Flandrijs

(1998)–Anoniem Flandrijs– rechtenstatus


Fragment I
[Folio 1ra]
De wilde was int gevecht Staerc ende stout ende onvervaert Dat flandrijs te pinen waert Want hi ontfinc ontbonden slage 5[regelnummer] De ridder hads int herte wage Dat hem also lange hilt Jegen hem ter were een mensce wilt Entie ongewapent staet Met beiden handen datti slaet 10[regelnummer] Den enen die hi wilde geraken Ende deeldene also men doet baken Thooft dore al toter herten De wilde metter machuwe sterte Optie erde ende liet de were 15[regelnummer] Dit sach dander ende weende zere Verstormt waert ende spranc hoge Op flandrijs deide hi sine vloge Doer datti hadde tswert ende scilt Hi stakene met al sulken gewilt 20[regelnummer] Met sire side jegen den scilde Wilde de ridder of ne wilde Hi moeste vallen over de sporen Die wilde hadden gedaen toren Haddi sire handen gebruuc 25[regelnummer] Hi trat flandrise opten buuc Dat hem dat sien verwandelen dochte Hi hiltene datti niet op mochte No met voete no met handen De wilde werdem met den tanden 30[regelnummer] Die joncfrouwe versach dit al Soe ducht haer dat flandrijs sal Tonder bliven vanden vilein De machuwe hief soe int plein Daer soe den wilden mede sloech 35[regelnummer] Dies hi dogede ongevoech Soe sloech hem ii rebben ontwe Daer omme ne liet hi min no mee Hine pinde hem flandrijs te doene grief Watti werstelde ofte hief 40[regelnummer] Het hilde vast de wilde man Die joncfrouwe scoet achter an Ende hielt vaste den wilden biden bene Soe zere dattie ridder rene De arme boven gewan 45[regelnummer] Den wilden heefti geswongen dan
[Folio 1rb]
Jegen derde over rugghe Flandrijs scoot op herde vlugghe So deide de wilde die eer lach Ende flandrijs gaf hem enen slach 50[regelnummer] Inde rechter side ter vaert Dat al dore vloech dat swaert Ende hine deelde ter rechter helt Dus es haer quaetheit gevelt Dies flandrijs heeft wrake genomen 55[regelnummer] Die joncfrouwe es totem comen Ende groettene bi apoline Des litel verblijde therte sine Ende seide joncfrouwe god onse here Geive u ter doget voort waert mere 60[regelnummer] Herte gedochte sin ende spoet Uwe gewaden sciere an doet Dan salic jegen u spreken gerne De joncfrouwe stonts niet t omberne Met bliden zinne ende wel gereet 65[regelnummer] Heif soe haer weder gecleet Ende gijnc recht ten riddere goet Ende wildem vallen opten voet Maer dat hijt haer heift weder boden Here seitsoe uut desen noden 70[regelnummer] Ne waric nemmermeer ontgaen Ne hadde u vromicheit gedaen Ghi sijt de coenste die ic noit sach Nu segt mi oft wesen mach Wanne ghi sijt ende hoe ghi heet 75[regelnummer] Dat dede flandrijs wel gereet Ende seide joncfrouwe hets groete scade Dat ghi geloeft vroech ende spade Mamette ende apoline Die bede duvele sijn anscine 80[regelnummer] Sine mogen helpen no verswaren Laet dese ongelove varen Ende aenbeet jhesum die u maecte Entie wilde dattic geraecte U te lossene uter pine 85[regelnummer] Ende segt mi scone maget fine Hoe toe quam dat ghi waert bracht Hier van die u hadden vercracht Haddic u niet te staden gestaen Dattu te goede es vergaen 90[regelnummer] Die joncfrouwe sprac ridder kerstijn
[Folio 1va]
Ghi hebt verblijdt therte mijn Metten worden van uwen gode Ic bem int gedochte hode Der kerstine wet ane te gane 95[regelnummer] Gherne doen ic u te verstane Hoe mi dese ii lieden wilde Gevaen hadden ridder milde Ic voer heiden buten bi minen castele Allene morgen met groten spele 100[regelnummer] Neiven enen busscelkine Dat cam mi te groter pine Want mi beslop de wilden man Ende swanc mi op sijn part dan Ende brochte mi in deser lagen 105[regelnummer] Mine vrinde no mine magen Ne weeten niet waer hi mi voorde Here ridder dit nes gene boerde Mijn vader es here van den brunen castele Hem behoeren toe ridders voele 110[regelnummer] Ende es de gherechtichste sarrasijn Die wont tusschen dunauwe enten rijn Bi namen heet hi justiniaen Hi sal u werdelike ontfaen Wildi varen te sinen hove 115[regelnummer] Al sidi niet van onsen gelove Dies sal hi u niet mesbieden None geen van sinen lieden Sine boerch staet niet verre heine Flandrijs sprac joncfrouwe rene 120[regelnummer] Gemaex haddic wel te doene In at sijnt gisteren noene No en dranc dat mi verswaert Die scone sprac des wilden part Here ne laet niet achter bliven 125[regelnummer] Sine doget soutmen niet vulscriven Soe staerc eest ende te lopene snel Dat saechdi aenden wege wel Dat part stont aende linden Gebonden flandrijs gijnct ontbinden 130[regelnummer] Het was root van brunen benen Mer hadde te dien tiden genen Beteren destrier niewer vonden Sine leden altoes stonden Te lopene ende sine voete 135[regelnummer] Besach flandrijs met goeden moete
