|
| |
LII. Hoe Walewein den tornoy verwan ende den coninc vinc van Arragoen.
Ons doet die aventure nu cont,
21305[regelnummer]
Dat Walewein reet tier stont
In dat lant van Arragoen.
Tien dage reet hi in dat doen,
Dat hi vant gene aventure.
21310[regelnummer]
Neven een bosch, daer hi soude liden.
Daer sach hi knapen met harnasce riden,
Dien hi daer doen vragen begonde
Waer si henen trocken ter stonde.
Doen seide daer een knape saen:
21315[regelnummer]
‘Here, ic segt u, sonder waen,
Het es een tornoy genomen,
Daer twee coninge selen comen,
Van Arragoen die coninc rike
Met menegen riddere degelike;
21320[regelnummer]
Ende die coninc van Portegale
Comt jegen hem, wet dat wale;
Maer hine es so machtech niet.
Dese tornoy es genomen, nu siet,
Dore stoutheit ende dor overmoet:
21325[regelnummer]
So wie den anderen onder doet
Die sal daerna riden in sijn lant
Ende stichten dacrin roef ende brant;
Maer wi wanen weten van dien,
Dattie coninc van Portegale sal vlien,
21330[regelnummer]
Want sine menege di es clene
Jegen ons heren macht gemene.’
Walewein sciet van hen aldare
Ende pensde hi soude oppenbare
Hulpen den coninc van Portegale;
21335[regelnummer]
Constijt daer gedoen so wale
Dat hine hulpen mochte boven,
Men soudene dan te meer loven.
Twee dage Walewein doe reet
Ende sochte ende vrachde wel gereet
21340[regelnummer]
Naden coninc van Portegale.
Doe sach hi comen in enen dale
Enen gersoen, die van danen was;
Ende Walewein vragede hem nadas
Na den coninc ter selver stont.
21345[regelnummer]
Die knape seide: ‘Ic doet u cont,
Die coninc leget daer in dat wout
Ende hevet sorge menechfout
Om den coninc van Arragoen,
21350[regelnummer]
Ende dorriden al sijn lant,
Ende daer in stichten roef ende brant.’
Doe Walewein wiste die waerheden
Es hi te hans derward gereden.
Ende die coninc was te dien male
21355[regelnummer]
In ene sine stat gelogirt wale,
So dat Walewein op die stonde
Gene herberge vinden ne conde.
Lange reet hi harentaren:
Daerna quam hi doe gevaren
21360[regelnummer]
Vore ene herberge herde clene,
Daer twee ridders waren allene
Van avonturen. Hoe soet gaet,
Daer verteldi sinen staet,
Ende hoe hi quame om di dinc
21365[regelnummer]
Inden tornoy te hulpen den coninc.
Dus was hi daer wel ontfaen:
Men dedene daer ontwapen saen,
Ende die riddere dede hem daernaer
Van goden clederen bringen een paer.
21370[regelnummer]
Doe sceen hi een scone man.
Die riddere Waleweine merken began,
So daer meer scoenheit an lach.
Doe ginc hi tsinen geselle mettien
21375[regelnummer]
Ende seide: ‘Nadat ic can gesien
Sone sagic nie scoenre figure
Dan ic hebbe geherberget ter ure.
Ic weet wel dat hi mergen sal
Ten tornoye den prijs hebben al:
21380[regelnummer]
Laet ons sijn geselle wesen.’
Dat eten was gereet mettesen,
Ende men ginc daer eten saen;
Ende doen dat eten was gedaen
Ginc men slapen harde scire
21385[regelnummer]
Op een bedde dat was dire.
Des ander dages also wale
So es die coninc van Portegale
Te velde getrocken met sinen gesellen;
Ende her Walewein, daer wi af tellen,
21390[regelnummer]
Ende die twee ridders oec gerede
Sijn te velde getrocken mede.
Die coninc hadde daer oppenbare
Drie dusent ridderen in ene scare,
Die tors waren gewapent wale;
21395[regelnummer]
Ende twee dusent oec bi getale
Die dapper waren ende snel.
Ende die coninc van Arragoen
Brachte vijfdusent ridders in sijn doen,
21400[regelnummer]
Ende vierdusent knapen mede.
