Leysen-boeck der catholycken daerinne vergadert zyn wt verscheyden boecken veelderhande leysenen himni ende geestelycke liedekens (1605)

Leysen-boeck der catholycken daerinne vergadert zyn wt verscheyden boecken veelderhande leysenen himni ende geestelycke liedekens

(1605)–Anoniem Leysen-boeck der catholijcken– rechtenstatus

Auteursrechtvrij

Vorige Volgende



[pagina 96]
Een geestelijck Refereyn,
op het woort Hec est dies quam fecit Dominus etc. Dit is den dach des Heeren almachtich, Laet ons verblijden ende jubileren in desen Want Christus door zijn Godtheyt crachtich, Als huyden vander doot is verresen. Dit wil ons d’heylige Kercke bewijsen, Singende, Surrexit Dominus den Heere bemint Dat wy een wtersten dage oock sullen verrijsen Tot grooter glorien, dit wel versint, Gelijck Christus in sijn menscheyt, inder waerheyt Is verresen vander lichamelijcke doot, So sullen wy oock verrijsen in groote claerheyt Inden dach des heeren met blijschap groot. Maer eerst moet het lichaem met zijn gebreecken Daer wy dagelijcx mede worden ghequelt Sterven, ende in d’aerde worden ghesteecken, Smaeckende de doot en haer ghewelt. Welcke doot vanden heyligen vercooren Is seer precieus inden oogen des heeren, Maer voor die sondaers die gaen verlooren Is zy afgrijsselick, als ond d’Schriftueren leeren. Het lichaem sal rotten, als een terwen cooren Datmen inder aerden worpt met goeden moet, d’Welck schoonder opstaet dant was te vooren, Tot grooten profijte vanden Lantmen goet. Surrexit Dominus, so sullen alle die Godt beminnen Ende sijn geboden onderhouwen voorwaer, Al tsamen verrijsen, wilt dit versinnen, Gelijck de sonne blinckende claer Is op gaende inden dageraet schoone, Daer deur des menschen herte verblijt, So sullen d’wtvercoorenen hen verthoonen
[pagina 97]
Voor den Rechter stoel des Heeren gebenedijt. Dan sal Christus die Bermhertige Heere Sijn lieve vrienden spreken aen, Met blijden aenschijn sal hy hem keeren Tot die t’zijnder rechter hant sullen staen. Compt gebenedijde mijns vaders verheven Int rijck dwelck ick u hebbe bereyt, Ick hadde honger, ghy hebt my t’eten gegeven En dorst, ghy en hebt my niet ontseyt. Compt ick sal u nu alle gaen leyden, Daer ick u dickmael hebbe voorseyt In mijn glorie, daer suldy u vermeyen, En jubileeren met my inder eewicheyt, Want ghy en hebt u niet laten verdrieten Te wercken inden Wijngaert met grooten arbeyt Als goede wercklieden, suldy den loon genieten Die u van inder eewicheyt is bereyt. Surrexit Dominus wilt ons oock bethoonen, Mijn lieve vrienden seer bemint, Dat Godt die sondaers oock sal loonen, Gelijck zy voor haer sonden hebben verdient Want zy sullen als Bocken stinckende ter slincker hant des Heeren worden gestelt Die hen sal seggen, zijt hier om dinckende Als ghy tot sonden wort ghequelt. Hoe grammen aenschijn de Heere sal thoonen Den hooveerdigen menschen fel ende suyr, Die haer sonden sullen meynen te verschoonen Gaet ghy vermaledyde int helsche vuyr, Dwelck den duyvel bereyt is met dien aenhangen, Daer ghy sult branden inder eewicheyt. Ick heb u dicwils geroepen met verlangen, Tot penitentie heb ick u lange verbeyt, Maer ghy zijt obstinaet ghebleven
[pagina 98]
In v ongeloove ende sonden groot. Daerom moet ghy reeckeninghe geven En v boosheyt betalen met de eewighe doodt. Dan sullen die sondige Bocken die stincken, Ende in haer corruptien zijn verresen, Alle t’samen inder hellen versincken, Daer nemmermeer verlossinge en sal wesen. Surrexit Dominus sal ons oock bewijsen, Singende Alleluya met grooter vreucht, Dat wy heden al geestelijck moeten verrijsen Wte sonden tot de duecht. Want die namaels als costelijcke steenen Inde stadt Godts sullen worden gestelt Moeten hier hare sonden beweenen, Ende met temptatien worden gequelt. Daeromme sullen wy altijt dincken, Als ons eenich lijden of strijt compt aen, Dattet suyver moet zijn dat eewelijck sal blincken Ende in Godts presentie altijt sal staen. En latet ons dan niet verdrieten, Die Corte penitentie diemen nu doet, Want daer voor sullen wy namaels genieten Ende aenschouwen dat opperste goet. Dan sullen die boose menschen ende sonderlinge Die hier van wellusticheyt hebben geraest Seggen met groter verwonderinge, Ende bevende stemme zeer verbaest: Siet hoe dat zy nu worden verheven, Die wy inder werelt hebben gequelt, Wy meynden dat dwaesheyt was hen leven, Ende nu worden zy by de kinderen Gods gestelt. FINIS.

Vorige Volgende