[Folio 1vb]
Dies sere wonderde den degen Sine waren met ysere noit beslegen Gelijc den stenen waren si vast Het droech wel ii parde last 140[regelnummer] Het was gewrocht scone ende hoge Ende van rikeliken vertoge Onder c orsen adment gekint Die wilden haddent also getimpt Te lopene ende hem nauwe te kerne 145[regelnummer] Dies stonts flandrise niet tonberne Ende priset voer enigen scat Met haesten hi daer boven sat Ende prouvet slaende met sporen Ende hi gaf hem den breidel voeren 150[regelnummer] Ende doe dat ors hadde den togel Vloecht metten leiden as een vogel Flandrijs mochtt come weder houden Te rechte waric keitijf gescouden Sprac flandrijs soudic begeven 155[regelnummer] Dit ors als lange alst heeft leven Salict houden ende mi god gespaert Also eer hiet mijn goede paert Gevic hem den name rossele Dus keerde flandrijs int prieele 160[regelnummer] Daer die joncfrouwe na hem wachte Die hi loste van felre achte Flandrijs sprac joncfrouwe fine Opt ors dat te voeren was mine Suldi riden ende hebben te dele 165[regelnummer] Ic wille met u ten brunen castele Varen daer ghi in behoert Die joncfrouwe metter woert Sette flandrijs op dander destrier Si lieten tpraiel enten vergier 170[regelnummer] Ende reiden den pat die eer quam De wilde die de joncfrouwe nam So lange datsi ten brunen castele Quamen daer lieden herde vele Stoenden binnen ende buten mede 175[regelnummer] Die rouwe dreven ende sericheide Doer haer joncfrouwe die was verloren Ende justiniaen alte voeren Noit waert droever man gesien Die ii camen in mettien 180[regelnummer] Gheslagen daer de lieden stoeden
[Folio 7ra]
Bede de domme metten vroeden Verbliden doen si die joncfrouwe Sagen daer si omme dreven rouwe Flandrijs besagen si uter maten 185[regelnummer] Dor sine wapene die hem wel saten Den scilt sagen si te wonder an Ende tswert dat voerde deedel man Si spraken stille onder haer tande Dese es here van groten lande 190[regelnummer] Die voert dus rikelec gesmide Justiniaen was herde blide Als hi sire dochter sach Hine leivet diet u seggen mach Hi hiefse af met bliden moede 195[regelnummer] Flandrijs beette de ridder goede Die daer eerlike waert ontfaen Ende als verstoent justiniaen Van sire dochter de aventuere Deide hi flandrise wel ter cure 200[regelnummer] Festeyren ende leiden int palas Doer al datti kerstijn was Die rechtige here justiniaen Heeft flandrise vele ere gedaen Hi dedene ontwapenen int palas 205[regelnummer] Daert rikelijc ende scone was Van allen uterliken gestichte Justiniaen dat seit tgedichte Sprac kerstijn ne penset niet Dat mine herte u verspiet 210[regelnummer] Doer dat ghi van onser wet Niet sijt bi minen god mamet Ic dade minen zone ere Dan u ridder enige dere Want ghi hebt jegen mi verdient 215[regelnummer] Flandrijs sprac here lieve vrient Ic biddu dat ghi sijt vordacht Mire wapene ende wel wacht Ic minse voer alder werelt scat Justiniaen besteidde dat 220[regelnummer] Al gader bin sire kemenaden Flandrijs hoors hiet hi begaden Den stal waerders dies hem gebrac Hi brochte den riddere sonder lac I mantel diere ende rike 225[regelnummer] Ende prosenterdene jonstelike
[Folio 7rb]
Flandrise ende hijncken hem omtrent Dat was hem een scone prosent De wonde die hem beet de griffoen Deide seinen deidele baroen 230[regelnummer] Met sinen stene diere ende rike Ende soe genas wel haestelike Die lieden besaghene te stride Hi sat neiven des heren side Ende spraken onderlijnge veile 235[regelnummer] Bede in eernste ende in spele Deen vraechde dander berechte Soe dat flandrijs al daer verplechte Sine aventure groet ende smal Ende sijns vaders ongeval 240[regelnummer] Dies sere wonderde justiniane Ende seide kerstijn na minen wane Duncti mi wesen een coene deigen Al haddi aligorante verslegen Van cuelne den putertieren coninc 245[regelnummer] Ic ne achtes niet een penninc Want jegen hem benic gevee Hi dodede mine broeders ii Sonder vonnesse ende sonder recht Mochtic jegen hem dragen gevecht 250[regelnummer] Ic soude wreken mijnre broeders doet Dies mine herte hevet rouwe groet Here ridder sprac justiniaen Ghi hebt vromicheit gedaen Dat ghi tswert enten scilt wont 255[regelnummer] Qualike vare dies u veriont Versloechdi den lioen enten drake Daer noeyt ridder dorste genaken Soe dadi groete vromichede Jaic here flandrijs doe seide 260[regelnummer] Bi goods gracie die mi beriet Justiniaen seide kerstijn siet Van uwen gode hoerdic dicken Spreken in verledenen sticken Datti was een gerecht man 265[regelnummer] Ghi mochter u wel houden an Dattic therte sal laten sinken Van onsen goeden ende gedincken Uwen god tanebedene Moochdi volcomen mine redine 270[regelnummer] Die ic u sal doen becant
