Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Vanden paeyse ghetracteer te Camerijck]

Vanden paeyse ghetracteert te Camerijck, tusschen den Keyser ende den coninc van Vranckerijck, ghemaect byden Princerssen ende vrouwen, te weten bi mijn vrouwe Margriete, ende mijn vrouwe die regente, Lowise van Valoys hertoghinne van Engolemme.etc.

¶ Dat.xiiij.Capittel.

[fol. xliij.v]

INt iaer.xv^c.ende.xxix.vpten tweeden dach in Iulio quam in Camerijc, om den paeys te helpen maken die eerweerdige Legaet vanden paus die Cardinael van Saluia, ende wert eerlicken inghehaelt byden bisscop van der stadt metter gheestelicheyt. Ende vpten vijfsten dach van Iulio quam in Camerijc met groten state me vrouwe Margriete regente dese landen, mijn here die Cardinael van Luydic, mijn here van Yselsteyn, met meer ander grote meesters van onser sijden die haer teghen reden commende huyter stadt, ende quamen ooc inne met haer commende in oordenen. Eerst die artchiers ende dienaers van den heren, daer nae een grote menichte van edelmannen, daer nae die bisschop van Palerme metten bisschop van Camerijc, ende mijn here van Pottelles sijnen broeder. Doe die graue van Bueren, die cardinael van Luydic, die graue van Hoochstraten. Daer nae me vrouw alleen sittende in eenen rijckelijcken osbaer, ende om haer commende.xxiiij.Artchiers met swarten paltrocken met fluweel gheboort, ende so wel die edel mannen als dye Artchiers saten vp dye schoonste peerden ende courcieren die men vinden mochte. Ende na me vrouwe quamen haer camerieren gheseten vp schone hackeneyen ende ander courtauwen. Ende me vrou Margriete es ter herberghen ghereden in die Abdye van sinte Aubert ende een yegelic vertrack na sijn herberghe

[Den.viij.sten dach in Iulio totten.xxiiij.sten dach Iulij en vpten.xxix sten dach der seluer maent den iiij.dach Augusti]

¶ Opten seluen dach quam in dye regente Lowise van Valoys etc. Ende die bisscop met veel edelen der stadt van Camerijc quamen haer teghen buyten der stadt, ende eer si binnen quam quamen voor haer wel twee hueren lanc duerende muylen gheladen met bagagien ende waghenen, ende karren gheladen met coffers ende bedden, ende der muylen waren ontrent acht hondert, ende soe muylen ende peerden van harnasch waren ontrent drye duysent oft meer, dye welcke als si ontladen waren ghinghen si buyten haer logijsten maken. Daer na quamen die paeygien in ordonnancie wel gheaccoutreert, elc een plume

[fol. xliiij.r]

vp haer bonetten, ende dier wasser wel.iiij^c. Daer nae quamen die edelen van Vranckerijc meestdeel met fluweelen paltrocken ende met hoeykens vpt hooft met plumagien, daer onder waren veel grote heren ende Princhen ende grote meesters van Vranckerijc, als die hertoghe van Valgouuerneur van Britanien, mijn heere de la Tour gouuerneur van Lymogien, mijn here van Humieres, mijn here van Canapels, graue van Nantes, ende meer ander dye wel onderhalfhuer waren eer si passeerden. Daer nae quam die Cancellier ende Cardinael van Vranckerijc verselschapt met veel Eertsbisschoppen, bisscoppen, prelaten ende andere edel mannen. Daer naer quam me vrouwe die regente in eenen osbaer, ende by haer sadt haer dochter die coninghinne van Nauarre. Ende om den osbaer ghingen.xxiiij.hellebardiers zwitsers. Daer na quam noch een osbaer van die.ij.vrouwen van Vendomme, die oude ende die ionge, mijn vrouwe de Latrimoille, daer na een groot ghetal van vrouwen ende camerieren sittende al vp schone hackeneyen Ende als dese twee vrouwen malcanderen willecome hadden gheheeten, so vertrac een yegelick na sijn logijs. Ende daer na was gheordonneert in dye stadt van beyde sijden, noch paeygien noch der heren knechten noch nyemant en mochte geen messen draghen, noch ooc gheenderley yseren stocken, dat gheen edel mannen en waren, ende die knechten, dienaren ende ander leechganghers moesten die stadt ruymen. Den.viij.sten dach in Iulio begonsten dye vrouwen tsamen te spreken, ende daer worden sommege posten ghesonden nae die.K.M.ende daer wert veel ghesproken, dan aen deen sijde ende dan aen dander sijde om paeys te makene, dwelc duerde totten.xxiiij.sten dach Iulij, vp welcken dach tsauonts tusschen.x.ende xi.hueren den paeys ghesloten was. Ende.iij.oft.iiij.dagen daer na wert den paeys weder heel ghebroken door een tweedracht ende discoort dat daer vp stont, so dat me vrouwe die regente ende al haer edelen waren bereet ende beraden wech te trecken des morgens vpten.xxix sten dach der seluer maent. Maer god seynde sijn gracie vpten seluen nacht, dat die vrouwen weder vergaderden ende deden so veel dat den voorseyde paeys weder van nyeus gheapprobeert ende gheratificeert wert vpten lesten dach der voorseyde maent. Daer na so wert den Inghelschen haren paeys mede ghesloten den iiij.dach Augusti tsauonts te.viij.hueren.

[Den.v.sten dach Augusti]

¶ Item den.v.sten dach Augusti maectemen grote reetscap in onser vrouwen kerck voor die vrouwen ende heeren, daer dye bisschop van Camerijc die misse sanc, ende na dat Euangelie dede die bisscop een sermoen vanden paeyse ontrent een half huere lanc duerende. Ende naer die missen was daer voor den outaer een bancken ghestelt, bedect met gouden laken ende met cussens van gouden laken, daer die.ij.vrouwen vp quamen knielen, ende die Ambassadeur van Inghelant, daer si ghelijcker hant den paeys beswoeren vp dat cruys ende vp dat helege Euangelie. Als den eedt ghedaen was so luyden alle dye trompetten ende schalmeyen ende alle dye instrumenten van musijcken, ende men sanc Te deum laudamus. Ende daer nae wert den paeys wtgeroupen ende ghelesen inden choor vanden Deken vander kercken int bi wesen van den herauten Roydarmes, Toyson, Granaten ende noch een van des conincx van Vranckerijc sijde, ende een vanden coninc van Inghelant hebbende in haer handen burssen vol gouts ende siluers. Ende als den paeys wtghelesen was worpen si ghelt aen allen sijden roupende Largesse largesse