Dus es hi comen oec ter stede
Daer die tornoy soude wesen:
Daer hilden si stille lange na desen.
Te sinen gesellen sprac Walewein:
21405[regelnummer]
‘Ic houde te lange op dit plein,
Ic wille sien oftic ieman vinde
Van Arragoen des conincs gesinde,
Oft daer ieman josteren wilt.’
Hi nam sijn spere ende sinen scilt,
21410[regelnummer]
Ende es also ter plaetsen comen.
Daer heeft hi van Arragoen vernomen
Den marscalc van alden here,
Die oec genomen hadde een spere
Om ene joeste te doene daer.
21415[regelnummer]
Dus sijn si beide vergadert daernaer,
| |
| |
Dattie maerscalc sal becopen.
Si lieten beide te gadere lopen
Ende staken beide met groten gere.
Die maerscalc stac ontwe sijn spere,
21420[regelnummer]
Ende Walewein die stakene weder
Ende warpen vanden orsse neder,
Dat hem dochte sijn ende wesen.
Her Walewein nam dat ors mettesen
Ende gavet sinen geselle daer,
21425[regelnummer]
Ende keerde omme weder daernaer.
Ende die maerscalc es opgestaen
Ende es ten coninc sinen here gegaen
Ende telde hoe sijn ors es verloren:
Dies hadde die meesterscinke toren
21430[regelnummer]
Dat hem die lachter es gesciet.
Hine wilde langer beiden niet:
Met nide reet hi op Waleweine,
Die daer doe helt inden pleine.
Ende her Walewein reet op hem weder
21435[regelnummer]
Ende stakene doe so sere ter neder,
Dat hi ne horde noch ne sach,
Achter den orsse daer hi lach.
Dat ors gaf hi sinen gesellen,
Ende bleef houdende inder dellen.
21440[regelnummer]
In dander side quam niemare
Dattie meesterscinke ware
Af gesteken ende sijn ers verloren.
Dies hadde di drossate groten toren,
Ende seide, hi soutse beide wreken.
21445[regelnummer]
Hi heeft op Waleweine gesteken
Ende her Walewein op hem weder,
Dattie orsse bogen neder,
Ende die speren te slicken braken.
Beide si haer swaerd doe traken.
21450[regelnummer]
Doe quam daertoe menech here:
Begonden dien tornoy aldaer.
Waleweins gesellen volhden hem naer
Ende holpen hem ende stonden in staden
21455[regelnummer]
Daer hi was te sere verladen.
Hi quam den drossate nu oec jegen
Ende heften vanden perde geslegen:
Sinen geselle dat ors beval
Ende keerde weder in dat dal,
21460[regelnummer]
Ende reet in di meeste porsse.
Hi dede menegen vanden orsse
Tumelen op dien dach aldaer:
Hi dede den menegen daer versagen.
Doe began daer manlijc vragen
21465[regelnummer]
Ofte ieman wiste wie hi ware
Die den prijs hadde aldare.
Ende na hem die twee gesellen,
Daer machmen doget groet af tellen.
Si verwonnen onder hen drien
21470[regelnummer]
Alden tornoi. Ende mettien
Es die tornoy gesceden daer;
Ende men cryerde saen daern aer
Datmen sanderdages soude comen
Ende den tornoy weder begomen.
21475[regelnummer]
Dus scieden si alle vanden velde
In hare herberge met gewelde;
Ende min her Walewein keerde nadat
Met sinen gesellen oec ter stat
In haer herberge haestelike,
21480[regelnummer]
Daer si ontfaen waren eerlike.
Walewein seide te sinen gesellen:
‘Ic soude ons ene dinc tellen,
Die ons wesen soude goet,
Ware dat sake dat gise doet.’
21485[regelnummer]
Si seiden: ‘Here, dat gi begaert
Selewi doen al ongespaert.’
- ‘So doet den raet dat gi gewinnet
Vijftech ridders, die gi nu kinnet
Over die beste min no mere,
21490[regelnummer]
Ende die en hebben genen here,
Ende segt ic sal haer here wesen.’