[Folio 7va]
Condi gevaen den triant Die minen broeders tleven nam Dies ic ben droeve ende gram Ende hier gevanghen bringen 275[regelnummer] Ic sal geloven dor dese dingen An uwen god ende kerstijn bliven Ende mine manne ende haer wiven Sullen selfs ane gaen Mijn goet salic vandi ontfaen 280[regelnummer] Ende hulpen wreken u lachter Ende gheven te wive mire dachter Die ghi losset uten grieve Dat salic doen doer uwe lieve Justiniaen here sprac flandrijs 285[regelnummer] Ghi sprect mi toe in hooscer wijs Met goeden rechte gevic u lof Ghi doet mi ere in u hof Meerre dan mi noit heidijn dede Ic weets u danc ende lof mede 290[regelnummer] Al dat ghi mi hebt vertelt Maer uwer dochter ghine selt U verbelgen ic niet begere Si es werdich meerre ere Ende ic weet ene die ic kinne 295[regelnummer] Mijns herten troost entie ic minne Die ic niet vergeten en can Justiniaen de hoefsche man Vraechde flandrijs om sine name Hi berechs hem sonder blame 300[regelnummer] Ende seide here ic hete flandrijs Justiniaen sprac kerstijn wijs Mochdi doen dattic u seide Ic sal ontfangen kerstenheide Ende al dat mi toe bestaet 305[regelnummer] Doer sekerheit van deser daet Slaic mi op minen tant Dats een die meeste pant Diemen in heidijnesse zwert Justiniaen was blide wert 310[regelnummer] Flandrise so was de joncfrouwe Mettien quam in de ongetrouwe Fallax dat was justiniaens zone Die talre stont quaet doende was gewone Hi hadde gejaget de wilde diere 315[regelnummer] Hem waren geseit alde maniere
[Folio 7vb]
Hoe sijn suster was genomen Ende bi enen kerstijn weider comen Ende hie in die sale ware Fallax hadde dat sere ommare 320[regelnummer] Ende quam ter salen sonder spreken Tote sine vader es hi gestreken Ende tochdem sijn venisoen Doen stont op flandrijs de baroen Ende hietene willecome sijn 325[regelnummer] Cume andwoordem de heidijn Maer hi sciet van daer wel sciere Onwerdich was al sijn maniere Dit mercte wel justiniaen Ende sprac te flandrise zaen 330[regelnummer] Eedel kerstijn merket niet Dat mine sone es gesciet Van nide datti cume sprac Hi hevet soe groet ongemac Bedect om mine broeders doot 335[regelnummer] Hine mach verbliden smal no groet Voer hijs heeft genomen wrake Flandrijs andworde te deser saken Sal hi noch comen moetic leven Dus es haer tale bleven 340[regelnummer] Men leide taflen ende men at Fallax altoes onwerdich sat Dat was een haerde pijlijc opsien Flandrijs keret al in dien Dies hem eerst bat justiniaen 345[regelnummer] Die joncfrouwe wel gedaen Sat jegen flandrise die de morsele Haer pareerde ysabele Hiet de joncfrouwe die zere was scone Flandrijs droech in haer herte crone 350[regelnummer] Haddire toe gheoctroiert Watmen daer sprac hem gemoviert Ne hevet niet de quade fallax Hi sach veile sijns ongemax Op dattire toe seggen dorste 355[regelnummer] Men dede daer op sonder vorste Die scone scolakine vanden male Men ginc verwandelen inde zale Deen ten scake dander ten stene Fallax hadde begerde negene 360[regelnummer] Dan om flandrijs te slande doet
[Folio 3ra]
In sine camere hi omboet X van sinen besten gesellen Ende gijnc hem sijn gedochte tellen Datti int herte niet blide mach sijn 365[regelnummer] Hine hebbe verslegen den kerstijn Die daer quam metten diere gegaren Morghen seiti sullen wi varen Tere lagen inden foreeste Dat niemen sal weten van onsen oreeste 370[regelnummer] Ende daer wachten den kerstijn Ende nemen hem dat leven sijn Mi sullen sine wapene bliven Bedectelike sulwine ontliven Ende hier af maect gene niemaren 375[regelnummer] Die andre dies gewillich waren Ende waren blide uter maten Verraders moete god verwaten Die om der goeden eren spien Hen es gene dijnc meer ontsien 380[regelnummer] Dan die int herte draget venijn Bedect ende niemen macher sijn Jegen voorsien sijt lief of leit Dat doet sverraders bedectheit Flandrijs was savonts wel te gemake 385[regelnummer] Ende gebeidt wat soudic sprake Veile maken die niet ne dogen Die nacht leet ende met vertoge Quam de dach ter salen binnen Die wachter blies ten hogen tinnen 390[regelnummer] Flandrijs hoeret die hem gijnc cleden II cnapen holpen hem gereiden Die daer sinde justiniaen Sine wapene hebsi hem aen gedaen Alstie daer niet laten wille 395[regelnummer] Fallax ende sine gesellen stille Waren wech in haer lagen Eer dat iet begonste te dagen Daer niet af wiste de ridder coene Ter salen brochtene de garsoene 400[regelnummer] Wel gewapent van ende torde Hi dancte alser toe behoerde Justiniane ende ysabele Entie waren binden castele Der eren die sij hem hadden gedaen 405[regelnummer] Here flandrijs sprac justiniaen
