Den Bybel met groter neersticheyt ghecorrigeert (Liesveltbijbel 1542)

Hoe Noe metten sinen in die arcke ghinck, ende hoe God dat water ouer alle dat aertrijc liet comen

Dat .vij. Capittel

[afbeelding]

[p. *]

1

⁺ENde die HEERE sprack tot Noah, gaet inder arcken, ghi ende alle v huys, want v heb ic rechtueerdich ghesien voor mi in deser tijt,

+ A vers 1

2

van allen suyueren beesten neemt met v seuen ende seuen, dat manneken ende sijn wijfken, ende vanden onsuyueren besten een paer dat manneken ende sijn wijfken,

3

desgelijc vanden vogelen onder den hemel, seuen ende seuen, dat manneken ende sijn wijfken, op dattet saet leuendich bliue op dat heele aertrijc.

4

Want noch na .vij. daghen sal ic laten regenen opter aerden .xl. dagen ende .xl. nachten, ende verderuen al dat wesen heeft, ⁺ vander aerden dat ic gemaect heb

+ B vers 4

5

Ende Noah dedet al dat hem die HERE gheboot. ⁺

+ Matth. xxiiij b.

6

Noah was ses .C. iaer out, doen dwater der diluuien opter aerden quam.

7

Ende hi ginc in darcke met sijn sonen om die wateren der diluuien,

8

Vanden suyueren beesten ende vanden onsuyueren, vanden vogelen, ende van alle ghewormte der aerden

9

ghingen tot hem bi paren inder arcken manneken ende wijfken, so hem die HERE geboden had

10

Ende doen die seuen dagen geleden waren, quam dwater der diluuien opter aerden In desen seshondersten iare des ouderdoms Noah, den .xvij. dage des tweeden maents,

11

dats den dach, doen braken op alle die fonteynen des grooten afgronts ende het deden haer op die vensteren des hemels,

12

ende het quam eenen reegen opter aerden veertich dagen ende veertich nachten

13

Effen inden seluen dage ghinc Noah inder arcken met Sem, ⁺ Ham, ende Iaphet, sinen sonen, ende met sinen wijue, ende met sijnder sonen drie wijuen,

+ C vers 13

14

ooc alderley dier na sijnre aert, alderley beeste na haerder aert, alderley gewormte dat opter aerden cruypt na sijnder aert, ende alderley geuogelte na sijnder aert, al wat vliegen conde, ende al wat voeten hadde,

15

dat ginc tot Noah inder arcken bi paren van allen vleessche, daer een leuendighe gheest in was,

16

ende dat waren mannekens ende wijfkens, van alderley vleessche, ende ghinghen daer in, also God hen gheboden hadde. Ende die HEERE beslootse daer in van buyten.

17

Doen quam die diluuie .xl. daghen lanc opter aerden, ende die wateren wiessen, ende hieuen die arcke op, ende droegense op bouen der aerden,

18

also nam dat water die ouerhant, ende wiesch seer opter aerden, also dat die arcke op dat water dreef

19

Ende twater wert machtich, ende wiesch so seer opter aerden, dat alle hooge bergen onder alle den hemel bedect werden.

20

Vijfthien ellen hooch ghinc dat water ouer die bergen die bedect werden. ⁺

+ D vers 20

21

Doen ghinc alle vleesch onder dat opter aerden cruypt, van vogelen, van beesten, van dieren, ende al wat hem ruert opter aerden, ende alle menschen,

22

ende al wat eenen leuenden adem hadde opt drooghe, dat sterf

23

Also verghinct al wat opter aerden was, ⁺ vanden menschen aen totten beesten toe, ooc dat gewormte, ende die vogelen onder den hemel, dat verghinc al vander aerden, alleen Noah bleef daer ouer, ende watter met hem inder arcken was,

+ sap. x.a

24

ende dat water stont opter aerden hondert ende vijftich dagen.