Dus gingense in di stat na desen
Ende brachten vijftech ridders tien stonden,
Die beste die si vinden conden,
21495[regelnummer]
Die her Walewein wel ontfinc.
Si worden gesellen na die dinc,
Ende seiden dat si tornyren wouden,
Ende sinen scilde volgen souden.
Doe gingen si eten daer ende drinken.
21500[regelnummer]
Walewein dede daer blidelike scinken
Sinen gesellen den goeden wijn.
- ‘Die orsse die hier gewonnen sijn
Gevic ons allen te voren nu.’
Doe was daer vroude, dat secgic u.
21505[regelnummer]
Des ander dages vroech daernaer
Cryerdemen echt ten wapenen daer.
Die coninge quamen beide te velde
Met groter macht, met groter gewelde,
Ende die tornoy ter selver stonde
21510[regelnummer]
In beiden siden aldaer begonde.
Twee hondert ridders van Arragoen
Waren opgeseten na haer doen
Ende wilden den tornoy dorbreken
Ende met speren al dorsteken.
21515[regelnummer]
Des ward her Walewein geware,
Ende seit sinen gesellen daernare:
‘Nu siet wat u donct goet gedaen;
Ic moet gene scare wederstaen
Oft wi vallen in scande daerbi.’
21520[regelnummer]
- ‘Wi volgen u alle,’ seiden si.
Doe sloech hi in met groten gere
Ende opten marscalc vanden here:
Dien reet hi echt vanden orsse
Vor alle diegene in die porsse.
21525[regelnummer]
Doe trac hi tswaerd ende ginc slaen,
Ende sine gesellen volhden hem saeu,
Ende hebbenre hondert daer opt velt
Vanden orssen daer gevelt.
Waleweins gesellen gingen leiden
21530[regelnummer]
Die orsse ende uten anderen sceiden;
Ende daer binnen was so verre
Walewein gereden, dat sijs erre
Dat si hem ontdolen mochten.
21535[regelnummer]
Doe horden si ropen inden dale:
‘Portegale! Ja, Portegale!’
Doe quamen sine gesellen daer,
Daer wonder werd gewracht vorwaer.
Daer bleven die van Portegale
21540[regelnummer]
Bi Waleweine staende wale.
Walewein ende sine gesellen bede,
Daer hier te voren af seide,
Hadden den prijs op dien dach.
Daer was geslegen menech slach
21545[regelnummer]
Eer die andere quamen onder.
Her Walewein wrachte daer wonder:
Hi gincse hier ende ginder driven.
Doe seide daer menech: ‘Nu sal bliven
Die overmoet van Arragone;
21550[regelnummer]
Die te voren waren so cone
Dese riddere heefse gemaet wale.’
Dit seiden die van Portegale.
Die coninc van Portegale wel siet
Wat Waleweine inder plaetsen gesciet,
21555[regelnummer]
Ende oec mede al sinen gesellen,
Hoe sise gingen ter neder vellen.
Die coninc vrachde doe oppenbare
Ofte ieman wiste wie hi ware
Die den prijs hadde allene?
21560[regelnummer]
‘Hi es di beste van allen gemene.
Ay here God van hemelrike,
Hoe scone ende hoe onversaechdelike
Dat hi sijn pongijs heden nam,
Doe hi met cleinen volke quam
21565[regelnummer]
Jegen driehondert Arragone!
| |
| |
Doe sagic wel an sinen done
Dat nieman levet sine gelike.
Ic wille sinde haestelike
Ende doen bidden dat hi te mi come;
21570[regelnummer]
Wi selens ember hebben vrome.’
Nieman was daer dine kinde.
Die coninc sinen marscalc sinde
Daer Walewein hilt met sinen gesellen.
Die marscalc begonste hem tellen
21575[regelnummer]
Die boetscap van sinen here.
- ‘U bid di conine,’ seithi, ‘sere,
Min here, harde vrindelike nu,
Dat gi ende alle die sijn met u
Te sire tenten willet comen.
21580[regelnummer]
Hi wilt u eren ende vromen
In allen dingen daer hi mach,
Want wi nie op genen dach
Beteren ne sagen dan gi sijt,
Noch nie gewapent quam in strijt.’
21585[regelnummer]
- ‘Ay riddere, so ware mi wel gesciet!