[Folio 3rb]
Sijt te onser saken snel Mijn woert salic houden wel Dat ic ghisteravont seide Mer brochte flandrise met enen gereide 410[regelnummer] SIjn wilde part ende wel berect Voerde zale es hi getrect Daer hi int gereide spranc I gelavie scarp ende lanc Brochtmen hem na sijn vermanen 415[regelnummer] Doe nam hi orlof ende sciet danen Ende liet achter hem dander part Den wech voer hi te cuelne waert Also hem wijsde justiniaen Rossele gijnc hi met sporen slaen 420[regelnummer] Datti opten wilden wan Maer onverre was hi van dan Dat fallax op hem cam gereiden Ende seide kerstijn hier ter steden Calengeric uwe wapine 425[regelnummer] Ende u ors dat wert oec mine Metten live ne mogedi niet Ontgaen hi hadde een spiet Die hi metten worde daelde Die voren scarp was als i naelde 430[regelnummer] Flandrijs sach hem den anderen naken Hine achte niet op sine spraken Hi daelde spere ende sloech met sporen Elc hadde andren vercoren Met haer gelavien scarp ende stide 435[regelnummer] Versaemden si met sulken nide Dattie orsse vielen op die hamen Fallax ne dorstem niet scamen Vanden joeste die hi stac Op flandrijs scilt sijn spere brac 440[regelnummer] Daer op veste niet de spiet Maer flandrijs die coene diet Stac fallaxe aenden carbeele Vanden sadele ende metten spele Esser de glavie dore geronnen 445[regelnummer] Om fallax lijf eest al begonnen Want hem tiser vloech dor den buuc Ende vel ter herde als een struuc Vanden orse daer hi op sat Flandrijs traken tspere uut ter stat 450[regelnummer] Als dies wel waent hebben te doene
[Folio 3va]
Doe sloegen uut de x glottoene Op flandrijs diese heeft versien Sijn ors sloechi ooc jegen dien Die voren quam ende hem was nast 455[regelnummer] Sine doot heefti verhaest Flandrijs stakene durendure Ende hilt hem stijf gelijc den mure Jegen dandre ix heidine Hi dor stac metter gelavien zine 460[regelnummer] I die hi vanden live versciet Hi weder stoent menigen starken spiet Die opten vasten scilt al braken Met haesten si de swerde traken Hem mede te werne in dat pongijs 465[regelnummer] Sijn goede swert trac doe flandrijs Tbeste dat was in enich lant Dat was gheheten cyclopidant Ende sloech daer mede de dieve felle Als oft ware ene scelle 470[regelnummer] Gaf dat swert uut enen clanc Elc heidijn van vare verspranc Vanden lude vanden swerde Flandrijs sloech optie werde Met enen slage ii ter neder 475[regelnummer] Die nemmerme hem werden weder Hi sloechen wonden groet ende stranc Haer were was herde cranc Dat swert dat sloech opten scilde Die flandrijs voerde de here milde 480[regelnummer] Brac inde midden waerde ontwee Haer were diedde min no mee Si bleven alle doot optie werde Dies dancte flandrijs sinen swerde Justiniaen vanden brunen castele 485[regelnummer] Die niet weet van desen rivele Hoe dat flandrijs was belaget Omme fallax heefti gevraget Den genen die daer bi hem waren Doe seidem een der portenaren 490[regelnummer] Datti voer dage hem xder leet Die poorte enten bussce reet Gewapent hi van danen sciet Waer hi voer seidi mi niet No in vragets hem ooc twijnt
[Folio 3vb]
495[regelnummer] Ende alstie portier dit ontbijnt Riep die here justiniaen Ghi heren nu vant ten wapenen vaen Ende rijt met mi ic hebs noet Die kerstijn wert geslegen doet 500[regelnummer] Die ic gisteren te gaste ontfinc Dat wert mi lachterlike dinc Fallax es hem na gereden Justiniaen heeft sciere bescreden Een ors doe hi dit hadde geseit 505[regelnummer] Uter porten sloech hi gereet Gewapent met xx sire man Tote si quamen inden dan Daer flandrijs hilt de ridder goet Ende doe hi versach dat groete moet 510[regelnummer] Waendi dat vianden waren Hi reet hem jegen sonder sparen Scilt an hals ende spere ter steken Justiniaen began doen te spreken Daer hi quam voren metten sinen 515[regelnummer] Here kerstijn want u niet pinen Al goet wi te u waert menen Flandrijs kende elne genen Dan justiniaen sinen ward Hi daelde spere ende hilt sijn part 520[regelnummer] Stille ende seide lieve here Wat doet u riden aldus sere Met uwen lieden doet mi verstaen Here kerstijn sprac justiniaen Berecht mi teerst of u yet let 525[regelnummer] Flandrijs sprac bi minre wet Mine mescomt smal no groet Mer si xi hebbic hier doet Geslegen die mi wilden deren Dat deidic al op mijn verweren 530[regelnummer] Wie si waren es mi oncont Justiniaen voer ter selver stont Met flandrise daer dandere lagen Elken si onderlinghen besagen Vanden xi entie here 535[regelnummer] Justiniaen gijnc wenen zere [r. 536 en 537 zijn een herhaling van r. 522 en 523 (veroorzaakt door voorafgaand gelijk rijm), met weglating van "uwen" en gebruik van twee afkortingen extra] 538[regelnummer] Als hi sinen sone sach Entie andere groot geclach
