Aenden Edelen ende VVijsen H. Heyndrick, Heere van Berchem, Ridder, Borgemeester der Stadt van Antwerpen.
AEnmerckende E.H. dat de Emblemata des edelen H. Io. Sambuci, de vvelcke my d'Autheur selue te drucken op goeder trouvven ouer langen tijdt heeft gedaen, int Latijn den geleerden lieden seer aengenaem zijn gevveest, mits de lustighe materie ende fraeyheyt die in de figuren ende in den sin begrepen vvort: soo heeft my goet ghedocht, na dat ickse nu andervverf in Latijn hadde ghedruct, de selue te doen ouersetten op mijnen cost in de Nederduytsche sprake, op dat de gemeyne man van desen lande alsulcken genoechte daer vvt oock soude mogen rapen, als de gheleerde Latinisten tot noch toe door het lesen van dien gheniet hebben. Maer na de mael ick dese ouersettinghe beneersticht ende becosticht hadde, ende alle ghereetschap daertoe gedaen, om dit aerdich ende constich vverc met de edele conste der druckerien te vercieren ende int licht te brengen: so heb ick ghedacht t'selue V.E. toe te schrijuen, tot een teecken der danckbaerheyt van de goede bescherminge, vvaer met V.E. (bedienende nu ter tijdt het ampt des Borgemeesterschaps van Antvverpen,) my ende alle Borgers ende ingheseten der seluer stadt voor vvijsen raedt hebt behoedt, all tvvist, tvveedracht ende oploop keerende, ende de ghemeynte tot eendrachtigheyt brengen. Bidde hierom V.E. vvillet dese mijne cleyne ghifte in dancke nemen: ende uvven gehoorsamen ondersaet Christ. Plantyn in goede bescherminghe ontfangen tegen den aenstoot van alle quaetvvillighe menschen.
Anno 1566. den laetsten dach Septemb.
V.H. dienaer ende ondersaet
Christoffel Plantyn
Auteursrechtelijk beschermd