Dat wedersecgic, want ens niet.
Ic ben een man van cranker daet.
Gi heren,’ seit hi, ‘wats u raet?
Willewi toten coninc riden?’
21590[regelnummer]
- ‘Jawi,’ seiden si tien tiden.
Doe reet min her Walewein te hant
Daer hi den coninc houdende vant.
Ende doe hi Waleweine werd geware
Quam hi hem jegen oppenbare,
21595[regelnummer]
Ende heften omden hals genomen:
- ‘Gode ende mi sijt willecomen,
Blome van allen ridders ende here!
Nu so biddic u harde sere
Dat gi bliven wilt met mi,
21600[regelnummer]
Ende sekerheide oec doen daerbi
Mi te hulpene in desen tornoy,
Die de coninc nu hevet bracht
21605[regelnummer]
Van Arragoen hier ant velt.
Wi souden hier an sijn getelt
So na hem met stride dagen,
Dat hem ons soude meshagen,
Gelevedewi morgen den dach.’
21610[regelnummer]
Her Walewein seide: ‘Al dat ic mach
U dinen melten live mijn,
Dies mogedi tramer seker sijn,
Sijt in tornoye oft in stride.’
Dies was die coninc harde blide.
21615[regelnummer]
Doe seidi ten marscalc daernare
Dat hi te Waleweine name ware,
Ende hine in di herberge quite,
Ende alle sine gesellen, met vlite.
Van Portegale met enen knape,
Eest dat hine opt velt betrape
Sander dages, hi salne vaen,
Ende sine liede hem al afslaen,
21625[regelnummer]
En si dat hi hem rume tfelt.
Die coninc sprac: ‘Nu ganc ende telt
Dat icken mergen in sijn paulioen
Jagen sal met groten scanden
21630[regelnummer]
Met alden ridders van sinen landen.’
Doe voer di knape wader saen
Ende dede dit sinen here verstaen.
Ende die coninc van Portegale
Ontboet sine ridders altemale
21635[regelnummer]
Ende seide: ‘Gi heren, nu biddic u,
Dat gi mi staet in staden nu,
Want die coninc van Arragoen
Wilt ons margen tonder doen.
Nu salic sien wie mi es vrient.
21640[regelnummer]
Hebbic noit iet groets verdient
Jegen u, dat loent mi daer.
Ende hebbic geweest vrec ende swaer,
Dat willic beteren jegen u,
Ende staens tuwen wille nu.’
21645[regelnummer]
Doe seiden die heren alle daer:
‘Her coninc, en hebt genen vaer;
Wi souden daer alle eer bliven doet
Eer wi u liten in enege noet.
Wi selen ons alle daer omme so pinen,
21650[regelnummer]
Dat opt velt wel sal scinen.’
Dies was die coninc harde vroe;
Ende si sciden daer alsoe.
Maer Walewein moeste bliven daer
Ende sine gesellen, wet vor waer.
21655[regelnummer]
Die coninc bat Waleweine doe sere
Dat hi stode na sine ere.
Ic segt u, dat hi hem beval
Sinen lichgame groet ende smal;
Ende sinen tornoy ende al sine macht
21660[regelnummer]
Setti al in Waleweins cracht,
Ende beide doen ende oec laten.
Walewein sprac: ‘Here, bi karitaten,
Gi hebt so menegen ridder cone,
Settise minen wille te done
21665[regelnummer]
Ende willen si mi mergen volgen dan,
Die de coninc gebringen can
Van Arragoen, bi sente Jan,
Des waric u, blivic gesont.’
21670[regelnummer]
- ‘Gebenedijt so si die mont
Ende therte die tgedachte droech!’
Dit seide die coninc ende loech.
Doe scinctemen daer den goden wijn,
Ende elc ginc doe ter rasten sijn.
21675[regelnummer]
Nu hevet di nacht inde genomen,
Met enen claren sonnescine.
Nu dwinct Waleweine ene pine,
Ene dinc die hem bevolen es;
21680[regelnummer]
Ende die coninc dede nu gewes
Der worde die hi hem behiet
Doe hi sijn here an hem an liet:
Dat sal hi doen, heeft hi geval.
