Roman van Lancelot

(1846-1849)–Anoniem Lanceloet– rechtenstatus

naar het (eenig-bekende) handschrift der Koninklijke Bibliotheek


IX. Vanden vogle dien Bohort sach, ende hoe hi vacht jegen Briadanne. Alse Bohort was, horic tellen, 6410[regelnummer] Gesceden van sinen gesellen, Hi reet al toter nonen toe, Ende hi achterhaelde doe Een ouden man, die een esel reet, Met clederen van religione gecleet. 6415[regelnummer] Hine hadde geselle negene, No knape, ende hi reet allene. Bohort ontboet hem goeden dach; Ende alse hi Bohorde sach Hi ward te hant geware das, 6420[regelnummer] Dat hi wandelende ridder was. Hi hitene willecome wesen. Bohort vrachde hem na desen: Wanen hi allene quam doe? Die goede man antwerde daertoe: 6425[regelnummer] ‘Ic come van enen minen seriant, Dien ic siec nu ter wilen vant Van ongemake dat hem deert; Ende ic hebbene gevisenteert; Ende hi was [met] mi gewone 6430[regelnummer] Te gane, daer ic hadde te doene.’ Die goede man seide: ‘Wie sidi?’ - ‘Ic ben een riddere,’ antwerde hi, ‘Ende hebbe ene queste bestaen, Daer ic wel af wilde, sonder waen, 6435[regelnummer] Dat mi beriede God onse here; Hets die hogeste die noit ere Begonnen was, wetic wale: Hets die queste vanden grale; Bedie die gene diet sal vinden, 6440[regelnummer] Onse here die sal heme sinden Alse vele eren op enen dach Alse herte wel gepensen mach.’ Hi seide: ‘Gi segt waer van desen: Hi sal die gecroenste riddere wesen, 6445[regelnummer] Ende die warechste van allen Die in die queste nu sijn gevallen. Hine quamer niet in met sonden Besmet alse sijn nu ten stonden Die ongetrouwe sondaren, 6450[regelnummer] Die in die queste sijn gevaren Sonder te verbeterne haer leven. Die queste dire op es geheven Es Gode te diennen, sonder waen. Hierbi mogedi wel verstaen 6455[regelnummer] Dat si doen grote dulhede. Si weten wel ende horen mede Datmen hen seget alden dach, Dat nieman te hemele comen mach, Het ne si dat hi hem berecke, 6460[regelnummer] Ende sine sonden niet en decke, Met biechten: sonder bi desen En mach nieman gesuverd wesen, Bedie men mach altehant Daer mede verjagen den viant. 6465[regelnummer] Alse die minsce doet hoeftsonde Hi ontfaet den viant ter stonde, Ende als hire in hevet geslegen, Des die liede te vele plegen, Ende hi te biechten gaet, 6470[regelnummer] Ende sine penitentie ontfaet, Hi jaecht dan ute alte hant Den quaden geest, den viant, Ende herberget dan onsen here, Daer hi af ne comet nembermere.’ 6475[regelnummer] Hi bat Bohorde alsoe houde, Dat hi met hem herbergen soude, Ende hi voer met hem na die dinc, Daer hine herde wel ontfinc; Maer hine gaf hem niet, suldi weten, 6480[regelnummer] Els dan borre ende broet eten, Ende seide, dat ridders di wouden Gode dinen, eten souden Selke spise, niet grote spisen Die de ridders ten sonden wisen. 6485[regelnummer] - ‘Nu biddic u,’ sprac di goede man, ‘Dat gi gene spise et vort an Dat borre ende broet, tot dien, Dat gi dat grael hebt gesien.’ - ‘Wat wetti,’ seide Bohort doe, 6490[regelnummer] ‘Ofter mi staet te comene toe?’ Die goede man seide daer nare, Dat hi des wel seker ware, Dat hi een soude wesen van drien, Die dat geluc soude gescien, 6495[regelnummer] Dat si dat grael vinden souden. - ‘Ic sal mi dan also houden,’ Seide Bohort toten goeden man, ‘Dat ic niet els sal eten vort an Dan borre ende broet, toter stonden 6500[regelnummer] Dat wi dat grael hebben vonden.’ Des anderdages alsi op was gestaen Quam die goede man tot Bohorde saen, Die hem enen witten roc gaf, Ende dede hem sijn hemde doen af, 6505[regelnummer] Ende dat hi dien roc drage Naest sire huut alle dage. Ende hi dede den roc an daer Ende ginc in die capelle daernaer, Ende seinde hem, ende ginc tien stonden 6510[regelnummer] Te biechten van al sinen sonden
[pagina 45]
Toten goeden man, di wonderde das, Dat hi van so goeden levene was. Alse messe geseit hadde die goede man Hi gaf hem onsen here dan, 6515[regelnummer] Dien hi met devotie ontfinc; Ende hi nam orlof na die dinc. Bohort sciet van hem tier steden Omtrent none, ende quam gereden Daer een groet vogel boven hem vloech doe. 6520[regelnummer] Alsi lange gevlogen hadde soe Beetti op enen boem daer naer, Daert droge was, ende ginc staen daer. Die boem daer die vogel op stont Was sonder loef ende blat tier stont: 6525[regelnummer] Ende die vogel hadde gevest Op dien boem enen nest, Daer in waren cleine vogelkine; Dat waren sijns selfs jonskine. Ende hi sat op sine jonge te hant, 6530[regelnummer] Die hi allegadere doet vant. Hi wonde hem selven sonder vorst Met sinen becke in sine borst, Ende dat bloet liep ut sinen wonden, Ende die dode jonge tien stonden 6535[regelnummer] Ontfingen allegadere dleven Alsi dat bloet hadden beseven; Ende hi starf selve mettien. Ende alse Bohort dat hadde gesien, Hem hadde wonder van desen, 6540[regelnummer] Wat tekene het mochte wesen. Hi voer van danen, daer hi vant Enen starken tor te hant. Doen voer hi herbergen daer binnen, Daer hi was ontfaen met minnen. 6545[regelnummer] Hi vant ene joncfrouwe daer, Die scone was ende oppenbaer; Maer van clederen was si doe Harde armelike berect alsoe. Savons alsi waren geseten 6550[regelnummer] Tere tafelen ombe eten, Daer bider joncfrouwen sat Bohort, Daer waren gerechten bracht vort Van herten, dat men eten soude. Bohort werd bepenst also houde, 6555[regelnummer] Dat hi eten soude borne ende broet, Soe dat hi water ontboet Ende maecter soppen in daer nare. Als die joncfrouwe des ward geware Si bat Bohorde alsoe houde, 6560[regelnummer] Dat hi ander spise eten soude. Hi seide: hine ate binnen den dage Ander spise dan si sage. Sine wilde jegen sinen wille Nemmeer secgen ende bleef stille. 6565[regelnummer] Daerna alsmen hadde geten Was si bi Bohorde geseten, Daer si van messeliken saken Onderlinge beide spraken. Daer quam een knape in gegaen, 6570[regelnummer] Die toter vrouwen seide saen: ‘Vrouwe, het gaet qualike met u; U suster heeft gewonnen nu Twee uwer bestere castele, Ende daer in verslagen vele, 6575[regelnummer] Ja, ende alle dire in waren. Ende mochtse, si soude u sonder sparen Onterven van al uwen goede, Gine sijts in sulker hoede, Dat gi vor margen primetijt 6580[regelnummer] Van enen riddere vorsien sijt, Die u wille vor hare verrechten Ende jegen Briadanne den swerten vechten, Die vanden goede es here.’ Die vrouwe ward wenende sere 6585[regelnummer] Ende seide wel droeffelike: ‘Soete here van hemelrike, Waeromme lietti enech lant Oyt comen in mine hant, Ende ic nu dat selve lant sal 6590[regelnummer] Sonder redene verlisen al!’ Bohort vragede daer nare Der vrouwen wat hare ware? Ende si antwerde alsoe houde, Dat sijt hem gerne secgen soude: 6595[regelnummer] ‘Hets waer, dat hilt dit lant Die coninc Amans in sine hant, Ende anders lants vele daertoe, Soedat hi ene vrowe minde doe, Die ouder was dan ic bem. 6600[regelnummer] Dien tijt dat si was omtrent hem Gaf hi hare in haren handen Die macht van lieden ende van landen; Ende si hief op sonder sparen Costumen die niet goet en waren, 6605[regelnummer] Ende die jegen recht waren mede, Ende daer bi si sterven dede Vele van des conincs lieden, Die daden doe al haer gebieden; Soe datse die coninc nam hare 6610[regelnummer] Alsi daer af wiste dat ware, Ende hi gaf mi in handen Al di macht van sinen landen. Ende sider dattie coninc starf Heeft si mi gedaen menechwarf 6615[regelnummer] In minen lande scade groet, Ende mine liede geslegen doet, Ende wilt mi onterven toe, En si dat ic daer toe gedoe, Dat mi enech riddere berechte 6620[regelnummer] Ende jegen Briadanne vechte.’ Doe vragede Bohort hare, Wie dat die Briadan ware? - ‘Het es een ontsien man, here, Ende van groter starcheit sere.’ 6625[regelnummer] Bohord seide: ‘Soe ombiet dan Uwer suster, dat gi enen man Hebt vonden, die die bataelge Over u wille doen, sonder faelge.’ Die vrouwe seide doe harde blide: 6630[regelnummer] ‘Gi quamt mi hier ter goeder tide, Die mi sulc beheet hebt gedaen, Dat gi mi wilt in staden staen. Nu moet u God van hemelrike Daer toe hulpen, alse gewaerlike 6635[regelnummer] Alse dat onrecht es hare!’ - ‘Nu ne sijt in vare,’ Seide Behort, ‘alse lange stont Alsic gans ben ende gesont.’ Si ontboet haerre suster also houde, 6640[regelnummer] Dat si opten naesten dach hebben soude Enen riddere te primetide, Die wille comen te stride, Te vechtene jegen Briadanne, Alsoe alse die manne 6645[regelnummer] Wisen souden vanden lande. Daer was die camp besproken thande. Dien nacht was Bohorde gedaen Grote ere daer binnen, sonder, waen; Ende als hi in die camere quam, 6650[regelnummer] Een rikelijc bedde hi vernam. Ende hi deetse alle gemene Ute gaen ende bleef allene, Ende dede daer sine bedinge, Ende ginc licgen na die dinge 6655[regelnummer] Optie eerde, ende leide sijn hoeft Op enen coffer, dies geloeft, Ende bat den here van hemelrike, Dat hi hem holpe alse gewaerlike Alse hi om gerechtechede 6660[regelnummer] Te vechtene ende om getrouwechede
[pagina 46]
Den camp hadde onderstaen daer; Ende hi ward in slape daer naer. Daer hi in sinen slape lach Dochtem dat hi vor hem sach 6665[regelnummer] Twee vogle; ende van desen Dochte hem deen al wit wesen, Ende hadde rechte die gedane Na gelike van enen swane. Die ander was sward wonderlike, 6670[regelnummer] Ende ere crayen gelike; Ende hi was na sire swarthede Utermatene scone mede. Die witte vogel seide: ‘Wilstu mi Dinen ic soude geven di 6675[regelnummer] Alt goet vander werelt te lone, Ende ic soude di maken also scone Alsic selve nu ter wilen bem.’ - ‘Wie sedi? “seide Bohort te hem. Ne siestu niet wie ic bem?” seidi, 6680[regelnummer] Ic ben wit ende scone, secgic di, Ende scoenre dan du waens.’ Ende Bohort Ne antwerde niet een wort, Ende die vogel sciet van hem daer naer. Doe seide die swarte vogel daer: 6685[regelnummer] ‘Du moets mi margen dinen,’ seidi; ‘Ende hebt niet die swertheit van mi Onward; al benic sward, mine swarthede Es beter dan eens anders withede.’ Mettien heeft hisc beide verloren. 6690[regelnummer] Doe quam hem een ander dinc te voren: Hi quam in een groet huus, dat hem dochte Dat wel eene capelle wesen mochte, Daer hi vant sittende enen man Op enen setel, die hadde dan 6695[regelnummer] Een verrot stic houts ter rechter side, Dat soe cranc was tier tide, Dat met pinen mochte gestaen. Ter luchter siden haddi, sonder waen, Twee lylien, daer die ene hare 6700[regelnummer] Der andere hilt harde nare, Daer elc anderen tier stede Af wilde nemen haer withede; Maer dattie goede man benam Dattie ene ane die andere nine quam; 6705[regelnummer] Soe dat quamen onlange daer naer Van beiden den lylien daer Bloesel, daer elc vort brochte Vrucht te vollen, alsem dochte. Alse dit was sprac tot Bohorde 6710[regelnummer] Die goede man dese worde: ‘Ne ware niet dul, di lite comen Te bedroeffenessen dese blomen Om te bescermene dit hout Van vallen, dat verrot es ende out?’ 6715[regelnummer] - ‘Ja hi,’ antwerde Bohort doe, ‘Want verrot hout doech nieweren toe, Ende die blomen sijn vele mere Scoenre dan ic waende ere.’ - ‘Nu wachti,’ seide die goede man, 6720[regelnummer] ‘Ofti sulke aventuren comen an, Dattu niet en laets bederven Die blomen te gere werven, Om te hulpene daer bi Den houte dat verrot si; bedi 6725[regelnummer] Comtere te grote hitte an, Dat hout bedervet tehant dan.’ Bohort seide dat hi wel omt gone Gedinken soude, waers te doene. Ende hi hadde groet wonder van dien 6730[regelnummer] Visionen, die hi hadde gesien, Ende si swaerdene daer soe sere, Hine mochte slapen nembermere. Hi seinde hem ende ontbeide te dien Dat hi den dach mochte gesien. 6735[regelnummer] Ende als hi den dach gesach Stont hi op van daer hi lach, Ende ginc opt bedde liegen doe, Dat nieman soude wanen dat hi soe Al dien nacht hadde gelegen daer. 6740[regelnummer] Die vrouwe quam tot hem daer naer, Ende leide tere capellen Bohorde, Daer hi den dienst vanden dage horde. Alse dat was gedaen bat si Dat hi en lettel ate daer bi 6745[regelnummer] Hi soude te sekerre wesen. Bohort antwerde te desen, Dat hi nine ate, sonder faelge, Eer hi gedaen hadde di bataelge. Daerna quamen die kimpen beide 6750[regelnummer] In enen mersch wel gereide. Men dede die liede sceden daer, Entie ridders onderreden hen daer naer. Si reden al dat si mochten, Soe dat si elc anderen gerochten. 