Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hier naer volcht datter ghedaen was sdaechs naer der crooninghe, vander croonen van Lombaerdien.

HEt sdaechs daer nae terwijlen dat die ghenoechte van sdaechs daer te voren noch duerde, ende dat die vander stede van Bolongien voorseyde ghereetschap maecten om noch meerder triumphen te bedrijuene, so quam daer die tijginghe dat den seer machtighen prinche van Allobroghes, diemen heet, den Hertoghe van Sauoyen quam, met noch sommege andere edele Princhen van vpper Germanyen, voor dye welcke sonder yet te verbeydene ghinghen groot ghetal van volcke van diueersche sexen, wt der steden, ende ghelijc tsant der zee, so verdectet alle die velden ende weghen, ende bi troppen tsamen aldus sijnde, verblijden hem onderlinghe, ende ghinghen teghen dese voorseyde princhen ende heeren. Ende inden eersten so quammer dye edel hertoghe van Sauoyen Kaerle, met eenen schoonen gheselschape van bisschoppen, ende abten, grauen ende baroenen, met noch seer veel edele mannen, seer wel in oordene, ende verchiert met gulden lakene, fluweele ende ander costelicheyt, ende ooc met een groot ghetal van peerde volcke, ende ruyters te peerde ghewapent. Ende als dye tijdinghe van desen quam int hof der keyserlijcker maiesteyt, die doorluchtighe ende seer edele Graue van Assouwe, met noch een groot deel vanden edelen des hoofs der.K.M.ghinghen teghen den voorseyde Prinche ende heere van Sauoyen, die welcke seer gracelijcken, wt der namen vanden keysere, hem verblijdende van sijnder comste, ende leyden hem in die stadt voorseyde int pallaeys, dwelc voor hem seer hoochlijc ende costelijc toegemaect was, voor sijn logijst. Ende als si daer af gheseten waren ende daer een luttel gherust hadden, die voorseyde edelen hertoghe wart gheleyt ende gheconuoyeert totter.Ke.M.van den welcken hi seer graceliken ende minnelijcken ontfanghen was, ende na sommeghe secrete spraken die si onderlinge hadden die voorseyde Hertoghe nam eerlick ende gracelick oorlof, keerende weder om in sijn pallaeys. Ende binnen desen tijden soe bereyde hi hem ende verchierde hem met sijnen costelijcken habijten, om die eerlicke pompe der keyserlijcker crooninghe, die welcke men tsanderdaechs doen soude. Ende terstont naer dat die edel hertoghe van Sauoyen aldus in gecommen was, so quam daer ooc in dye eerweerdighe here ende vader in gode, here Bernaert bisschop van Trente Ambassaduer ende oratuer vanden seer edelen Prinche Ferdinandus, coninc van Hongherien ende van Bemen, Eertshertoghe van Oostenrijck, broeder der keyserlicker maiesteyt, ende met hem quam ooc dye seer doorluchtighe prinche Philips, een vanden princhen ende Grauen palatijn vanden Rijne, ende herto-

[fol. li.r]

ghe van Beyeren, neue vanden keysere, ende dese voorseyde princhen waren seer costelijcken verchiert naer huerlieder maniere, met een schoon ghetal van volcke te peerde, daer waren ooc in huerlieder gheselscap een groot deel frissche ionghe edelinghen seer costelic toeghemaect, die welcke deen nae den anderen elck naer sijnen staet ende edelheyt oock eerlick ontfanghen waren, ende gheleyt met groter eeren tot in huerlieder logijst. Het soude veel te lanc vallen te scriuene int langhe hoe ende in wat manieren dat dese princhen ende edelen ontfanghen waren, ende wat eeren ende triumphen hem ghedaen waren van den Paeus, vander.Ke.M.vanden Cardinalen, ende vanden heeren ende borghers der stadt van Boulongien, ende met wat ghenoechten ende triumphen dat desen dach passeerde ende ouerghebracht was met der incomsten van desen edelen Princhen ende huer schoon gheselschap. Alle die huysen, alle die straten, alle die veynsteren, alle dye hoecken waren veruult van volcke om dit te siene, ende van allen sijden quammer volck die hem hieten willecome. Vander eender sijden so quam hem te ghemoete die Prelaten vander helegher kercken, als cardinalen bisschoppen in huerlieder pontificaelsche habijten, vander ander sijden, die seer excellente in alle sciencien ende doctoren, meesters ende studenten, ende ander gheleerde mannen vander ouder ende eerster Vniuersiteyt der stadt van Boulongien, ooc die Senatuers ende Raetslieden met huerlieder eerlijcke grauiteyt. Ende oock dye seer verchierde gheselschapen vanden edelen ionghelinghen, dye welcke seer groote ghenouchten bedreuen, om dat si sulc eenen seer hooghen ende edelen Keyser hadden, alle plaetsen waren veruult van ghenouchten, het ghemeyn volc aen deen sijde ende aen dander sijde verchierden huerlieder dueren ende veynsteren vanden huysen met hoeyen ende ander groenheden, die ander verchierdense met toortsen ende vierspannen, om snachts te lichtene, die ander vergaderden ende maecten groote hoopen van houte, om vieren te makene, dander staken altoos turcken ghemaect van peck ende terre in die vierpannen om datse altoos bernen souden, ende te lichtene. Dander die maecten grote stellagien in diueersche manieren ende met wonderlijcke consten, om die personagien ende spectaculen van groter costelijcheyt te tooghene, des anderen daechs, dandere behinghen die straten, dandere ordonneerden die hoocheyt vanden spelen, dandere maeckten met stomme personagien die onuertellijcke victorien die die Keyserlijcke maiesteyt ghehadt hadde teghen sijn vianden, dander betoochden ende declareerden die nyeuwe landen die gheuonden sijn ende die Eylanden, dye ghewonnen sijn in zee totten Antipoden. Daer en was nyemant noch ionc noch out, cleyn noch groot hy en fantaseerde om yet nyeus te vindene, ende eenege chieragie te doene, ter blijschappen ende eeren van deser seer edelder Crooninghe der keyserlijcker maiesteyt in eenen keysere van Roomen, in eewiger ende saligher memorie van hem lieden. Ende also desen dach passeerde met deser incomste van desen edelen Princhen ende heren ende die groetinghe ende ontfanginghe die onderlinghe gheschieden, ende metter groter ghereetschap diemen maeckte om die crooninghe die des anderen daechs gheschien soude.