Leysen-boeck der catholycken daerinne vergadert zyn wt verscheyden boecken veelderhande leysenen himni ende geestelycke liedekens


Cant. II. Och Coninginne des Hemels wilt u verblijden, Want alle u tranen sijn nu af gedaen Den Winter van uws Kints bitter lijden Is gepasseert ende voorby ghegaen Die stormen en regenen gheresen Sijn over door sijn doots ghewelt Den Somer is comen, hy is verresen,
[pagina 101]
Die bloemkens staen op onse landen int velt, Daeromme sprack den Bruydegom verheven Tot zijnder Bruyt met stemme soet Compt mijn schoone, ick sal u te smaken geven Die vruchten van mijnder verrijsenisse goet. Compt mijn vrindinne, mijn duyve, Die in de steen gaten hebt ghewoont. Ghy sult nu proeven die soete druyve, In mijn glorie suldy worden ghecroont. O suyver maget, weest ons ghedachtich By uwen soone nu zijnde in alle glorien, Bidt voor ons dat zijn lijden crachtich Niet en scheyde wt onser memorien. Op dat wy in dese benaude tijden Mogen vercrijgen sijn Godtlijcke gratie Dat wy mogen vromelijck strijden Tegen onse vyanden in alle temptatie O heylighe moeder ende maecht gepresen Tuwer eeren heb ick dit ghedicht Inde ure mijns doots wilt dan by my wesen Met uwen gebeden my dan verlicht.