6755[regelnummer] Aldus si hen daer onderstaken, Dat haerre beider scilde braken, Entie halsberge scorden toe; En waren di speren niet tebroken doe, Si waren bleven beide doet. 6760[regelnummer] Dat gemoet was so fier ende so goet, Ende si onderhurten hen so heerde, Dat si beide vielen ter eerde. Si sprongen beide op ter vart, Ende elkerlijc trac sijn sward, 6765[regelnummer] Ende slogen soe ende staken, Dattie scilde te sticken braken. Bohort vant an hem merre were Dan hi hadde gewaent ere; Maer hi wiste wel dat hi int recht was, 6770[regelnummer] Ende was vele te sekerre das. Hi begonste hem decken daer naer, Ende liet den anderen op hem slaen daer Grote slage, daer hi mede Hem selven vermoyde daer ter stede: 6775[regelnummer] Als hi gedoecht hadde gnoech, Ende dander sinen adem hoge droech Begonste Bohort dapperlike Op hem lopen, ende dier gelike Oft hi noit binnen dien dage 6780[regelnummer] Hadde geslegen enege slage; Ende berechtene soe onsochte, Dat hi hem niet verweren mochte. Alse Bohort dat hadde vorsien Hi lach hem vaste an mettien, 6785[regelnummer] Embertoe ilanc soe mere, Ende dedene tonder soe sere, Dat hi vor sine vote vel daer. Hi troc hem den helm of daer naer Ende slogene metten apple vanden swaerde 6790[regelnummer] Dat hi daer af bloetde haerde, Ende seide hi soudene doet slaen, Hine liede verwonnen saen. Hi seide doe hi tswaerd sach bloet: ‘Om Gode, en slaet mi niet doet, 6795[regelnummer] Ic sekere u hier ende swere, Dat ic die vrouwe nembermere Orlogen ne sal na desen.’, Ende Bohort liet sijn slaen doen wesen. Ende alse die ander vrouwe sach 6800[regelnummer] Dat hare kempe verwonnen lach, Si waende onteert sijn ende vloe. Ende alst Bohort sach alsoe, Hi seide toten genen daer nare, Diet lant hadden gehouden van hare, 6805[regelnummer] Hi soutse alte onteren te hant, Sine ontfingen van hare haer lant Te hans, vander jonger vrouwen dan, Ende worden daer af hare man. Die daer niet wilden doen alsoe 6810[regelnummer] Waren uten lande gejaget doe.
[pagina 47]
Alse Bohort der vrouwen viande Tonder gedaen hadde inden lande Hi voer wech sere pensende vandien Dat hi in sinen droem hadde gesien, 6815[regelnummer] Soe dat hi tenen wegescede quam Daer hi twee gewapende ridders vernam, Die leitden sinen broder doe Lyonele, daer hi sach al toe, Op een groet starc ors tien stonden, 6820[regelnummer] Sine hande op sine borst gebonden, In sijn hemde ende broec al naect, Met dorninen roeden sere mesmaect, Dat hem dbloet te hondert steden Neder liep van sinen leden. 6825[regelnummer] Ende hi gedoget embertoe vort, Sonder te sprekene enech wort, Al die slage diemen hem gaf, Oft hire niet gevoelt hadde af. Alse Bohort des geware ward 6830[regelnummer] Ende hi soude varen derward, Ende sinen broder soude bescarmen Hort hi lude ropen: ‘Wacharmen!’ Ene joncfrouwe, die hadde groten vaer, Die een riddere brachte gevord daer. 6835[regelnummer] Ende alsi Bohorde ward geware Si pensde doe dat hi ware Vander queste, ende si riep sere: ‘Ic mane u, riddere, live here, Bider trouwen die gi sculdech sijt 6840[regelnummer] Hem, dies man gi sijt nu ter tijt, Dat gi mi hulpt ofte gi moget, Ende dat gi niet en gedoget Dat mi dese riddere nu vercrachte, Die mi wech vort met machte.’ 6845[regelnummer] Bohort ward soe teberenteert saen, Hine wiste wat irst anegaen; Bedie lite hi sinen broder daer Alsoe wech voren, hi hadde vaer Dat hine vord na dien dage 6850[regelnummer] Nembermer gesont ne sage, Dat hem sere soude rouwen; Ende en holp hi niet der joncfrouwen, Si verlore hare suverhede Ende worde onteert daer mede 6855[regelnummer] Bi fauten van hem; ende alte handen Hief hi op daer sine handen Ende seide doe oetmodelike: ‘Ay soete here van hemelrike, Wies man ic ben, ic bidde u, 6860[regelnummer] Dat gi minen broder bescermt nu, Die die twee ridderen hebben bestaen, Dat sine niet te doet ne slaen.’ Alse die riddere dat gehorde, Hi rechte hem jegen Behorde, 6865[regelnummer] Ende hi trac te hant sijn swaerd; Ende Bohort quam met snelre vard Ende dede hem groet ongemac; Want hine dorden lichame stac, Dat hi moeste vallen daer. 6870[regelnummer] Bohort seide toter joncfrouwen daer naer: ‘Gi sijt van desen verloest nu; Wat wildi dat ic vort doe dor u?’ - ‘Leitmi,’ seitsi, ‘biddic u sere Daer mi dese riddere nam ere.’ 6875[regelnummer] Hi seide: ‘Ic saelt doen alsoe;’ Ende nam des gewons ridders pert doe, Ende settese daer op also houde Ende voretse daer si wesen woude. Ende si seide tot Bohorde saen: 6880[regelnummer] ‘Here gi hebt meer baten gedaen Dan gi waent, mettien dat gi Dus hebt hier bescermt mi. Haddi mi ontfoert, het soude dan Metten live becocht hebben menech man.’ 6885[regelnummer] Bohort vragede hare na desen Wie die riddere hadde gewesen? Si seide: ‘Hi es min rechtswere; Ende in can geweten, here, Hone die viant brachte daer toe, 6890[regelnummer] Dat hi mi woude vercrachten alsoe. Ende hi sal onteert daer bi wesen, Dat hijt heeft gedaen in desen.’ Binnen dat si spraken al dare Quamen daer .xij. ridders gevaren, 6895[regelnummer] Die blide waren tien stonden, Dat si die joncfrouwe daer vonden, Ende festeerdense doe sere. Si seide: ‘Festeert desen here; Want min neve hadde onteert mi, 6900[regelnummer] En hadde God gedaen ende hi.’ Si noedenne te vaerne met hen. Hi antwerde: ‘God weet, ic ben Soe onmotech, dat ic mach niet Bliven, soe wat mins gesciet, 6905[regelnummer] Mi lagere an te groet verlies. Ne laet u niet vernoien dies, Dat ic niet en blive met u. Ic bleve gerne, mochtic, nu; Maer ic mochter an verlisen so sere, 6910[regelnummer] Het soude mi rouwen embermere.’ Als hijt hen ontseide soe sere Si bevaelne doe onsen here; Ende Bohort keerde na dien Daer hi sinen broder hadde gesien 6915[regelnummer] Die ridders leiden daer te voren: Hine mochter niet af verhoren; Soe dat hi gemoette in dien doene Enen man, die sceen van religione, Die gereden quam een sward part. 6920[regelnummer] Als hi Bohorde geware ward Hi seide: ‘Her riddere, wat soecti?’ - ‘Ic soeke minen broder,’ seide hi, ‘Dien ic sach twee ridders heden Met roden blouwen ende leden.’ 6925[regelnummer] Die man seide: ‘Bohort, en waendic u Alte drove niet maken nu, Ic soudene hier u togen saen.’ Alse Bohort dat hadde verstaen Hi pensde dat hi doet ware, 6930[regelnummer] Ende weende, ende seide daer nare: ‘Ay lieve here, oft hi doet si, Ic biddu dat gine wiset mi: Ic salne mi pinen ter eerden te doene Gelijc dat betaemt eens conincs sone.’ 6935[regelnummer] Hi seide doe: ‘Siettene daer!’ Bohort vant licgende daer naer Enen lichame di verslagen was Neuwinge; ende hem dochte das, Dat sijn broeder was; ende daer bi 6940[regelnummer] Ward hi te hant soe drove, dat hi In onmacht ter eerden sanc, Ende daerin bleef liegende lanc. Alsi spreken mochte hi seide saen: ‘Ay live broder, wie heeft dit gedaen? 6945[regelnummer] Nune werdic blide nembermere, Enne si dat mi die here Vertroeste, die es gewone Te vertroestene alle die gone In hare noet, in hare pine, 6950[regelnummer] Daer si in gepijnt plegen te sire. Live broder, nadat van ons beden Dat geselscap es gesceden, Soe bevelic dan onsen here Mijn meester te sine mere, 6955[regelnummer] Ende behoedere in allen vresen. In hebbe nu meer na desen Te pensene om dinc ne gene Dan om mine ziele allene!’ Ende hi leide den lichame werde 6960[regelnummer] Opten hals van sinen perde;
