Roman van Lancelot (1846-1849)

Roman van Lancelot

(1846-1849)–Anoniem Lanceloet– rechtenstatus

Auteursrechtvrij

naar het (eenig-bekende) handschrift der Koninklijke Bibliotheek

Vorige Volgende


XLVI. Hoe Keye met sinen ridders voer aventuren soeken om Waleweine scande te done. Daventure seget hier ter steden: 19690[regelnummer] Doe Walewein was vanden hove gesceden, Dat Keye doe quam gegaen Te sinen gesellen, daer ic af dede verstaen, Die met heme Waleweine verriden. Si spraken aldus onder henlieden, 19695[regelnummer] Overmids theren Keys raet, Dat elc wilde proven, hoe dat gaet, Sine aventure oec een jaer. ‘Ende laet sien oft Waleweine daernaer Alse menege aventure sal gescien 19700[regelnummer] Alse ons allen sal binnen dien.’ Ende om dese sake sijn si daer Met Keyen gevaren alle daernaer Om Waleweine te doene tachter Ende te merre sinen lachter. 19705[regelnummer] Dus sijn si hemelijc wech gevaren Tote hen twintich, sonder sparen, Ende daer was Keye meester af, Die hen allen goden troest gaf. Hi seide: ‘Laet ons te gadere varen 19710[regelnummer] Ende niemanne die wi vinden sparen.’ Mettesen worden, metteser tale, Quamen si gereden in enen dale, Doe si seven dage hadden gereden, Daer ene borch stont beneden, 19715[regelnummer] Die utermaten scone was, Ende starc mede, alsict las; Ende om dese borch ginc een muer, Die te starc was elken gebuer, Ende een water mede so wijt, 19720[regelnummer] Dat si niemanne ontsagen ter tijt. Nu es Keye comen met allen Met sinen ridders daer vore gevallen. Het was den avonde herde naer, Ende souden gerne herbergen daer; 19725[regelnummer] Ende die valbrucge was opgetogen, Datsi ter porten niet comen mogen. Si ripen sere ter selver ure. Doe quam daer een knape ten mure, Die vrachde wat si behilden dare? 19730[regelnummer] Doe seide her Keye saen daer nare: ‘Vrient, wi willen herbergen nu.’ - ‘Uwer es te vele, dat secgic u,’ Sprac die knape, ‘te latene in; Want waerdi valsch in uwen sin 19735[regelnummer] Gi mocht di borch winnen saen Op min here, sonder waen; Ende in weet niet wie gi sijt. Maer wildi mi uwen name secgen ter tijt, Gi moget sijn oec selc man, 19740[regelnummer] Mijn here sal u inlaten dan; Ende gi mocht oec selc sijn, twaren, Gine quaemter in binnen seven jaren.’ Keye balh hem sere tier stont Ende seide: ‘Quade besceten horstront, 19745[regelnummer] Hoe sprectstu soe te mi ward! Haddic [di] hier nu vor min pard Ic soudi anders te sprekene leren!’ Die knape sprac: ‘Also mote mi God eren, Wardi allene te deser uren, 19750[regelnummer] Ende woudi dan iet lange duren Daer buten, ic soude daer comen tot u Ende soude besien wat gi mi nu Te vergeefs doen sout allene. Ende willen dandere alle gemene 19755[regelnummer] Stille houden, ic segs u mere, Wi comen daer ut, ic ende min here, Ende selen jegen u josteren ter steden Welc dat gi wilt van ons beden.’ - ‘Bi Gode,’ sprac Keye, ‘dat soude mi 19760[regelnummer] Onward hebben nu van di, Dat ic soude jegen enen knecht Speren breken over recht. Maer doch hier comen dinen here, Ic breke jegen hem een spere.’ 19765[regelnummer] Dus es die knape neder gegaen Ende dede dit sinen here verstaen, Die hem gereide saen daernaer. Ende sijn knape mede, wet vorwaer, Dede hem wapenen wel van prise, 19770[regelnummer] Rechte na eens ridders wise, Ende bat sinen here dat hi aldare Seide dat hi ridder ware Ende oec here van daer binnen, Ende hi hem late die joeste beginnen 19775[regelnummer] Jegen Keyen nu ter stat. Die riddere dede dat hi hem bat. Doe quamen si saen gereden daer uut, Ende Keye quam vord al over luut Ende wilde daer die joeste beginnen: 19780[regelnummer] Doe sprac die riddere van daer binnen: ‘Here, gi hebt hier vele liede, Ende ware dat sake dat u messciede, Ende si ons wilden deren Sone condewi ons niet verweren; 19785[regelnummer] Maer wildi gi twee jegen ons tween Hier jostiren al in een Tote dat wi verwonnen wesen Ofte gi twee, dat si te desen Niet en selen doen, Godweet, 19790[regelnummer] Ende si dit namen op haren eet, Wi selen jostiren jegen u.’ Keye seide: ‘Dat swerie nu, Ende alle dese ridders mede.’ Dus sworen sijt daer alle ter stede. 19795[regelnummer] Die knape die nu was comen hier, Die int herte was cone ende fier, Sine wapine scenen so overgoet, Dat Keye pensde in sinen moet, Dat ware di here van daer binnen. 19800[regelnummer] Hi sprac te Keyen: ‘Wildi beginnen
[pagina 135]
