Haagse liederhandschrift

106. [Ich quam daer ic groet wonder sach]

Ich quam daer ic groet wonder sach,
Hoe eyn ghesinde te velde lach,
Ende al diegene, die daer waren,
Waren cranc ende out van dagen.
Dat dochte mi siin een selsen sake,
Dat si dus lagen buten dake
In den winde ende in den regen,
Daer had sulc vyl lange gelegen,
Dat had mi voerwaer gesaecht.
Ic sprac: "wat heeft u hiertoe bracht?"
Een ghesel uut hare scare
Berichte mi al openbare:
"Wi liggen hijr in crancker vest;
Ghelijc den vogelen sonder nest,
So moeten wi hier onse leven enden.
Du ne salt noch van mi niet wenden,

[fol. 63vb]

 

Ic wilsti wel maken konder,

 

Waerom dit volc ys raste zonder.

 

Hier leget sulc, die heeft verloren

20

Vaste muren ende hoge toren,

 

Scone zael ende kemenaden,

 

Daer hi mit crachte, mit ongenade

 

Ende mit ghewalt is uutgedreven,

 

Ende waer daer gerne binnen bleven.

25

Maer men naem 't hem mit gewelde,

 

Daerom legt hi te velde;

 

Gheen ander huus en heeft hi gheer,

 

Dan ofti mit gerechter weer

 

Mochte dat selve huus gewinnen,

30

Daer hi was te raste binnen.

 

Hier lecht sulc, die bi siere sculde

 

Dicke ende mennichfulde

 

Heeft ghetymmert hier ende daer,

 

Ende heeft daermede siin have welnaer

35

Al vertemmert in onbederve.

 

Hier leghet sulc, die twintechwerven

 

Ghetymmert heeft ten dake toe,

 

Ende emmer liet hij 't staen also;

 

Ende om die wonderlike lost

40

Leget hi hier al sonder rast.

 

Sulc heeft die wint terneder

 

Gheworpen 't sine, so dat hi weder

 

Ghetymmeren niet wel en kan,

 

Ende leget als een elendich man.

45

Sul[c] heeft die brant benomen

 

Raeste, daer hi in was comen;

 

Had hi wel voer hem gesien,

 

Het en ware hem niet gescien.

 

Sulc heeft getymmert opten gronde,

50

Die's verdragen niet en konde,

 

Sodat hem 't fondament ontsanc;

 

Doe wert 'tghetymmert also cranc,

 

Dattet brac ende vallen moest;

 

Dus is siin woninge werden woest.

55

Sulc heeft bedevaert gevaren,

[fol. 64ra]

 

Als hi soude siin huus bewaren;

 

Hi had vele bat t'huus gebleven,

 

Want ander liede hebben't gecregen,

 

Zo dat sij's gheweldich sijn."

60

Ic sprac: "waener verloerstu 't dijn?

 

Hi antwoerde mit sachten sinne:

 

"Ic liet staen al sonder hoede.

 

Hier leget oec in desen parre,

 

Die ghetymmert heeft so verre

65

In vianden lant, dat hi ne mach

 

Daer niet geduren eenen dach.

 

Zul[c] heeft bi heerendienst versuumt,

 

Dat hi siin woninge heeft geruumt,

 

So datter hi ongeweldich si.

70

Sulc ander man die leget hier bi

 

Op dit velt, in desen ellende,

 

Die nie huus gemaect en kende,

 

Ende mennich, die (hie) hiir leget toe.

 

Van desen ghesellen keerdic doe,

75

Ic dacht, het mocht wel wesen waer;

 

Dus reet ic wech, si bleven daer.

 

Die vrolich leeft, hi houde vast,

 

So ne wert hi niet ellendich gast.

 

 

 

Explicit.