[pagina 48]
Ende hi vrachde oft daer ieweren nare Capelle oft kerchof ware, Daer hi sinen broder ter eerde Doen mochte na sine begeerde? 6965[regelnummer] Die man leidene daer si quamen Daer si enen groten tor vernamen, Daer ene kerke vore stont, Die out ende woeste was ter stont. Het sceen ene capelle wesen. 6970[regelnummer] Si namen den lichame na desen Ende dadene op ene tomme staen. Bohort liep al omtrent saen, Ende hi ne vant te gere stede Cruce no wiwater mede, 6975[regelnummer] Noch teken dat Gode toe behorde. Die man seide tote Bohorde: ‘Laet ons varen herbergen tramere Inden tor hier vore, here. Margen alsic hier gekert bem 6980[regelnummer] Salic messe doen over hem.’ Bohort seide: ‘Sidi pries tere dan?’ - ‘Jaic,’ antwerde hem die man. - ‘Berecht mi dan, ic bids u van Dat ic in enen droem hebbe gesien, 6985[regelnummer] Ende van anderen saken, des biddic u, Daer ic in twivele af ben nu.’ Doe seidi vanden vogle voren Toten man, diet gerne wilde horen, Dien hi int forest hadde gesien. 6990[regelnummer] Ende hi telde hem van dien Voglen, dat daer af die een Wit entie ander sward sceen, Ende vanden verrotten houte doe, Ende vanden tween blomen daertoe. 6995[regelnummer] - ‘Een deel sal te nacht,’ seide hi, ‘Van desen dingen gevallen di, Ende een ander deel morgen den dach, Na dien dat ic di secgen mach. Die vogel die di sprac ane 7000[regelnummer] In gelike van enen swane, Dat betekent ene joncfrouwe Die di mint met goeder trouwe, Ende sal di versoeken cortelike Van minnen herde vriendelike. 7005[regelnummer] Ende wederseitstu hare, si sal saen Van rouwen sterven, sonder waen. Die swarte vogel bediet die sonden Die du sout doen tien stonden Dattu hare suls ontsecgen 7010[regelnummer] Dat si di te voren sal lecgen; Want om vrese van Gode,’ seide hi ‘Noch bi dogeden die es in di Sone sulstu, lude no stille, Niet laten te doene haren wille; 7015[regelnummer] Maer du sulles daer ombe laten al, Om datmen di suver heten sal, Ende dattu oec suis daer of Willen hebben der werelt lof. Ende daer sal groet quaet af gescien. 7020[regelnummer] Lanceloet sal sterven bi dien, Bedie der joncfrouwen mage Sullen doet slaen, sonder sage; Ende du suls van beiden bi desen In derre maniren manslecht wesen 7025[regelnummer] Alstu oec best van dinen broder, Dijns vader kint ende dire moder, Dien du sages in groter noet, Ende liettene nochtan slaen te doet Om te bescermene tier stont 7030[regelnummer] Ene joncfrouwe, die di nine bestont. Nu merc in di selven van desen Welc merre scade hadde gewesen, Dat heden der joncfrouwen ware Haer suverheit genomen dare, 7035[regelnummer] Soe dat dijn broder nu es doet, Die van vromecheiden wel was genoet Den besten riddere van ertrike. Het ware beter, sekerlike, Dat alle die joncfrouwen van desen 7040[regelnummer] Lande ontsuvert hadden gewesen.’ Alse Bohort des mans worde verstoet, Die hi hilt over waerrechtech ende goet, Hine wiste wat doen; ende die man Sprac aldus Bohorde an: 7045[regelnummer] ‘Du heves vanden drome gehort: Besie wel, nu staet an di vort Lanceloets leven ende sine doet.’ Bohort antwerde heme al bloet: ‘En es gene dinc, in soutse bestaen 7050[regelnummer] Eric Lancelote liete doet slaen.’ Hi seide: ‘Dat soutu saen sien.’ Hi leitdene inden tor na dien, Daer hi ridders ende joncfrouwen vant, Dine alle wel onthaelden te hant. 7055[regelnummer] Ende alse hi ontwapent was Si daden hem bringen, sijt seker das, Enen diren mantel ende rike, Ende dadene sitten chierlike; Ende si daden hem feeste so groet, 7060[regelnummer] Dat hi den rouwe van sijns broder doet In enen groten dele vergat bi dien. Mettien heeft hi ene joncfrouwe gesien, Die hem soe scone wesen dochte, Dat gene scoenre wesen mochte 7065[regelnummer] Ende chierliker gecleet daer toe. Een riddere seide tot hem doe: ‘Siet hier ene joncfrouwe comen nu, Daer wi mede sijn, secgic u, Die de scoenste vander werelt es, 7070[regelnummer] Entie rijeste, des sijt gewes, Ende die u gemint heeft mere Dan enege dede noit ere; Ende noit doen wilde in haren sinne Anders mans dan uwe minne;’ 7075[regelnummer] Soe dat hem tescoffirde Bohort Alsi horde des ridders wort. Hi grotese, ende si hem weder, Ende si saten beide gader neder, Soe dat si van messeliken saken 7080[regelnummer] Onderlinge beide spraken; Ende si versochtene van minnen dan, Want si mindene boven alle man; Ende wilde hi met allen sinne Hare geven sine minne, 7085[regelnummer] Si souden maken cortelike Den rijesten man van ertrike. Bohort was tescoffirt daer mede, Alse die sine suverhede In gere manieren brake doe, 7090[regelnummer] Ende wistere wat op antwerden toe. - ‘Ne suldi niet doen,’ seitsi, ‘Bohort Dat ic an u versoeke vort?’ Hi seide: ‘En es soe rike vrouwe In die werelt, bi mire trouwe, 7095[regelnummer] Dies wille ic hier af doen woude: Hets ene dinc dimen nine soude Ane mi versoeken, dat secgic u, In den poente datic ben nu. Mijn broder es heden versiegen doet, 7100[regelnummer] In weet hoe, des hebbic rouwe groet.’ Si seide: ‘En mindic u niet mere Dan man wijf minde noit ere, In hadde u niet versocht des; Want en gene costume en es, 7105[regelnummer] Dat die wijf versoeken den man, Al mint sine sere nochtan; Maer die grote scoenheide van u Heeft mi hiertoe gedwongen nu, Dat ic u moet bidden dat gi 7110[regelnummer] Tnacht wilt slapen bi mi.’
