¶ Hir heuet sik an een boek vnde heth in deme dudeschen de historia van den souen wysen meisteren.:.
Vmme to wetende myt korte wat in dusseme boke is schal me merken, dat in dusseme boke werden geroret waraftige historien, de ghescheen sin in vor tijden. vnde werden vth ghelecht to eneme ghestlyken synne, vns dar mede van den sunden to thende, vnde to beterende vnse sundige leuent. ¶. To dem ersten van deme keysere Ponciano, de hadde enen sone geheten Dyoclesianus. den wolde syn steefmoder to deme dode bryngen, darumme dat he nycht myt eer sundigen wolde. men syne. vij wijse meystere verloseden ene. vnde to deme latesten wart se suluen verbrand myt erem hemelyken bolen, den se vor ene iuncfrouwe by sick hadde. Dusse historia wert na ghestliken ghedudet, als me vyndet in deme boke. ¶ Daer na vyndet me mannigerleye historien. ock ghedudet to eneme ghestlyken synne.:.
Auteursrechtvrij