[23]
Malum mortum es .1. ongemac dat men best bekent in die been ende siin swerte puusten in die been hier ende gens ende als mense af trect so siinre vele gaten entie vul etter geven ende waterachtech entie been siin dicke in vele lieden. het comt van melancolien ende tfleesch in die gate es vul swert root ¶ Men sal die materie ripen ende purgieren metten selven daermen melancolie met purgiert. Men sal dit ongemac niet vermaken op mesdage no op gene feeste dage. Ende iegen die ioocte so nemt die middel scorsse van den vliedere ende zietse in olien. dan persset ende werpt die scorsse wech. dan nemt mastic. bayen. wierooc. mirre. dat suldi pulveren ende mingent in die olie. ende wet dat mirre node pulvert. daer omme suldijt leggen in aysine te weyke ¶ Een ander. pulvert wel cleine litargirum ende doeter in olie ende starken aysiin ende wit van spaengien. dits goede zalve. In die werke van scorfden hoofden vint men gnouch bescreven dat goet es te malum mortum Ende hine sal sine voeten niet dwaen. Ende hi moet hem wachten jegen alle spise die quaet es iegen den canker. Ende hi sal oec dicwile doen laten die levere adere entie milte adere.
Auteursrechtelijk beschermd