[pagina 49]
Hi seide: ‘Wat mins gesciet, Des en salic altoes doen niet.’ Ende alsi sinc worde verstont Si toende groten rouwe ter stont; 7115[regelnummer] Ende alsi hare des bedochte, Dat sine niet verwinnen mochte: ‘Gi hebt mi gebracht daer toe, Bi uwen ontsecgene,’ seit si doe, ‘Dat ic vor u sal sterven hier thant.’ 7120[regelnummer] Doe nam sine daer metter hant Ende leitdene doe ter dure, Ende seide: ‘Gi sult sien nu ter ure Hoe dat ic hier sterven sal.’ Hi bleef daer alsi hem beval. 7125[regelnummer] Si ginc opten casteel daer nare, Ende .xij. daer met hare; Ende alsi waren comen daer Sprac ene joncfrouwe daer naer, Die Pallada hiet: ‘Ay armen, 7130[regelnummer] Here, laet u ons ontfarmen, Ende laet onser vrowen wille gescien; Bedie, falgierdi ons van dien, Wi selen ons dan met allen Alle neder laten vallen 7135[regelnummer] Vore onser vrouwen ogen; Bedie wine mogen niet gedogen Te siene onser vrouwen doet. Ende ic segt u oec al bloet, Laetti ons allen bederven 7140[regelnummer] Ende om dus cleinen dinc sterven, Dat noit riddere en dede Alsoe grote ongetrouwechede.’ Hem ontfarmde sere van desen: Si dochten hem edele wive wesen; 7145[regelnummer] Niet bedi hine hadde liver dat si Hare zielen verloren dan hi; Ende seide dat altoes van dien Haer wille niet mochte gescien. Alsijt horden si lieten met allen 7150[regelnummer] Hen allegader nedervallen; Ende als hi dat hadde gesien Hi seinde hem, al gescoffiert van dien. Ende hi horde omtrent hem daer Soe groten luut ende nose daer naer, 7155[regelnummer] Ofter die duvle vander hellen al Waren, daer was soe groet gescal. Ende hine sach niet van al dien Dat hi daer te voren hadde gesien; Sonder sinc wapine vant hi daer: 7160[regelnummer] Ende die capelle was niet vor waer, Daer hi wel in waende vor desen Dat sijn broder in doet hadde gewesen. Alse hi dit sach, hi seide te hant: ‘Ic wane wel dit was die viant;’ 7165[regelnummer] Ende dat hijt hadde gedaen dat hi Hem wilde distorberen daer bi; Ne mare dat hi van dire dinc Bider macht van onsen here ontginc; Ende hi dancte daer af sere 7170[regelnummer] God onsen liven here, Dat hine bi sire genadechede Den viant verwinnen dede. Ende daer hi waende te dien stonden Sinen broder doet hebben vonden 7175[regelnummer] Ne vant hi niet min no mere. Doe was hi blider dan hi was ere, Ende hi wiste wel bidien, Dat al niet was, dat hi hadde gesien. Ende hi wapende hem te hant 7180[regelnummer] Ende sciet danen vanden viant, Die daer te wandelne plach doe; Ende reet danen embertoe, Dat hi soe verre gereden quam, Daer hi ene witte abdie vernam, 7185[regelnummer] Daer hi wel ontfaen was om das, Datmen pensde dat hi vander queste was. Hi bat enen broder daer naer, Dat hine soude leiden daer Hi den vroetsten man spreken mochte, 7190[regelnummer] Die hem daer binnen wesen dochte. Die broder seide also houde Dat hine toten abt leiden soude. Hi leitdene daer hi den abt vant; Ende hi keerde weder te hant. 7195[regelnummer] Die abt vrachdem wie hi ware? Ende hi berechtes hem daer nare, Ende seide hem vord met allen Hoe hem die dinge waren gevallen. Alse die goede man dat horde 7200[regelnummer] Hi seide doe tote Bohorde: ‘In hadde niet gewaent vor desen Dat enech riddere hadde gewesen, Vander oude alse gi sijt nu, Soe starc, alsic vinde u, 7205[regelnummer] In die gratie van onsen here. Ine mach u niet tavontmere Beraden van dat gi vraget mi; Nemare mergen ic hope suldi Van mi, soe ic best can, beraden wesen.’ 7210[regelnummer] Ende si scieden dus na desen. Sanderdages quam toten abt Bohort Alse hi messe hadde gehort, Ende hi telde hem van dien, Dat hi in die queste hadde gesien 7215[regelnummer] Wakende ende slapende mede, Ende bat hem aldaer ter stede, Dat hi hem die betekeningen Seide van allen dien dingen. Die goede man seide hem saen: 7220[regelnummer] ‘Bohort, alse gi had ontfaen Corpus domini, gi vort tier tijt In die queste, daer gi nu in sijt. Gi had onlange gereden, Dat u togede tere steden 7225[regelnummer] Die soete here van hemelrike Alse in eens vogels gelike. Die vogel op enen boem sat, Die was sonder vrocht ende blat: Hi besach sine vogelkine, 7230[regelnummer] Die waren sine jongekine; Ende alse hise te doet vant Hi wonde hem selven te hant Metten becke in sine borst, Datter dbloet ut liep sonder vorst, 7235[regelnummer] Soc dattie vogel starf sonder blijf, Ende sine joncskine ontfingen dlijf. Nu wilstu daeraf berecht wesen Wat betekent mach sijn bi desen. Biden vogle es, sekerlike, 7240[regelnummer] Betekent onse here van hemelrike, Die den minsche na sine gelike Maecte ende sciep properlike; Ende alse die minsce gesceden was Uten ertschen paradise dor das, 7245[regelnummer] Dat hi hadde mesdaen, hi quam te hant In die werelt, daer hi die doet in vant; Bedie in die werelt ne was Geen leven, sijt seker das. Die boem sonder vrucht ende blat, 7250[regelnummer] Daer af saltu verstaen dat Die werelt es betekent bi, Daer niet in was, secgic di, Dan ermoede tallen uren, Ende oec mede quade aventuren. 7255[regelnummer] Die joncskine, sekerlike, Waren die liede van ertrike, Die alle doe waren verloren Enter hellen waren hier te voren. Ende als die Godssone ten bome quam, 7260[regelnummer] Dat was als hi anden cruce clam,
[pagina 50]
