sommege burgheren]

So vergaderden vp een tijt die knechten bi een met sommege burgheren, ende namen met hem veel schuyten, ende quamen so in Hollandt ontrent den Haghe, ende die helft vanden knechten bewaerden die schuyten, en de die ander helft track inden Haghe, commende daer in met Bourgoensche cruycen, so dat die van den Haghe gheen quaet en dachten, maer meenden dat si quamen om dye plaetse te bewaren ende te besetten. Maer als si quamen in middel vanden Haghe, doe sloughen si die trommelen ende riepen Ghelre Ghelre. Dit hoorende die van binnen waren seere veruaert, ende elck sach om een goet wech commen, want sy en wisten van gheenen vianden. Die knechten ghinghen doe spolieren ende roouen, ende ghecreghen daer groot goet, dat sy al in dye schuyten brachten, ende si vinghen alle die si vonden Daer naer rantsoenden si die plaetse met brandschat voor veel duysent guldenen, ende keerden doe metten roof weder binnen Wtrecht. Oock hadde dye Hertoghe van Ghelre in ghenomen dye stadt van Renen daer hy een stercte in dede maken, dat ooc des Bisschops was, ende een slot daer bi gheheeten ter Horst, ende hy besette al dese plaetsen met sijnen knechten meenende die te houden voor sijn eyghen. Ende die selue hertoghe van Ghelre dede groote schade den steden van ouer den Ysele met sijn stercheden ende blochuysen, die hi slouch

[fol. xxxix.v]

int ouersticht ontrent dye steden van Deuenter, Zwol ende Campen, die hy seere molesteerde met schieten, met roouen ende branden, so dat die steden voorseyt met des Bisschops wille hebben hulpe ghesocht aen die Keyserlicke maiesteyt, vp condicien dat die Bisscop heeft ouere ghegheuen dat gheheel sticht den keyserlijcker maiesteyt. Ende die Key.M.heeft den Bisschop daer huyt ghegheuen een pensioen sijn leuen lanck. So es int sticht ghecommen die stadhouder van Vrieslant Iorijs schenck van Routenborch met ruyters ende knechten, ende heeft beleghert die stadt van Hasselt, ende daer es ooc ghecommen die graue van Emden, ende hebben die stadt so banaut met schietene ende stormen datter nauwelijck een heel huys binnen der stadt was. Als die van binnen eenen tijt wederstaen hadden ende groote weere ghedaen, siende dat hem lieden vanden hertoghe gheen hulp noch ontsedt en quam, so gauen sijt vp, behouden lijf ende goet. Ende die hertoghe had hem ontset gheloeft,, des quam hy voor Hasselt ende liet hem sien, maer als hi hoorde dat die stadt vp ghegheuen was, so track hi weder nae huys. Ende hier nae sijn die graue van Bueren ende heer Iorijs schinck als vpperste veltheeren voor hattem gheuallen, ende hebben nae veel schieten ende stormen die stadt ende dat stercke slot in ghenomen, dat hem vp ghegheuen wert behouden lijf ende goet, ende dye Bourgoenschen manden al dye plaetsen die si in namen. Als dit die knechten van Altenae hoorden datter stercke slot van Hattem in ghenomen was, so vloden die knechten daer huyt ende verbranden dat huys, ende dye van Deuenter hebbent voort gheheel af ghebroken. Als die van Harderwijck dit hoorden quamen si int heyr van onsen volck ende gauen hem in handen, vp datmen die stadt niet beschieten en soude. Binnen desen middele heeft die hertoghe van Ghelre knechten daer binnen ghesonden. Dit horende die vpper capiteynen dat daer knechten in die stadt van Harderwijc waren ende dat si haer tractaet af gegaen waren, sijn si terstont voor die stadt gheuallen, ende die van binnen dit siende dat si beleghet waren ende beschoten, so gauen sy dye stadt vp behouden lijf ende goet, ende die ruyters moesten daer laten al haer peerden. Oock wert in ghenomen die stadt van Renen daer die Gheldersche waren huyt gheuloden, ende der stadt en es nyet mesdaen, ende so wonnen si veel plecken, stercheden, sloten, ende steden tot.xxi.toe, als dat stercke slot Coeborch, die knechten daer vp sijnde ende waren al verslaghen bleuen, dat huys te Hulckensteyn, dat blochuys vpt swarte water bi Hasselt, dat slot van Ameronghen tusschen der stede van Wtrecht ende den Rijn, dat slot ten Ham bi Wtrecht dat slot te Doerem, toebehorende den dom proost, dat slot te Bethuwe, dat slodt van Welpe toebehorende Ian van Renesse.

¶ Dye steden van Hasselt, van Reenen, van Hattem, der Elborch, Harderwijck, dat iach huys mijns heeren van Ghelre, dye moghensterre oft kijk inden pot voor die stede van Deuenter, Leuendael dat huys ghewonnen ende verbrant, dat huys ter Eem bi Amersfort.

¶ Pyronen was oock ghewonnen, ghebrant, ende gheheel af gebroken, waer af Marten van Rossem here was. Daer na lach onse armeye in die Veluwe sommeghe daghen, ende vielen daer na voor Tielt, daer die hertoge sandt.vij.hondert knechten welcke stadt seere bestormt wert ende oock beloopen, maer die van binnen weerden hem vromelijck, so dat ons volck daer gheen profijt en dede, ende si trocken ten lesten af door den grooten reghen ende onwerder, wand die groote engienen soncken al in die eerde.

¶ Inden seluen tijden waren twee vaenkens knechten van des Bisschoppen volc huytghetrocken int lant van Ghelre in die Bethuwe om eenen roof te halen, ende daer quamen hem lieden die Gheldersche knechten onuersiens ouervallen, dat si teghen malcanderen schermutsten, ende die ghelderschen vloden te rugghe, ende die ander veruolchdense tot dat si aen den groten hoop quamen dye daer verborghen lach, ende so worden si verwonnen, ende gauen hem gheuanghen ende leyden af alle haer gheweere. Doen seyde haer hooftman, lieue knechten ghedenct van Coeborghe, daer hadden

[fol. xl.r]

sy alle die knechten der Ghelderschen die daer vp waren verworcht ende doorsteken. Doe dit haer hooftman vermaent hadde doe vielen die Ghelderschen metten gheheelen hoop vp die gheuanghen knechten ende sloughen die al doot.

¶ Int iaer ons heeren.M.CCCCC.ende xxviij.quamen huyt Spaengien sommeghe hooftlieden in Septembri, ende brachten met hem twee duysent Spaengiaerts, dye langhen tijt vp die zee versteken hadden gheweest ontrent.vi.maenden lanc door contrarie wint ende groten storm, ende si waren ghesonden om hulp ende bystant te doen den ghenen die daer orloochden vp tlandt van Ghelre.