De historia van den souen wysen meisteren

wo de keiser vor rome licht vnde der meistere steit een vp deme torne mit vlogelen vnde hadde twe swerde.

DAr na quam de konynck vor rome, vnde wolde synen vorsat vul voren. To den ti-

[fol. 23r]

den weren ock souen wyse meystere to Rome als den iuwen. To den queemen de Romere, vnde reepen se an vmme hulpe. De meyster nam islick enen dach vor sik, vnde voren yegen den konynck, vnde myt wysen reden heelden se den konynck vp. Do yd nu quam an den echtersten meyster. de sprack to den Romeren. Morgen so make ick den konynck vluchtich. dar na sy gy ghenesen. Vnde also de konink des morgens wolde stormen an de stat. De meyster hadde sik mit pawen vedderen vmme stycket, vnde makede sick em twe vlogele, vnde nam twe blote sweerde in de hant vnde gynck vp enen hogen torne, vnde wegede vaste myt den sweerden. Do dat de konyngk sach vnde syn volck. Se spreken, dat is der cristen goth, vnde wyl wedder de romere vechten vnde wedder vns, laet vns vleen. Do voren en de Romere na, vnde doden den konynck vnde alle syn volk. Do sprack de keyserynne. hebbe gy my wol verstan. So merket twe bose dynck van deme marschalke, den de konyngk vth deme lande dreff. Also schole gy iuwem bozen sone doen. Io doch so verbeedet em dat lant, anders ick en weerde nummer rowych an mynem herten. Seet ok, dat gy nicht werden bedrogen van den wysen als de konink dat leuent verloes. morgen moet he steruen