Ende gesteken was in die side, Datter dbloet ut liep: tier tide Ontfingen die arme [liede] dat leven, Dat hen biden blode was gegeven, 7265[regelnummer] Ja, die sine werke badden gedaen; Ende hi tracse uter hellen saen, Daer ane droefheit was ende es, Ende ewelike sal sijn, sijts gewes. Dese goetheit dede God dor di 7270[regelnummer] Teser werelt, ende dore mi, Ende dor alle sondaren. Quam hi hem daer oppenbaren In eens vogels gelikenesse, Om datti ene gedinkenesse 7275[regelnummer] Dire herten soude comen inne, Te stervene dore sine minne. Daerna leitdi di alte hant Tere vrouwen, die[r] al sijn lant Hadde bevolen die coninc Aman. 7280[regelnummer] Hort die betekenesse daer an: Aman es die here van hemelrike, Die dus coninc es in ertrike, Daer meer soetheiden es an Dan in enegen eertscen man. 7285[regelnummer] Ene andere vrouwe, die dat lant Eer hadde gehad in haer hant Orlogede optie vrouwe ter stont. Gi vacht over hare ende verwont. Hord daer af dat beteken nu: 7290[regelnummer] Onse here hadde getoget u, Dat hi dor u storte sijn bloet; Daerna gaf hi u herte ende moet, Dat gi over die vrowe vacht saen, Daer die heilege kerke bi es verstaen, 7295[regelnummer] Dats onse gelove, onse kerstenhede. Bider andere vrowen, verstaet mede Den viant, die nacht ende dach Ons orloget waer dat hi mach. Als gi verstont der vrouwen sake. 7300[regelnummer] Daer si af was tongemake, Gi naemt den camp over di gone. Dat waerdi sculdech te doene Om dat gi Goeds riddere sijt, Ende sijt gehouden talre tijt 7305[regelnummer] Te bescermene altoes sterke Met uwer macht die heilege kerke. Tot u quam op dien nacht besien Die heilege kerke, ende al om dien In eens droefs wijfs gelike, 7310[regelnummer] Die u clagede droeffelike Datmen hare onrecht dede Ende nam hare ervechtechede. Sine quam niet gecleet met siden, None togede met den bliden; 7315[regelnummer] Maer si quam in groter droefheden Ende gecleet met swerten cleden Om den toren die hare kinder Daden merre ende minder; Dat sijn besondechde kerstine, 7320[regelnummer] Dat haer kinder [sculdech] sijn te sine, Ende gelijc hare moder hare Altoes [sculdech] te houdene waren. Si doen hare altoes pine ende toren; Hier bi quam si di te voren 7325[regelnummer] In droefs wijfs gelike, dat di Hars ontfermen soude daer bi. Biden vogle, die di sprac ane In die gelike van enen swane, Soe sulstu verstaen den viant. 7330[regelnummer] Al was hi buten wit, dat verstant, Hi was binnen sward, sonder waen. Hier bi soutu dypocriten verstaen, Die buten goet scinen sere Ende alsoe dinende onsen here; 7335[regelnummer] Maer binnen sijn si tallen stonden Sward ende vuel van quaden sonden, Daer si te meneger stede Die wereld bedriegen mede. Die vogel die oec quam daer bi, 7340[regelnummer] Slapende ende wakende vor di, Dat was die viant in sinen done, Die in gelike van religione Tote di quam ende seide al bloet Dattu dinen broder liets slaen doet, 7345[regelnummer] Daer hi di qualike loech an; Dijn broder es noch levende man. Maer hi seit di daer bi, Om dat hi wilde trecken di Te dulheiden ende te luxuren, 7350[regelnummer] Om di te bringene te dier uren In hoeftsonden in dier manieren, Om dat hi di wilde doen falgiren Vanden aventuren vanden grale; Ende di verladen daer al te male. 7355[regelnummer] Nu hevestu dese dinge verstaen, Ende ic sal u secgen saen Vanden verrotten houte, dattu sages, Ende vanden blomen, daer du lages. Die verrotte stoc, sijt seker des, 7360[regelnummer] Dats dat Lyoneel dijn broder es Sonder doget, ende in genen kere Gene doget hevet in onsen here. Die verrotheide es een tekijn Van vervultheden der sonden sijn, 7365[regelnummer] Daer hi op hopet nacht ende dach, Daer menne wel bi heten mach Een verrot stic houts, sonder waen. Biden .ij. blomen sulstu verstaen Twee roeden: die ene van dien 7370[regelnummer] Betekent die riddere jegen wien Gi gisteren vocht ende wondet; Entie joncfrouwe die gi met hem vondet, Die gi bescuddet bi uwer goede, Dat betekent di ander roede. 7375[regelnummer] Dene blome was der andere naer, Dat was die riddere, die daer Die joncfrouwe wilde vercrichten dan; Maer datse sciet die goede man, Dat was God, die niet gedogen woude 7380[regelnummer] Datse haer suverheit verlisen soude, Ende bracht u daer, dat si bi u alsoe Haer suverhede behilt doe. Die man seide tot u daer nare, Dattie gene wel dul ware, 7385[regelnummer] Die die .ij. blomen teneger werven Dor een stic verrot houts liet sterven. Bohort, du daets soe, sonder wanc, Des hi di weet wel groten danc. Du sages oec leiden dinen broder, 7390[regelnummer] Dijns vader kint ende dire moder; Ende si riep genaden op di, Ende si verwandi daerbi, Dattu hads ontfermechede Op hare ter selver stede, 7395[regelnummer] Ende du licts naturlike minne Achter bliven, te dinen gewinne, Om die minne van onsen here, Die di dies dankede so sere, Dattie ridders die hadden onder hant 7400[regelnummer] Doet vielen doe altenant, Die dinen broder leitden tien stonden; Ende u broder ward ontbonden Ende dede sine wapene an, Ende voer in sine queste dan, 7405[regelnummer] Daer gi cortelike hier nare Af sult horen niemare. Vandien, dattu uten blomen Blade ende vrucht sages comen, Dats [dat] vanden riddere hier naer 7410[regelnummer] Groet geslechte sal comen daer:
[pagina 51]