Dat ridderscap es comen al
21685[regelnummer]
Vroech gewapent toten dale.
Gewapent was van Portegale
Die coninc ende op een ors geseten.
Walewein en hadde niet vergeten
Dat hem die coninc selve bat,
21690[regelnummer]
Ende es comen ter wijchstat.
Doe seide Walewein: ‘Verstaet mi, here,
Wat gi sult doen, met uwen here:
Gi selet deilen in viven nu,
Ende die selen varen, dat secgic u,
21695[regelnummer]
Elc stout onder sine banire,
Ende tornyren in dire manire
Oft dwingen woude elke scare
Alle die opten velde waren.
Ende hevet enege scare te quaet,
21700[regelnummer]
Ende sie ic dat si tonder gaet,
Die salic dan met minen gesellen
So bescudden, datmer af tellen
Wonder sal ende oec spreken.
Ic sal onse scaren so verqueken
21705[regelnummer]
Dat wijs bliven selen te boven.’
Dit wilde wel die coninc loven.
Dus heeft di coninc dit bestaen,
Ende dede sine irste scare vord gaen,
Die de andere bestonde so sere,
21710[regelnummer]
Dat sijs te rechte hadden ere.
Si reden toten pauwelione
Daer lach die coninc van Arragone,
Met vijfdusent ridders snel,
21715[regelnummer]
Die de andere wederstonden,
| |
| |
Die hem werden so si best conden.
Daer warre lettel opten velde.
Si braken haer scilde met gewelde.
Die Arragone dadent daer wale.
21720[regelnummer]
Daer liten oec die van Portegale
In des tornoys velde scinen
Hoe si met swerden conden pinen:
Hen ne mochte nieman geliken.
Ten lesten moestesi doch wiken.
21725[regelnummer]
Doe quam die ander battalge geheert,
Alst Walewein hadde geordineert.
Si slogen midden int bedranc:
So starc was daer die toeganc,
Dat elc daer sijn spere brac
21730[regelnummer]
Ende den sinen ter neder stac.
Walewein es mede ingevaren
Ende dorebrac alle die scaren;
Ende al dat quam in sijn gemoet
Dat moeste licgen daer te voet.
21735[regelnummer]
Doe moeste die Arragone vlien.
Ende alse dit die andere sien,
Die daer noch stille hebben gelegen,
Si vijftien hondert quamen daer jegen
Ende hebben die andere achter gedaen.
21740[regelnummer]
En had min her Walewein gedaen
Ende sine gesellen, daer ter stede,
Si waren alle gescoffirt mede.
Si daden crachtelike were
Beide met scilde ende met spere.
21745[regelnummer]
Vor hem lach menech man ter neder.
Doch moesti keren omme weder,
Ende dede die derde scare comen,
Die hevet den Arragone benomen
Dat vordeel dat si hadden te voren.
21750[regelnummer]
Dese scare dede hen groten toren;
Ende her Walewein ende sine gesellen
Gingen daer die ridders vellen.
Ic wane daer lettel ieman was
Die van sire joesten nu genas.
21755[regelnummer]
Dus moesten di Arragone vlien.
Dit heeft haer coninc daer gesien,
Ende scaemdem sere, wetic wale,
Dat hem die van Portegale
Sijn volc aldus achter dede.
21760[regelnummer]
Met sire scaren quam hi gerede
Daer hem in volgeden so vele gesellen,
Dat ict niet en conde getellen.
Hi was erre ende oec gram.
Ende alse dit van Portegale vernam
21765[regelnummer]
Die coninc ende Walewein oec mede
Quamen si jegen hem ter stede
Met groter macht, dat verstaet.
Daer ne was doe geen ander raet
Dan dat manlijc op anderen reet.
21770[regelnummer]
Van beide den coningen, alsict weet,
Deen stac den anderen so onsote,
Daer si quamen te gemote,
Dat haer arsone beide craken
Ende haer speren te sticken braken,
21775[regelnummer]
Ende haer orsse bogen mede.
Doe trocken si die swaerde bede,
Daer si crachtelike met striden.
Doe quamen toe in beiden siden
Derre twee coninge[n] gesellen.