Te josteerne jegen mi So comets af, laet sien wat si; Het gaet sere ten avonde waert.’ Keye begonde te roerre sijn paert 19805[regelnummer] Ende quam gereden opten knape Ende stakene met groten ongemake So dat sijn spere te sticken brac, Ende sinen scilt oec mede dorstac. Ende die knape staken weder. 19810[regelnummer] Dor scilt, dor halsberch ende dor leder Rechte tuscen arm ende side, Dat sijn spere ter selver tide Achter ut gewaden quam. Het sceen dat hi op hem was gram; 19815[regelnummer] Haddine alsoe opten buc geraect Hi hadde Keyen ene wonde gemaect Soe groet, dat wetic wel van desen, Hine ware daeraf meer genesen. Die knape liet tspere steken alsoe 19820[regelnummer] Ende trac sijn swaerd ende ginc doe Vresselike op Keyen slaen. Ende Keye trac sijn swaerd oec saen Ende ginc hem manlike weren; Maer die inden vanden speren 19825[regelnummer] Die utrageden achter ende voren Daden hem herde groten toren, Want hem dat slaen sere benam. Die knape met enen slage quam Ende sloech Keyen oec na das 19830[regelnummer] Also als hi verwerret was Opten arm met nidecheden, Dat hem sijn swaerd ontviel ter steden. Doe werd Keye tachter sere. Ende binnen dien soe was die here 19835[regelnummer] Vander borch vergadert ende in porre Ane Keys geselle Lichaorre. Si quamen te gadere metten speren: Elc stac anderen inder weren, So dat beide haer speren braken. 19840[regelnummer] Ic segt u, dat si die swerde traken Ende gingen houwen ende geven: Elc stont daer na sanders leven. Int leste werd Lichanor so mat, Dat hi hem opgaf ter stat. 19845[regelnummer] Doe quam een ander op hem gereden. Ende binnen deser selver steden Was Keye tachter soe gedaen, Dat hi ne mochte niet gestaen, Ende viel over sine knien ter neder. 19850[regelnummer] Ende alsi op waende staen weder Slogene die knape metten swerde Dat hi weder viel ter eerde. Doe quamen die andere daer toe gereden Ende bescudden Keyen daer ter steden, 19855[regelnummer] Ende voren den knape op alsoe. Alse dat die knape sach hi vloe In die porte ter selver stont, Want si haddene sere gewont. Ende hi sach wel ende heeft vernomen 19860[regelnummer] Dat sijn here was opgenomen; Ende haddene gevaen, wet vorwaer, Ende sendene te conincs hove daernaer, Om te secgene daer oppenbare Dat hi hare gevangen ware. 19865[regelnummer] Ende doen die knape dit vernam Was hi utermatene gram Ende dede die porte vaste sluten Ende die ridders alle daer buten, Die wel waenden, sijt seker das, 19870[regelnummer] Dat hi die here vanden torre was. Si ripen doe inward ende seiden Dat si nembermer van daer sceiden, Sine selen den tor winnen ere. Keye die gequetst was sere 19875[regelnummer] Men hulp hem daer te rasten saen. Die andere sijn te storme gegaen Ende besoeken in allen sinnen Hoe si den casteel mochten winnen; Maer daer ne was geen winnen an. 19880[regelnummer] Nu es gereden die goede man, Die riddere die daer gevangen was, Daer ic hier te voren af las, Tote Kardole ter selver ure, Daer hi vant den coninc Arture, 19885[regelnummer] Ende vertelde vorden coninc al bloet Hone Keye ende sijn conroet Gesent hevet aldaer gevaen, Ende hoe sine alle hadden bestaen; ‘Niet een man allene, wet mede, 19890[regelnummer] Want icker twee onder dede; Ende doe quamen si .xv. wale Op mi gesmeten altemale, Ende vingen mi ende sinden mi nu, Her coninc, here, aldus tot u.’ 19895[regelnummer] Doe dit vernamen die grote heren Maecten sijs sere haer sceren. Vord seide di riddere daer den heren Hoe sijn knape reet uter weren Jegen Keyen, en hine sloech soe, 19900[regelnummer] Dat sine gesellen echt quamen toe Ende Keyen bescudden aldaer. ‘Doe ontreet min knape daernaer In minen casteel, daer si voren Liegen ende hebben gesworen 19905[regelnummer] Dat sine winnen selen ter steden Eer si meer van daer sceden. Nu siet, here, her coninc, Wat wildi doen van derre dinc? Wildi orlof geven mi nu, 19910[regelnummer] Dies soudic gerne bidden u, Want ic ben hier u gevaen; Maer gaefdi mi orlof, sonder waen, So waric quite van minen eede, Ende so mochtic weder keren gerede 19915[regelnummer] Ende bescudden minen casteel Ende minen knape, die een deel In anxte es, dat wetic wale.’ Die coninc sprac na dese tale: ‘Her riddere, bi mire kerstenhede, 19920[regelnummer] Ic seelde u quite hier ter stede, Ende oec so gevic mede orlof, Es enech riddere in min hof Die u wille in staden staen, Dat hi met u vare, sonder waen.’ 19925[regelnummer] Doen dit horde Gariët Ende Lyoneel ende Hestor mede Ende Acglavael, si seiden daernare: ‘Her coninc, opdat u lief ware, Wi souden met desen riddere varen 19930[regelnummer] Ende dien knape ontsetten sonder sparen, Die Keyen also tonder dede.’ Die coninc seide: ‘Ic weets u mede Danc, ende bids u, sonder waen, Mogedi Keyen aldaer gevaen, 19935[regelnummer] Ende sine gesellen daer ter stede, So geefse desen riddere gerede Ende sinen knape, die Keyen sloech, Mede te done haer gevoech; Maer, oft gi cont, so hoet u 19940[regelnummer] Dat si u niet en kinnen nu, Ende oec so hoet u, des biddic u mere, Dat gise niet en quetst te sere.’ Dit geloefden si daer den coninc Ende scieden en wech na dese dinc, 19945[regelnummer] Metten riddere, ongespaert, Rechte te sinen castele waerd. Nu selewi swigen van desen Ende van Keyen ende sine gesellen lesen.

Vorige Volgende