Soe saelt vander joncfrouwen na desen. Ende had si ontsuvert gewesen, Si waren beide gelike doet daer bi. Ende al datte belettet gi, 7415[regelnummer] Daer men u bi mach te hant Wel houden over ons heren seriant.’ Bohort seide: ‘Gi hebt mi wel berecht nu.’ Die goede man seide: ‘Ic bidde u, Dat gi bid onsen here over mi.’ 7420[regelnummer] Ende nadien soe scieden si, Ende Bohort voer tsire questen ward, Ende gemoette in sine vard Enen knape, dien hi daer nare Vragede doe om niemare. 7425[regelnummer] Die knape antwerde also houde, Dat opten anderen dach wesen soude Een tornoy vor enen casteel daer; Ende hi wijsdene hem daer naer. - ‘Van wat lieden sal hi wesen?’ 7430[regelnummer] Die knape seide na desen: ‘Die vrouwe van desen castele Salre hebben ridders vele, Die selen, hordic visieren, Jegen den grave van Plamen torniren.’ 7435[regelnummer] Hi pensde dat hire bliven woude Oft daer sijn broder iet wesen soude, Oft enech man quame dare, Die hem daer af seide dat ware. Hi reet so verre, dat hi vernam 7440[regelnummer] Ene hermitage. Als hire quam Vant hi Lyonele sinen broder daer. Hi spranc van sinen perde daer naer, Ende was herde blide tien stonden Dat hi sinen broder hadde vonden. 7445[regelnummer] Alse Lyonel sinen broeder siet Hi kintene, maer hine verport hem niet, Ende seide: ‘En es bi u niet bleven, Dat ic nine verloes min leven, Daer mi .ij. ridders vorden gebonden 7450[regelnummer] Ende gine volget mi niet ten stonden, Ende voert ere joncfrouwen te staden staen, Die een riddere hadde gevaen, Ende liet mi in vreseri vander doet. Noit en dede ontrouwe so groet 7455[regelnummer] Jegen sinen broder enech man. In versekere u nieweren vort an Vander doet nu ter wilen jegen mi, Bedie gi hebbets verdient bedi.’ Alse Bohort dat alsoe vernam, 7460[regelnummer] Dat sijn broder op hem was gram, Hi leide te gadere sine hande Ende bat hem genade te hande; Knilende over sine knien Bat hi hem genade van dien 7465[regelnummer] Dat hem te hemwaerd was gesciet. Hi seide, hine daets niet. Lyoneel wapende hem ter vard Ende sat daerna op sijn part, Ende hi seide altehant: ‘Bohort, 7470[regelnummer] Wacht u jegen mi nu vort, Bedie ic sal u doden nu, Magic te boven comen van u; Want gi dongetrouste ridder sijt, Die oit quam teneger tijt 7475[regelnummer] Van alse goden man als was onse vader, Die ons wan beidegader. Sit op u part, oft ic sal u Doet slaen te voet als gi sijt nu.’ Alse Bohort hevet vernomen 7480[regelnummer] Dat hem te vechtene toe es comen, Hi viel neder echt nadien Anderwerven over sine knien Vore sijns broder perts voete, Ende seide tot hem: ‘Ay soete 7485[regelnummer] Broder, ic bidde u dat gi Dese mesdaet vergevet mi. Gedinct in uwer herten binnen, Broder, vander groter minnen, Die beide lude ende stillekine 7490[regelnummer] Tuscen ons tween es sculdech te sine.’ Wat dattere Bohort seide toe, En mochte niet dieden doe; Want Lyoneel drogene ter eerde Metter borst van sinen peerde, 7495[regelnummer] Ende daer hi lach averrecht ter neder Reet hi daer over hem wech ende weder, Soe dat hi in onmacht vel, Ende waende te hant sterven wel Sonder biechte; want hi soe onsochte 7500[regelnummer] Was berect, dat hi niet op ne mochte. Doe beette Lyoneel ter eerden saen, Ende wilde hem dat hoeft afslaen: Doe quam die hermite gelopen vort, Die haer tale al hadde gehort, 7505[regelnummer] Ende liet hem vallen op Bohorde, Ende seide doe dese worde; ‘Ay edel riddere, hebt genaden Uwes broeder van sinen mesdaden! Sladine doet nu ten stonden, 7510[regelnummer] Gi sult sterven van sonden. Hi es een die beste ridder die levet.’ Lyoneel antwerde gevet: ‘Vrient, gine vliet van hem saen Ic sal u selven te doet slaen.’ 7515[regelnummer] Hi seide; ‘Ic hebbe liver dat gi Mi doet slaet dan hem, bedi Het ware merre scade van hem Dan van mi, die een out man bem.’ Hi ginc op Bohorde licgen mettien. 7520[regelnummer] Alse Lyoneel dat hadde vorsien Hi verhief dat swaerd met felheit groet Ende sloech den hermite doet. Ende als hi dat hadde gedaen Trac hi den broder den helm af saen, 7525[regelnummer] Ende hadde hem thoeft af geslegen, Maer dat doe quam daer jegen Calogrenant ten selven stonden, Een riddere vander tafelronden, Dien God selve sinde dare. 7530[regelnummer] Ende als hi ward geware Des hermiten die daer doet lach, Hem hads wonder, ende hi sach Dat Lyoneel wilde Bohorde doet slaen, Ende hi beette vanden perde saen, 7535[regelnummer] Ende trac Lyonele achter ward, Ende vragede hem metter vart Oft hi uten sinne ware, Dat hi doet wilde slaen dare Sinen broder, die es der bester een, 7540[regelnummer] Die noit die sonne besceen: Dit ne gedogede geen goet man. - ‘Hoe suldine bescudden dan?’ Seide Lyoneel tot hem doe. Calogranant antwerder toe: 7545[regelnummer] ‘Eest al in neernst,’ sprac Calogranant, ‘Dat gine wilt doet slaen te hant?’ - ‘Jaet,’ antwerde Lyoneel daer, Ende begonste hem weder oplopen naer. Ende Calogrenant spranc vort 7550[regelnummer] Ende seide tote heme dese wort: ‘Loepti uwen broder meer op nu, Ic sal selve vechten jegen u.’ Alse Lyoneel die tale verstont, Hi sloech op Calogrenante ter stont, 7555[regelnummer] Ende hi sette hem daer ter were. Si vochten lange ende sere, Dat Bohort bequam daer hi lach. Ende als hi die .ij. vechten sach Hi waser af in anxste groet; 7560[regelnummer] Bedie worde Lyoneel geslegen doet,
[pagina 52]