21780[regelnummer]
Nieman en leeft die can vertellen
Hoe vresselike datmen daer stac,
Ende vanden speren dat gecrac.
Daer werd geverwet doe dat gras
Met blode, dat vore grone was.
21785[regelnummer]
Si vochten daer met groten nide
Van beiden siden inden stride.
Daer weerden die van Portegale
Ende haer here die coninc mede,
21790[regelnummer]
Die nu quam ter selver stede,
Ende gemoette van Arragoen
Den coninc wel recht na sijn doen,
Dien met groten nide sloech
Metten swaerde dat hi verdroech
21795[regelnummer]
Opten helm met sire crone,
Dattie coninc, al sonder hone,
Ter eerden moest vallen neder;
Maer hi was scire op weder,
Daer gehulpen vanden sinen,
21800[regelnummer]
Dat hen sere werd te pinen;
Maer si vercoverden soe daer naer,
Dat si daden den coninc vaer,
Ende dat hi in groter sorgen was.
Ende her Walewein mercte wel das,
21805[regelnummer]
Dat hi was in groter pinen,
Ende hi dede blasen die businen,
Ende sprac te sinen gesellen al bloet:
‘Die coninc heeft nu hulpen noet.
Nieman en spare lijf no goet,
21810[regelnummer]
Maer elc doe soe sijn gemoet,
Datmer embermer af spreke.
Nu volcht mi ende siet op minen steke!’
Doe voer Walewein in ter vart
Ende heeft gemaect enen scart
21815[regelnummer]
Inden tornoy, ende sule geloep,
Hi sakere twintech over hoep,
Die alle vielen vanden orsse.
Hi reet in die meeste porsse.
Sine gesellen volhden hem mede.
21820[regelnummer]
Ende alsi sagen wat Walewein dede
Waren si alle vercoent daer bi.
Daer werd te hant een groet geeri
Ende een vresselike gejach.
Daer was geslegen menech slach:
21825[regelnummer]
Daer worden in dese jacht gevelt
Vijfhondert ridders met gewelt
Van Waleweine ende sinen gesellen.
In mochte u dwonder niet vertellen
Dat hi dede te dien tornoye.
21830[regelnummer]
Hi brachte den coninc in vernoye
Van Arragoen te desen tiden.
Men sach nie so vresselijc striden.
Sine gesellen volhden hem nare.
Men werd ane hem wel geware
Daer warre dusent ende mere,
Die vore hem ter eerden lagen.
Alse die Arragone dit sagen
Gingen si vlien, ende met haer here.
21840[regelnummer]
Doe werd daer geropen lude ende sere
Ende geeryert oec inden dale:
Her Walewein sach den coninc vlien
Met sinen volke, ende mettien
21845[regelnummer]
Es hi hem vaste nagevaren,
Ende sine gesellen vol[ch]den hem nare.
Daer moesti dore die porsse riden
Ende oec vreesselike striden.
Daer hi anden coninc quam
21850[regelnummer]
In sinen breidel hine nam,
Ende keerde ombe met gewout.
Dat krieren was menechfout
Ende vanden swerden dat geclanc.
In beiden siden dat bedranc
21855[regelnummer]
Was so groet daer onderlingen,
Dat Walewein in genen dingen
Den coninc en conde gebringen niet
Uten bedrange, wats gesciet.
Doe gaf hine sinen tween gesellen,
21860[regelnummer]
Die menegen riddere consten vellen.
Hi was met groter cracht bestanden.
Walewein nam tswaerd met beiden handen
Ende ginc daer slaen onder hoep.
Daer werd te hans een groet geloep,
21865[regelnummer]
Want al dat hi conde geraken
| |
| |
Moeste daer die doet smaken.
Hi sloech te doet man ende part.
Dus werd dat here soe vervart,
Dat si vloen doe alle sere
21870[regelnummer]
Ende liten daer doen haren here,
Ende wel viertech ridders mede,
Die daer gevaen waren ter stede.
Ende die tornoy sciet int sant,
Want die nacht ginc in hant.
21875[regelnummer]
Ende Walewein brachte van Arragone
Den coninc gevaen ende sine barone,
Die meeste entie rijeste, twaren.