[Folio 4ra]
540[regelnummer] Dreven ooc al sine lieden Flandrijs sprac vant mi bedieden Twi droufdi om desen doden Dat manic u bi gode Here kerstijn sprac de goede here 545[regelnummer] Met rechte machic droeven zere Want mijn sone es die hier lecht Ende mine lieden hi es ontweicht Sprac flandrijs die hevet rouwe Om verraders ongetrouwe 550[regelnummer] Als hise in dogene siet verlast Ghi ontfinct mi over gast Ghisteren dat lone u onse here Nu quamic met scilde ende met spere Gevaren also ic van u sciet 555[regelnummer] In hadde mi vermoedet niet Uwes soons die op mi quam Ende riep op mi alstie was gram Datti mine wapene woude Ende mijn lijf met ongedoude 560[regelnummer] Worden wi des strijts gemene Ic reettene doot van sinen wrene Ende x die waren van sinen accorden Justiniaen sprac met hoescen worden Vaert gesont getrouwe kerstijn 565[regelnummer] Dat ghi versloecht den sone mijn Vergevic u met goeden gedochte Datti sine dompheit becochte Es recht ende hen sal nieman clagen In wancons u te genen dagen 570[regelnummer] Dies wistem flandrijs groten danc Ende voer wech sonder letten lanc Den wech die hi eer hadde genomen Die heidene die daer waren comen Metten here justiniaene 575[regelnummer] Voerden de dode gereet dane Tote inde sale daer si behoerden Wat souden hier af lange woorden Na hare wet met groeter werden Waren si alle gedaen ter erden 580[regelnummer] Nu latic vanden heidenen bliven Ende wille u van flandrise scriven Ende vaert den wech te cuelne waert Wat lopen mach sijn paert Daer hi mict te doene wonder
[Folio 4rb]
585[regelnummer] Omtrent noene quam hi onder Ene praierie gereiden Daer beete hi met verdicheiden Ende wildem rusten int scone gras Ende als hi neider gebeet was 590[regelnummer] Ende sijn paert daer peisteren dede Sachi totem daer ter stede Die joncfrouwe comen die hem te voeren Tswert enten scilt als ghi moget horen Wijsde entie hi ene beide 595[regelnummer] Beloefde bi ridderscepe meide Deerste die soe hem bidden soude Flandrijs verkennetse also houde Als hise metten ogen sach Sine herte verlichtem alstie dach 600[regelnummer] Ende gijnc gereet in haer gemoet Elc heeft andren daer gegroet Hoefschelike doen sprac die scone Die van rijcheiden droech crone Ende volmaect was van allen seden 605[regelnummer] Here flandrijs ghi hebt leden Die aventuere die ic u wijsde Ende tswert enten scilt verprijsde Hebdi gewonnen met vromicheden Nu vulcomt mi mire beden 610[regelnummer] Die ghi mi bi uwer trouwen Belovet flandrijs sprac joncfrouwe Daer toe ben ic al gereet Die trauwe te quitene ende beheet Gebiet wat ghi wilt ic doe 615[regelnummer] De scone loech ende sprac hem toe Flandrijs ic segt al eest u swaer Hier staet xl milen naer Een casteel ende een sale Ghewrocht van sevenrande metale 620[regelnummer] Ende heet de borch van aventuren Beide de porten entie muren Sijn soe starc en es man Die de vasteit geseggen can No die wondre diere an leggen 625[regelnummer] Nu hoert wat ic u voert sal seggen Binden castele woent een gigant Ic wane men noit sijn genoet vant Colosus eest datti heet Xx voete alsoe ict weet
[Folio 4va]
630[regelnummer] Es hi lanc dese colosus Met hem woent een tarcarus Dat es een man uut daltatien Die meer toent nigromantien Dan alle die ter werelt leven 635[regelnummer] Hi doet wel de arde beven Ende bi consten soe sere waien Dat een sijn sien al verdraien Het ware te sechne ene sage Nu hoert wes ic mi beclage 640[regelnummer] Vanden gigante colosus Die inden casteel woent aldus Die borch heet van aventueren Binden meye alstie verdueren Scone staen in vele valeyen 645[regelnummer] Quam ic gegaen in deser contreien Mi derden toter fonteinen clare Daer ghi mi laetst waert geware Om dat daer soe scone was Saten wi alle iii int gras 650[regelnummer] Mine gheselinne ende ic Als wire gheseten hadden een stic Brachtic enen spiegel voert Van beteren hebdi niet gehoert Dan de spiegel was die ic brochte 655[regelnummer] Dat ict u seide het ne dochte En ware dat ghine hadt gewonnen Dies ic te telne u hadde begonnen Vanden spiegele die was soe rike Doe quam igaen slopenlike 660[regelnummer] Daer wi inden spiegel sagen aldus Die groete gigant colosus Ende nam mi uter hant gereet Den spiegel waest mi lief oft leet Dies ic doge ongevoech 665[regelnummer] Deren hebbics ooc genoech Ende meer dan ics wille clagen Wildi prijs ende ere bejagen Soe doet mi nu gereet de bede Daer ic u tswert om halen dede 670[regelnummer] Enten scilt diere ende rike Dat es dat ghi mi verdelike Ter borghe vaert daer colosus In woent die minen spiegel dus