Hine worde nembermeer blide; Ende worde Calogrenant op dander side Doet geslegen van Lyonele, Hi soude hebben van dien dele 7565[regelnummer] Ene ewelike grote scande; Want hi wel wiste ende cande Dat Calogrenant niwer om el Dan om sinen wille in den twest vel. Dus was hi tonpaise om hen beden, 7570[regelnummer] Ende hadse geerne daer gesceden, Maer hine hadde so vele machten niet, Soe dat hise te scedene liet. Si vochten soe lange ende so sere, Dat Calogrenant nemmermere 7575[regelnummer] Hem verweren mochte inden strijt. Hi riep op Bohorde tier tijt: ‘Bohort, comt hare ende hulpt mi nu Uter vresen daer ic in ben dor u. Gevalt mi dat ic bederve 7580[regelnummer] Sonder uwe hulpe, ende sterve, Wet wel, datmen u daer af over al Euwelijc lachter spreken sal.’ Lyoneel spraker toe te hant: ‘En diet u niet, Calogrenant, 7585[regelnummer] Gi moet sterven van desen swaerde, Daer hem Bohort af vervaerde; Hi weet wel, waerdi doet, Hi sal wesen in vresen groet.’ Bohort sinen helm bi hem vant, 7590[regelnummer] Dien hi op sijn hoeft sette ende bant; Ende hi was drove doe hi sach Dattie hermite daer doet lach. Ende Calogrenant riep anderwerven: ‘Bohort, motic dus over u sterven! 7595[regelnummer] Ic laet mi genogen bedi, Want dore betren man dan gi Sone mochtic niet sterven lichte.’ Lyoneel sloech op hem bedichte, Dat hi hem den helm afsloech daer; 7600[regelnummer] Ende Calogrenant seide daernaer: ‘Ay God, here ende vader mijn, In wies dienste ic hebbe gesijn Niet alse gewaerlike alsic vor desen Met rechte soude hebben gewesen, 7605[regelnummer] Ic biddu oetmodelijc ende sere, Dat gi mi des geont, here, Die rouwe dien ic hier gedoge, Dat hi mi noch wesen moge Te mire zielen behoef lichtenesse 7610[regelnummer] Tere eweliker behoudenesse!’ Ende Lyoneel slogene soe harde, Dat hi doet viel daer ter aerde. Alse Calogrenant doet was Lyoneel hilt hem niet gepait das, 7615[regelnummer] Hine ginc slaen op Bohorde, Dat hi cume sach ende horde. Ende Bohort, die oetmodich was sere, Seide tote hem: ‘Live here, Ic bidde u dat gi mi wilt tesen tide 7620[regelnummer] Verlaten nu van desen stride. Doetdi mi oft ic u ten stonden Soe siwi doet in onsen sonden.’ Hi seide: ‘Ic sal u doet slaen nu, Magic te boven comen van u.’ 7625[regelnummer] Daerna trac Bohort sijn sward Ende sprac wenende ter vart: ‘Ay God, alder werelt behoeder, Oftic jegen minen broder Mi verwere nu ten stonden, 7630[regelnummer] Ne wrect op mi niet di sonden!’ Ende alsi hief om slaen sijn swaerd Hordi ene stemme ropen te hem waerd: ‘Bohort, soe wat dat dijns gesciet, En sla op dinen broder niet, 7635[regelnummer] Bedie du soutene slaen te doet.’ Mettien so viel ene blixeme groet Tuscen hen tween, in dire manire Oft ware van enen vire, Daer soe grote vlamme of quamen doe, 7640[regelnummer] Dat haer scilde besingeden alsoe; Ende si vielen van desen Beide in soe groten vresen, Dat si in onmacht vilen ter stonden. Ende alsi weder op stonden 7645[regelnummer] Sagen si di eerde al roet Tuscen hen beiden van hitten groet. Ende alse Bohort geware ward Dat sijn broder hadde geen ruward, Hi dankets doe inhertelike 7650[regelnummer] Den here van hemelrike. Ende daer Bohort lach hi hoerde Ene stemme spreken dese worde: ‘Laet dinen broder, ende maec dine vaerd Al sonder letten ter zee waerd, 7655[regelnummer] Want Perchevael ontbeit dijns daer.’ Hi hief op sine hande daer naer Ende seide: ‘Here van hemelrike, Geloeft moetti sijn ewelike, Ende gebenedijt mede, dat gi 7660[regelnummer] In uwen dienst wilt ropen mi.’ Daerna sprac hi anden broder saen: ‘Gi hebt quade bederve gedaen, Live broder, nu hier an, Dat gi doet hebt desen goeden man, 7665[regelnummer] Die onse geselle was, ende daertoe Anden hermite, die gi doet hebt alsoe. Ic bidde u, live broder goet, Dat gise beide ter eerden doet Alsoe alster betaemt mede 7670[regelnummer] Eer gi rumet dese stede.’ - ‘Ne sal u niet dan hiertoe Te doene staen?’ - ‘Neent,’ seidi doe, ‘Want ic moet mine vard Maken nu ter zeeward, 7675[regelnummer] Bedie Perchevael ontbeit mins daer.’ Hi sat op sijn paert daernaer Ende reet en wech. Ende snachts saen Daerna hordi ene stemme, sonder waen, Die op hem riep: ‘Stant op, Bohort!’ 7680[regelnummer] Hi stont op ende gereide hem vort, Ende voer al stillekine dane, Dat nieman wiste van sinen ontgane. Ende hi reet toter zee thant, Daer hi een scip gearriviert vant, 7685[regelnummer] Met witten samite verdect. Hi beette vanden perde ende trect Int scep, ende bevelt hem oetmodelike Onsen here van hemelrike. Ende als hi binnen den scepe was 7690[regelnummer] Ward hi te hant geware das, Dattie wint int seil quam doe; Ende het voer vorward embertoe, Dattet over die zee vligen sceen. Hi sat op dat scip al in een: 7695[regelnummer] Het was so donker, dat hi vandien Daer in niet en conde gesien, Ende ginc opten bort liegen Vanden scepe sine bedinge secgen, Daer hem een slaep an quam doe: 7700[regelnummer] Ende hi sliep toten dage toe. Als hi ontwiec hi ward al dare Eens gewapents ridders geware, Ende hi ward geware das, Dattie riddere Perchevale was. 7705[regelnummer] Hi was sijns utermaten blide, Ende dreef grote feeste tien tide. Ende alsene Perchevale hadde gesien Hi scoffierde hem al van dien, Ende vragede hem wie hi ware? 7710[regelnummer] - ‘En kindi mi niet?’ seide Bohort daer nare.
[pagina 53]
- ‘Nenic, here,’ antwerde hi. ‘Mi wondert sere hoe dat gi Binnen desen scepe comen sijt, En hevet God niet gedaen nu ter tijt.’ 7715[regelnummer] Ende Bohort doe den helme af dede, Ende doe kindene Perchevale ter stede, Ende was sijns utermaten blide. Bohort telde hem tier tide Hoe hi int scep was comen daer, 7720[regelnummer] Ende Perchevale seide hem daer naer Sine aventuren met allen, Die hem in die roetse waren gevallen.

Vorige Volgende

IX. Vanden vogle dien Bohort sach, ende hoe hi vacht jegen Briadanne.