Christophle Plantin imprimeur au lecteur vertueux, & debonaire Salut.
AYant par cy deuant imprimé en Latin les Emblesmes du S. Iehan Sambucus, Gentilhomme non seulement docte, mais auec cela autant amy, & pour sa qualité, liberal fauteur de tous ceux qui font profession de quelque art ou discipline liberale que i'en cogneusse iamais; & les ayant faict traduire en langage Flameng, & depuis n'agueres imprimés, ie n'ay voulu faillir de faire le semblable en François; tant pour complaire a ceux qui n'entendent les autres langues, comme pour faire apparoistre que la françoise n'est moins propre a traicter tel argument: & principalement aussi pour declarer l'affection que i'ay de continuer au deuoir de mon office: Lequel i'estime estre, de m'employer constamment & tant qu'il me sera possible & permis, a imprimer telles oeuures que les lecteurs puissent auoir prossict ou recreation honeste en les lisant; & moy quelque moyen de pouuoir entretenir ce bon vouloir en les distribuant. Or ie tiens ceste maniere ici d'escrire Emblesmes, ne deuoir estre mise au dernier reng de telle oeuures: d'autant que; pour les belles & graues sentences morales dont elle consiste; la lecture n'en peu estre sin non vtile; & puis apres delectable pour les figures representantes a l'oeil curieux la substance de chacunne d'icelles. Et si le liure doibt estre d'autant mieux estimé qu'il peut seruir a plus grand nombre de gens, est il (apres la necessité des sainctes escrittures) aucunne sorte de liures qui puisse seruir a plus de gens que ceste cy? Fremierement ceux qui aiment les lettres, ou la lecture de choses bonnes & vtiles a la vie humaine y trouuent en quoy exercer leur industrie, & y profficter en la doctrine des meurs: Les peintres & verriers de quoy remplir, orner, & enrichir leurs toilles, tableaux, parois, & verrieres: les orfebures argentiers, graueurs & autres gens de marteau leurs bagues,
ioyaux, vaisselles, armeures, targes, boucliers, planches & autres leurs ouurages: les entrepreneurs d'edifices, tailleurs, & menuisiers leurs bastiments et menuiseries: les bordeurs, et tapissiers leurs ornements, borderies & tapisseries: & ce auec vne bonne grace, & non moindre contententement du vulgaire ignorant, qui ne cerche en ces choses qu'vne simple recreation de son oeil: comme des plus ingenieux, & mieux aduisés; qui n'approuuent rien de quoy on ne puisse prende instruction, & deuenir tousiours milleur, ou estre conformé en l'exemple de quelque action vertueuse. C'est maintenant a toy, amy lecteur, de feilleter ce liuret, et aduiser s'il y aura chose qui te soit proffitable, & de l'accomoder a ton vsage. Et si d'aduenture tu n'y trouues chose qui te plaise ne t'efforce pas grandement a le blasmer, ni nostre labeur: si ce n'est que tu te veilles trauailler toymesmes en vain. Car quant a moy, ie me suis proposé de persister constamment a mettre en lumiere les oeuures des hommes doctes, sans me laisser couardement alterer pour la crainte du babil, ni reproche qui puissent estre murmurés, semés, ni essayés a l'encontre de nos entreprinses; qui ne furent oncques pensees, commencees ne poursuiuies en autre intention, que pour auancer, si ie pouuois, l'art de l'imprimerie en ces tant nobles païs, & donner soulagement aux amateurs des lettres, auec quelque honneste entretien de nostre famille. Que si peut estre le succés & fin ne respondent heureusement a nostre volonté; & qu'aucuns ne le veillent prendre ainsi, il restra de me consoler auec mes amis & moymesmes; veu qu'il n'aura pas tenu a vn bon courage & diligent trauail, que nos desseings n'ayent sorti leur plain effect; & de prier Dieu qu'il luy plaise nous donner en toute paix a tous l'augmentation de ses graces.
D'Anuers en noster imprimerie ce xxv iour d'Octobre M D LXVI.
Auteursrechtelijk beschermd