De historia van den souen wysen meisteren

wo de keyserinne kumpt mit alle eren iuncfrouwen iegenwardich:

DE keyser heth eer dat se sik moste bloten do was se een knape vnde was ere bole, vnde hadde also vrouwen cledere ane, vnde so dreff de vrouwe moet wyllen myt em. De keyser heth de keyserynne myt ereme bolen verbernen. De iungelynck seede. here vader, gheuet neen ordel ouer se, eer ick dat betuget hebbe, dat se my valschliken heft ouer lagen. De keyser sede, dat gherichte sy dyn. Neen vader, id en schal noch iuwe noch myn syn men dat gesette schal an eer vervullet werden, vnde hoff vp vnde sede, wo de meystere dat gesternte hadden an gheseen, do he na em sande van bede wegen der keyserynnen, vnde wo he vnde sine meystere seghen, queeme vp de suluen tijt, so moste he enes quaden dodes

[fol. 30v]

steruen. Id en were dan dat he souen dage vngespraken bleue. vnde sede en wo ene de keyserynne hadde ghereyset, vnde wo se sick suluen to reeten hadde vnde sik bloetvar gemaket hadde vnder eren egenen oghen, do he eer des nicht doen en wolde. Do he dyt alle gesecht hadde. Do vyl de keyserinne vor den keiser vnde bath gnade. De keyser sprack. Du hefst ghedaen myt dynem bolen, dat du my vertornest. bauen dat alle so woldestu myt mynem sone de bosheyt ock hebben vullenbracht. Ock so hefstu my dach vnde nacht angheuochten dat ik mynen sone scholde doden. De ghesette scholen dy gnade doen, also du entschulden hest. dar en is nene gnade to. wente hadde ick mynen sone gedodet vmme dynen wyllen. so were my ghescheen also my de meystere seden. De zone sprack. Neen here vader, gy scholen iw nycht an eer veruaen. wente dat ick na der wyse also myne meystere hebben ghedaen ok een exempel segge. De keyser sprack. Geseghent sy de stunde in der du gebaren wordest, vnde ghelauet sy de almechtige god, dat ik dy by myneme leuende schal horen also wijslyken reden. Darumme so segge an vnde vervrouwe myn herte, dat in souen dagen so vele drofnisse geleden heft.