Historie van Hughe van Bordeus

¶ Hoe hughe te roomen hem biechte teghen den prochiaen.

ALs hughe met sinen ridders lange weghen gereyst hadde so is hi te Rome ghecomen daer hy hem tegen den prochiaen ootmoedelick gebiecht heeft ende hoe hi coninc karels sone charlot onwetelijc verslagen hadde, ende hoe hi in eenen campe verslaghen hadde den

[fol. 13a(D)]

verrader amorijs, ende so vertelde hughe den paus sijn auontueren ende seyde. Al heb ic den campe met eeren geslaghen ende ghewonnen dat en is den coninc noch niet genoech, hi en versendet mi te babilonien totten soudaen gaudijs, ende ic moet hem eysschen thaer wt sinen baerde ghepluct, ende zijn .iiij. hoec tanden achter wt sinen mont. Doe seyde de paus dat is veel voor eenen edelen, mer ic gheue v aflaet van al uwen sonden, op auontuere of ghi verslagen bleeft dat ghi door gods ontfermen muecht behouden bliuen. Ende huge heeft ootmoedelic die benedictie van den paus ontfangen, ende is so met sinen .x ridders van romen ghereyst menighe lange passagie tot dat si in die stat van brandijs quamen daer si wel ontfangen waren, daer si goet chier maecten wt goeder herten, hopende dat god alle dingen wel ordineren soude. Des anderen daghes ghinc huge op die hauene om na eenen scipper te sien. So vant hi eenen man staen op de hauene seer rijckelijc ghecleet met siden laken ende met costelijcken sabels gheuoeyert. So dochte hugen wel dattet een edelman was, ende hi seyde tot hem, weest ghegruet wel edelhere, uwe edelheyt is mi onbekent ic en weet niet wat uwe grootheyt is. O vrient seyde die edelman bi onsen apollijn ic heb geweest in veel steden ende landen, maer nv ben ic een meester van een groot schip den drachmon geheeten, daer en is int lant gheen so groot, het heeft dicwil ter zee geweest Als hughe desen man dus hoorde spreken so was hi verblijt ende seyde, heere ghi weet seer wel francoys te spreken. met uwen oorlof van waer sidy doch geboren. Doen seyde dye heere, om dat ghijt vraghet so sal ic v seggen die waerheyt. Ick ben gheboren in vrancrijck. Mijn

[fol. 13b]

broeder was hertoghe Sanguijn, dye had .ij. sonen, die een hiet huge ende die ander gheraert dat zijn beyde mijn neuen, ende ic selue heete geerwijn. Doe seyde hughe O lieue oom so moet ghi willecome sijn. Als dat Geerwijn hoorde seyde hi blijdelijc wel moet ghi comen zijn mijn neue, ende hy greep hem in sinen armen ende custe hem aen zijn wanghen ende seyde waer wildi reysen wel edel neue. Doen antwoorde hughe Coninc karel van vranrijc heeft mi ghesonden tot den amirael Gaudijs van babilonien, om dat ick buyten minen weten hebbe verslaghen sinen sone charlot. Doe seyde heer gheerwijn. Lieue neue hebt goeden moet maer betrout op god hi heeft meenighen man wt sinen laste verlost Ende mijn scip den dragmondt salic wel laten bereiden ende sal hem wel doen uoorsien van spijse van drincken, ende van alles dat wi behoeuen sullen, ende ic en sal van v nyet scheyden in gheenderley manieren noch in eenighen nootsaken.