[Folio 4vb]
Genomen eeft bi valschen treken 675[regelnummer] Dies ic ontheert ben ende versteken Totic den spiegel mach gecrigen Nu andwordt mi of vant swigen Flandrijs sprac joncfrouwe scone Wat ghi mi bidt onder den trone 680[regelnummer] Dat salic doen of bliven daer voeren Verslegen nu laet mi horen Hoe dattic drijnge turcarien Niemen soudic so sere ontsien Alstie met toverien spelen 685[regelnummer] Flandrijs i dinc willic niet heilen Sprac de scone nemt desen steen So nes toverare geen Die u mach deren of doen scanden Hebdine beloken bin uwen tanden 690[regelnummer] Ic prisene u voer groete dijnc Flandrijs den goeden steen ontfijnc Ende wierpene in sine alowiere Nu wijst mi seiti goedertieren Ter buerge daer binnen colosus 695[regelnummer] Woent de maget sprac rijt dus Desen groenen pat oost waert Het es heinen iv dachvaert Ghi sultene sien in enen dale Doe nam hi orlof ande smale 700[regelnummer] Wies bede datti wille vulbrijngen Machi metten live verdijngen So heeftijs meer dan aventuere Toten avonde reet hi al dure Ende nachts lachi in een dan 705[regelnummer] Ende at al sulc als hem quam an Cruut dat anden velde wies Sine hebben niet al haer gerief Die varen in wilder aventueren Somwile tsoete daer na tsure 710[regelnummer] Dit es haer lieder leen Van desen moeste flandrijs sijn een Hine hadde niet al sijn gevoech Maer hi was diet wel verdroech Na dat niet beiters sijn mochte 715[regelnummer] Alstie nacht den dach voert brochte Bescreet flandrijs sijn goede part Ende reet sinen wech voort waert
[Folio 8ra]
Ten castele van aventueren Came hi gerne mochts hem geburen 720[regelnummer] Daer binnen wonde colosus III dagen heefti gereden dus Dattine sach wijf no man No huus daer hi mach vragen an Om de borch van vii mettalen 725[regelnummer] Nachs lachi inden groenen dalen Met sinen parde in grooter pinen Hi dranc borne ende at rachine Ongereet was hem enich dac Dies hadden si bede ongemac 730[regelnummer] Den vierden dage al toter noenen Reet flandrijs de ridder coene Den rechten wech die hi begonnen Hadde te ridene vander zonnen Deidem herde leet dat scinen 735[regelnummer] Daventuere waert hem te pinen Daer hi den spiegel in moet souken Die pine deidem sere vlouken Colosuse ende sinen toren Dat hire niet can comen voren 740[regelnummer] Ende hine iii dage hadde gesocht Dus reet flandrijs al verdocht So datti van hem niet verre De buerch sach oft waren sterren Scemerden die rikelike tinne 745[regelnummer] Flandrijs verblijdde in sinen sinne Als hi sach dat diere gestichte Daer de sonne met haer lichte Jegen blecte dat wedersceen Flandrijs reet eer hi gefeen 750[regelnummer] Toter porten vander gesaten Die men node soude laten Besloten dor enichs mensce ontsien Want daer was an alsulc engien Daer de poorte af was voor hoet 755[regelnummer] Dat soe nacht ende dach open stoet Ende nieman dorste binnen gaen Want dese porte was wel gedaen Al gewrocht van ysere fijn Tbeste dat ye mochte sijn 760[regelnummer] Die toire die siden entie posten Waren zelverijn wat sout costen
[Folio 8rb]
Die sulken werc vulbrijngen wilde Dit sach flandrijs de ridder milde Daer hi voorde poorte hielt 765[regelnummer] Of elke zide stont een wilt Bere gebonden die te samen Diere in wilden den wech benamen Want si versamen mochten te dele Deerste poorte vanden castele 770Dat was de porte yserijn Daer de ii beren binnen sijn Fel ende wreet die souden bestaen Den genen die daer in wilde gaen Flandrijs sach dit wonder al 775[regelnummer] Help god seiti ende goet geval Ic hebs herde wel te doene Al waric starc gelijc sampsoene Soe ware mi beisich mine macht Nochtan keric nemmermeer acht 780[regelnummer] Dor blootheit van minen live Tbelof dattic den sconen wive Geloefde willic seker houden Want woordic logenare gescouden So waer mijn ere ende mijn leven 785[regelnummer] In des dorpers brief bescreven Ende eest dattic de doet besure Dor tbestaen deser aventuere So sal mine ere weisen groot Van allen lieden na mine doet 790[regelnummer] Doot hebbic liever de ere behouden Dan leivende doorper sijn gescouden God wouts nu willic ane vaen Flandrijs beete neder zaen Alstie hem sijn ors ontsiet 795[regelnummer] Ende heeft genomen sinen spiet Die starc was ende voren scerp Den scilt hi voorde borst werp Ende liep ten i vanden beren Die metten cawen gijnc reren 800[regelnummer] Doen hi flandrise comen sach Ende flandrijs stac al datti mach Den bere vore inde borst Soe dat tiser sonder vorst Ten rugge been dor ran 805[regelnummer] Ende eer hi sinen spiet gewan
[Folio 8va]
