Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Van onsen doorluchteghen Keyser Karolo, een corte recapitulacie.

[Den.xxiiij.sten dach Februarij en den.xij.sten dach Ianuarij en vp den xx.sten dach Februarij en den.xxv.sten dach Februarij]

KArolus die vijfste Keyser van dien name, was die outste sone van coninck Phelips van Castilien, gheboren tot Ghent in Vlaendren. Anno.xv^c.den.xxiiij.sten dach Februarij. Hi wert in sijn landen ghehult erfheere, int iaer.xv^c.ende.xv. Ende naer sijns vaders doot track hy in Spaengien ende ontfinck daer dye croone. Ende int iaer van xv^c.ende.xix. starf die duechdelicke Keyser Maximilianus, den.xij.sten dach Ianuarij Doen werdt die Prinche Karolus voorseyde Keyser ghecoren vanden Kueruorsten, ende die Palsgraue heer Lodewijck Hertoghe

[fol. lix.v]

van Beyeren bracht hem dye tijdinghe in Spaengien, ende so trac hi weder wt Spaengien, ende quam in Inghelandt, daer hi versekert was met conincx Henricx die.viij.ste dochtere, ende dat wert ghecasseert, want die coninc meendese te gheuen den coninck van Schotlant sijnen neue. Ende corts daer nae wert hi Keyser ghecroont tot Aken, ende track doen nae Worms in duytschlandt, ende liet daer sijnen broeder Ferdinandus sijnen stadhouder, ende track weder nae Spaengien om den twist te slissen die daer was. Hy was alder eerst versekert met vrau Glaude conincx Lodewijcx van Vranckerijck dochtere, die te manne creech den graue van Valoys die Dolphijn was etc. Daer nae was hem versekert vrau Marie coninck Hendricx van Inghelant die.viij.ste suster, die te manne creech coninck Lodewijck van Vranckerijck die.xij.ste, ende daer nae den hertoghe van Suffock, ende dese.iij.huweliken waren al ghecasseert. Ende die K.M.troude vrau Ysabeele des conincx suster van Poortegale, daer dye landen van Spaengien cortelinge af ghecreghen eenen gherechten erfghename. Hy hadde altijt veel oorloghen teghen den coninc van Vranckerijck in Italien ende Lombaerdien, so dat die coninc van Vranckerijck gheuanghen wert int iaer.xxv.den.xxv.sten dach Februarij. Ende int iaer daer naer wert die coninck van Vranckerijck weder los ghelaten vp sekere condicien, maer sijn twee kinderen bleuen door hem te ghijsele. Daer na int iaer van.xxviij.sonden die coninck van Vranckerijck ende dye coninck van Inghelant der.K.M.ontseg brieuen, hem scrijuende dat hy was die princepael sake van alder orloghen in kerstenrijck, daer hi hem eerlicke vp verantwoorde. Daer naer int iaer van.xxix.quam die.Ke.Ma.wt Spaengien met veel schepen ende groten state ouer in Italien tot Ienuen, ende van daer vertrack hi tot Bononien, daer hi vp den xx.sten dach Februarij, vp sinte Mathijs dach vanden paeus Clemens dye.viij.ste, Keysere ghecroont was, ende nae sommeghe daghen reysde hy tot Ysbroeck, daer seer grooten dieren tijt was, so dat een reysigher met sijnen peerde verteerde tusschen dach ende nacht, eenen gouden gulden.

[Den.xi.sten dach der maent Iulij]

¶ Hier eyndet die edele Coronijcke van Vlaendren, dye seer ghenouchlijck es om lesen ende om hooren, want daer in besloten sijn veel vromicheden ende edelheden der wapenen aengaende.etc. Biddende daer om ootmoedelijc dye Collecteur dees boecx hem allen dier in lesen sullen, eest datse daer in wat vinden dat hem meshaghet, ofte daer in ghedoelt es, datse wt minnen dat willen corrigeren, tot weder printens toe. Ende es gheprent Tantwerpen, by my Willem Vorsterman, buyten dye Camerpoorte, inden gulden Eenhoren. Anno.M.CCCCC.ende.xxxi. Ende es voleyndt den.xi.sten dach der maent Iulij.

      ☩

¶ Cum Gratie et Priuilegio.