Met hen quam hi ten coninc gevaren
Van Portegale, al daer hi was
21880[regelnummer]
In sine tente, ende seide nadas:
‘Her coninc, ic bringe gevangen u
Van Arragoen den coninc nu
Met viertech sire ridders daertoe.’
Doe was die coninc harde vroe
21885[regelnummer]
Ende seide: ‘Her riddere, bi onsen here,
Gi hebt mi geholpen mire ere:
En haddi geweest, sonder waen,
Ic ware hier nu tachter gegaen.’
Men ontwapende Walewein aldaer
21890[regelnummer]
Ende men ginc eten saen daernaer;
Ende naden etene es men gegaen
In ene camere te rade saen,
Watmen daer nu vort sal doen
Metten coninc van Arragoen.
21895[regelnummer]
Doe seide die coninc van Portegale
Dat ment souden laten altemale,
Vanden coninc die soendinc,
Doe seidi tote Waleweine saen:
21900[regelnummer]
‘Here, dit moet al ane u staen.
Willic dat gi hier met doet.’
Ende die coninc van Arragoen
Die lovede mede oec dit doen.
21905[regelnummer]
Walewein sprac: ‘Gi hebt mi gecoren,
Nu moetti mi beide sekeren te voren
Te doene dat ic sal secgen dan,
Dit werd ginder algader gedaen:
21910[regelnummer]
Si verbonden hen beide saen
Te blivene an Waleweins word.
Doe seide Walewein: ‘So secgic vord:
Dien overmoet die wilen was eer,
Dat gi dien laet vallen embermer,
21915[regelnummer]
Ende gevriende sijt met gestaden sinne;
Soe wat dattie een beginne,
Dat hem di ander sta te staden,
Gaet hem te vromen of te scaden.
Dus willic dat volge di soene.’
21920[regelnummer]
Dit waren si gereet te doene.
Si worden daer gestade vriende,
Ende elc den anderen gerne diende
Die wile si leefden embermere.
Dat was hen beiden vrome ende ere.
21925[regelnummer]
Doe seide Walewein: ‘Metteser dinc
Soe es gemaect die soendinc,
Ende met dat ickere noch secge toe.
Ic bidde u, heren, dat gi alsoe
Beraden werd dor mine bede,
21930[regelnummer]
Dat gi met al uwer macht mede
Te Kardoel vard ende beidet daer
Omtrent Sent Jans dach vorwaer,
Ende mins ontbeit viertien nacht
Met algadere uwer cracht;
21935[regelnummer]
Ic sal daer comen te dien stonden
Ende visenteren die vander tavelronden.
Ic hebbe daer wilen, sonder hale,
Minnen wille gevordert wale.’
Doe vrachden die coninge beide aldare
Hi seide: ‘Minen name mogedi weten:
Walewein so benic geheten.
Die coninc Lot min vader was.
Die coninc Artur, sijt seker das,
21945[regelnummer]
Es min oem, no min no mere.’
- ‘God si geloeft der groter ere,’
Seiden die coninge beide gader,
‘Dat ons Walewein, der aventuren vader,
Versoent heeft alhier ter stede.
21950[regelnummer]
Her Walewein,’ secgen si, ‘uwe bede
Die selewi doen herde gerne;
Ende ons en staets u niet te werne.
Wi selen daer comen met al onser macht
Recht op Sente Jans nacht.
21955[regelnummer]
Walewein dancte doe den heren
Ende nam orlof daer met eren
Ane die coninge daer ter stede,
Ende ane sine gesellen mede
Dies si drove alle waren,
21960[regelnummer]
Dat hi hen dus wilde ontfaren;
Maer het moeste ember wesen.
Te Bertangen waerd reet hi mettesen
Tote bi Kardole, sijt seker das,
Daer een hermite wonende was
21965[regelnummer]
Op enen berch in een wout;
Daer wildi sijn in sijn behout
Bedectelike, wet dat, twaren,
Tot dat si alle vergadert waren
Die hem gelof hadden gedaen.
21970[regelnummer]
Hier latict van Waleweine staen
Ende spreke vanden ridders fijn,
Die daer te comene sculdech sijn.
|
|
Auteursrechtvrij