Uten bere die lach dorsteken Quam dandre bere toe gestreken Ende sloech de clauwen an flandrijs scilt Al hadde de bere grote gewilt 810[regelnummer] Anden scilt mochti niet winnen Flandrijs trac tswert ende liet binnen Den doden bere steiken den scacht Eer hem de ander wel vorwacht Slouchem flandrijs af tmuseel 815[regelnummer] De bere maecte groet rivel Op flandrise met sinen poten Besiden scilde es hi gescoten Uten alsberghe inder batalien Heefti gehaelt de vaste malien 820[regelnummer] Ende scuerde tporpoint van siden Flandrijs deide sijn swert sniden Met beden handen des gelovet Sloechi den bere op sine hovet Dattijt hem al dor spleet 825[regelnummer] Die bere sijns stridens doe vermeet Flandrijs stac sijn swert inden scoe Sinen scacht gereep hi toe Ende sat op sijn ors rosseel Hi heeft nu een scone voordeel 830[regelnummer] Hi leet de porte yserijn Bat voert reet de ridder fijn Tere porte van finen metale Dit was de ander vander zalen Soe was diere ende starc 835[regelnummer] Flandrijs pensde dits duvels warc Dese poorten groot ende dicke Ende al gemaect van enen sticke Noit ne maketse mensce hant II lupaerde fel rampant 840[regelnummer] Die beide hadden ondaen de keile Ende scenen wel van quaden spele Sach flandrijs binder poorten gebonden Somwile saten somwile stonden De ii beesten van leliken cuwen 845[regelnummer] Den ridder begans zere of geruwen Ende seide dese beesten beide Ebben herde felle zede De felste die ic noeit ane sach Nochtan salic op desen dach 850[regelnummer] Jegen hem prouven mijn geval
[Folio 8vb]
Neder beeti sonder gescal Ende bant sijn part aen enen stake Sinen spiet al sonder sprake Nam hi ende hielt den scilt voren 855[regelnummer] De luparde heefti vercoren Die hem bede hielden ter were Flandrijs liep met sinen spere Dat voren was herde scarp verstaelt Opten enen hi dat daelt 860[regelnummer] Diere jegen de cuwe ondede Daer hi hem selven derde mede Flandrijs stac hem ter selver ure Achter der necke tspere dure Dies hi harde lude scree 865[regelnummer] Hine weredem nemmermee Dat beriet hem sijn gierige aert Hoort wat dede dander lupaert Die sinen geselle sach bliven tonder Sine clauwen hief hi gonder 870[regelnummer] Met sulken nide op flandrijs scilt Recht oft ware een anbilt Ne mochten de clauwen daer in vesten Nochtan datsi bede mesten Ontfijnc flandrijs sulc enen stoet 875[regelnummer] Datti toter erde scoot Van porsen op sijn luchter knie Tswert trac de ridder vrie Met groeter haest doe hi op spranc Ende sloech enen slach wel stranc 880[regelnummer] Met beden handen opten lupaert Trechter die ende ooc den staert Sloechi al of metter sneide Datten lupaerde lede deide Ende scoot van sinne verwoet 885[regelnummer] Op flandrijs die voer hem stoet Sloechi de clauwen anden arm Binden scilde ende deide al warm Sijn bloet comen uut sinen velle Dat daden des lupaerts nepen felle 890[regelnummer] De smerte flandrijs wel besief Met beden handen hi tswert hief Ende sloech den lupaert quaet ende fel Dat hem thovet vanden buke vel Ende storte neder voer flandrijs voete 895[regelnummer] Die sine wonden met goeder moete
[Folio 2ra]
Seinde die hem beet de lupaert Doen sat hi weder op ter vaert Ende nam inde hant den scacht Gode dancti die hem de cracht 900[regelnummer] Gaf datti de poorten leet Ende versloech de diere wreet Die luparde entie ii beren Binnen te sine es sijn begeren Dies hi een littel moet ombeiden 905[regelnummer] Ter derder poorte cam hi gereden Die van stale was gemaect Waren de eerste wel geraect Dese waren volmaecter vele II manne elc met enen vleigele 910[regelnummer] Stonden binder porte stile Ende onder sloegen hem te bile Dat hem vruchten soude diet sage De ii die sloegen de felste slage Waren coperinen entie vleigele 915[regelnummer] Flandrijs sprac van desen spele Sachic noeit dan hier ter stede Die dese manne hier staen dede Van copere gewrocht dus vreselike Was duvel of duvels gelike 920[regelnummer] Sij sijn verwoet ende sonder sin Salic ter poerten comen in Ic moet emmer ii slage ontfaen God laet mi ten besten vergaen Ende minen orsse goet vercoren 925[regelnummer] Mettien noopte flandrijs met sporen Rossele ende warp den scilt opt thovet Door de poorte des gelovet Vloech dat ors oft ware een aren De ii mannen sloegen te waren 930[regelnummer] Eer hi leet de ridder milde Metten vleigelen op sinen scilde Datti boech op sine gereide Entie vlegelen braken beide Opten scilt van doechden groot 935[regelnummer] Flandrijs ware bleven doet Ne ware de scilt die dat bewaerde Nochtan derde flandrise haerde Die smerte die hem elc man gaf Hi waert tongemake daer af 940[regelnummer] Helpt god sprac flandrijs de here
[Folio 2rb]
