Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Van een seer vreemde siecte die noeyt ghesien en was gheheeten die sweetende sieckte.

VP dese selue tijt quam bouen inden landen een vreemde sieckte dye noeyt ghesien noch gehoort en was, gheheeten die sweetende oft die Enghelsche siecte, ende daer storuen veel lieden van deser siecten, want binnen.xxiiij.hueren waren si doot, die dye.xxiiij.hueren ouer ghinc die bleef leuende. Dese siecte quam den Rijnstroom af int lant van Cleuen, int lant van Ghelre, in westfalen, int sticht van Wtrecht in Holland, in Brabant, ende principalijc tot Antwerpen, so dat die cooplieden veel vloden wt Antwerpen in ander plaetsen, so datter veel onder wegen vp die wagen ende in die herberghen doot bleuen. Daer sterf menich treffelijck rijc coopman. Het sterf Tantwerpen vp sinte Michiels auont ende dach ende den dach daer na so seer datmen niet ghenouch kisten noch grauen maken en conde, so datter wel storuen binnen.iij.oft.iiij.daghen.v^c.personen Van daer quaemt te Ghent ende so te Brugghe, ende vele vanden cooplieden die van Antwerpen gheuloden waren nae Brugghe, storuen daer, met menich ander mensche, ende die ghemeyn man was so verbaest dat si nyet en wrochten ende sloten haer winckels toe, ende ghinghen hem biechten ende den heleghen Sacramente, ende ghinghen hem bereyden so sy leuen ende steruen wilden.

¶ Op sinte Nycasius auent tseghen auent rees eenen groten storm, so dat voor Antwerpen bleuen.iij.huen met goede gheladen, ende eenen Bortoen in stucken vpten werf, ende sanc

[fol. xlvij.v]

datmen maer het vpperste vanden mast en sach, ende by Vlissinghe ende Ermuyen, ende in meer ander plaetsen bleuen.v.oft.vi.hulcken, ende vp sommeghe plaetsen deet grote schade ende verdroncken veel menschen.

¶ Dit iaer wast eenen slappen somer, so dat den wijngaert niet vrouch en rijpte, so dat den eersten Rijnschen most hier quam in Nouembre den.viij.sten dach, ende ten was ooc gheenen winter voor Kersmisse.

¶ Int laetste van desen iare nam dye Factuer van Poortegale vele busschieters aen, omtrent twee oft drie hondert, die met groten gheschutte schieten costen, om met dye te treckene vp die swarte mooren.

¶ In die maent van Decembre was een cruysvaert ghepreect, ende daer was een beelt by ghehanghen daer in ghefigureert stont, hoe dat dye turcken den kerstenen martelizeerden die niet commen en wilden ter subiectien van den Turck.

¶ Op alder sielen dach int iaer voorseyde, so was geboren in spaengien skeysers tweeste sone.