De Gulden Passer. Jaargang 60

100. Grammat. Dialect. Rhetor. Historiae differentia.
Ad Carolum Sigonium.

Trois dames toutes trois diuerses en habits

S'appuyent pesamment dessus vne pucelle.
Cella la qui est nue est l'Histoire nouuele
En qui de tous les temps la garde & soing fut mis.

Elle donne l'honneur ensuyuant verité,

A ceux qui ont bien faict ell' n'est point affectee,
Ell' laisse aux suruiuans de la chose passee
Le simple iugement ayant tout racompté.

Derriere elle, se void Rhetorique iasarde

Qui d'une langue heureuse est plaidant les proce's:
En habits coulourez elle faict maints excez,
Et a gaigner tousiours sa cause elle prend garde.

Elle a la maur ouuerte, & si tient vne picque,

A fin de nous monstrer que pressant doucement
Sans contraincte elle prend le plus honnestement,
Ainsi qu'a bien parler tousiours elle s'applicque.

Dialectique apres est assez mal vestue,

Cerchant au fond d'un puits la belle Verité.
Depuis qu'elle a vaincu elle tient fermeté,
Et tousiours iusqu'au bout sa force est maintenue.
Elle poinct, elle lie, & tousiours par raison
Elle conduist son faict: mais toutes ne font gueres
Au proufict des humains, sans auoir la grammaire,
Qui est le fondement de tout leur maison.
L'histoire est comme vn chien ayant au doz des aisles,
Rhetorique est Chimere, & Logique est semblable
Au Sphynx que lon disoit estre vn monstre admirable,
La vierge les soustient, & les rend immortelles.