Ic hebbe den scilt becocht sere Daer ic af hebbe gedaen trouwe God laets mi liden sonder rouwe Meerre dan ic hier nu ontfijnc 945[regelnummer] Mettien quam de jongelijnc Flandrijs ter vierder poorten gevaren Hi sach datter nieman ne ware Het was de beste vanden vieren Gemaect van rikeliker manieren 950[regelnummer] Was dat werc al selverijn Daer jegen blecte der sonnen scijn Dat gene ogen conden bescouwen V veinsteren subtilike gehauwen Waren inde poorte gestaen 955[regelnummer] Nacht ende dach waren si ondaen Entie neder poorte mede In soude u mogen de waerheide Niet vertellen vanden juwele Flandrijs cam gereden met rossele 960[regelnummer] Toter poorten zelverijn Hem wonderts sere int therte sijn Vanden rikeliken palaise De poorte waent hi liden met paise Maer dat was hem ongereet 965[regelnummer] Doe hi sijn ors met sporen smeet Vlogen uut elker vinstere x Staline scichte sere tontsiene Ende gloeiende als een vier II ontfijnker sijn destrier 970[regelnummer] Ende ii hadder flandrijs de milde Dandre braken op sinen scilde Die alle wapene wel onstont Flandrijs ende sijn ors es gewont Dat hem bede de smerte sceen 975[regelnummer] Rosseel int hooft ende in sijn been Ende flandrijs in sijn rechte die Ende in de scoudere de ridder vrie Leet dus de poorte selverine Al quaemt hem te sware pine 980[regelnummer] Hi reet ter zale voorden graet Die maerberijn was dat verstaet Daer lieti den scacht ende rossele Dat int vel hadde ii quarele Die hem flandrijs ute trac 985[regelnummer] Doer te beiterne tongemac
[Folio 2va]
Heeftijt gestreken metten stene De wonden vanden goeden wrene Genasen daer flandrijs toe sach Sire wonden hi doe plach 990[regelnummer] Ende traken de felle scichten uut Het wast ter werelt geen cruut Daer de wonden waren bi So saen geloken die ridder vri Dancte sinen lieve uter maten 995[regelnummer] Die hem de steen gaf tsire baten Flandrijs liet tros na desen doene Voor de zale staen int groene Selve clam hi opten graet Die dure daer hi dore gaet 1000[regelnummer] Was al goudijn ende tpavement Was al latoen met grooter ment Quam hi inde sale scone Gelijc wilen salemoens trone Die hi van goude maken dede 1005[regelnummer] Was dese zale verhemelt meide De veinsteren waren selverijn Ende tverwelf binnen root guldijn Die vloer scemerde vanden letoene De pilare van rikeliken doene 1010[regelnummer] Waren alle wit yvorien Der sale decsel was herde fijn Van tinne ende lodijn de goten Entie cartele wat soude genoten Sulken castele want de mure 1015[regelnummer] Waren maerberijn goet ter cure Sonder water was hi behoet Wien hier af twifelt inden moet Dunct mi wesen sere ontraect Want de duvel hadt al gemaect 1020[regelnummer] Daerne toe dwanc de carturien Doe flandrijs cam in dat engien Hine hoorder niemen none sach Die hem mochte doen gewach Ende watti sochte saen berechten 1025[regelnummer] Hine sach vrouwen heren no knechten Dat hem herde sere wondert I camere sachi besondert Die binnen al was van ivore Ende goudijn scone was de dore 1030[regelnummer] Also der zale doren waren
[Folio 2vb]
Daer in gijnc flandrijs sonder sparen Recht of hire ware bekent Hi sacher binnen enen serpent Op enen selverinen pilaer 1035[regelnummer] Op enen goudinen daer naer Sachi enen spiegel staen Scone ende claer ende wel gedaen Diere in sach hem wale dochte Dattire de werelt in sien mochte 1040[regelnummer] Ende al datter binnen ware So groot was tgelas ende so dor clare In desen spiegel sach tserpent Daer toe hadt al sijn atent Els ne heeftet geen jolijt 1045[regelnummer] Dan het in spiegelen was verblijt Want het al sine genoechte is Dit serpent es geheten tigris Dat hem dus te spegelne pliet Noit ne was levende snelre iet 1050[regelnummer] Geen dier ne macht achter halen Tigre heetment in dietscer tale Ende es een vreselijc serpent Flandrijs sprac god omnipotent Es dit de spegel daer de joncfrouwe 1055[regelnummer] Mi omme sendde daer ic bi scauwe Dit serpent vreselike gedaen So willic dit dier bestaen Ende nemen den spiegel van sire steide Tswert trac hi doe uter scede 1060[regelnummer] Ende gijnc daer de spiegel stoet Boven opten pilaer goet Daer hi toe rechte uut de hant Maer tigris dat felle serpant Scoot neder in flandrijs gemoet 1065[regelnummer] Van sinne erre ende al verwoet Ende haelde den ridder ter selver ure Metten clauwen de wapene dure Ende gaf hem in sijn zide Een wonde diepe ende wide 1070[regelnummer] Datter troode bloet ute scoet Flandrijs sloech met nide groot Achter de tigre die ontspranc Dat goede swert inden vloer clanc Van letoene enen halven voet 1075[regelnummer] Dat flandrise te pinen stoet

Vorige Volgende

Fragment I