Den Bybel met groter neersticheyt ghecorrigeert (Liesveltbijbel 1542)

Hoe dat God om der menschen sonden wille die gheheele werelt liet vergaen metten watere, wt ghenomen Noe met hem achte ende van allen dieren een paer, ende hoe hi dye arcke maken soude

Dat .vi. Capittel.

1

⁺ALs hen die menschen begonsten te vermeerderen opter aerden, ende hadden opgheuoet dochteren

+ A vers 1

2

Ende siende die ^a kinderen Gods na den ^b dochteren der menschen, hoe scoon dat si waren, namen si te wiue die welcke si wilden.

a Kinderen Gods, dat sijn de kinderen der geenre die god vreesden ende lief hadden

b Kinderen der menscen dat waren de ghene die van Kaym gecomen waren ge. viij.b ec. xliiij c

3

Doen sprac die HERE, Mijnen gheest en sal niet altijt rechter sijn onder den menscen, want si vleesch sijn, Ic wil hem respijt gheuen .c. ende .xx. iaer

4

Het waren ooc in dien tijden tyrannen opter aerden Want na dien dat die kinderen Gods die dochteren der menscen besliepen, ende kinderen wonnen, werden daer wt geweldige inder werelt, ende vermaerde mannen.

5

Mer doen die HEERE sach, dat der menschen quaetheydt groot was opter aerden, ende alle opset, ende ghedachten haerder herten alleen tot quade waren altijt,

6

so beroudet hem dat hi den mensche ghemaect hadde opter aerden ende tbecommerde hem in zijn herte,

7

ende sprac. Ic wil die menschen die ic gheschapen heb te niete doen vander aerden, ⁺ Vanden menschen aen tot den beesten toe, ende tot den gewormte, ende tot den voghelen onder den hemel, Wandt mi berout dat icse ghemaect heb.

+ B vers 7

8

Mer Noah vant ghenade voor den HERE

9

Dit is Noahs gheboorte, Noah was een recht vroom man, ende sonder veranderinge, ende leyde een godlic leuen tsinen tijden,

10

ende wan drie sonen, Sem, Ham Iaphet,

11

Mer die aerde was besmet voor den ooghen Goods, ende vol quaetheden.

12

Doen sach God opter aerden, ende siet, Si was verdoruen, want alle ^c vleesch had sinen wech bedoruen opter aerden.

c Vlees dat is alle mensce leuende nae sijn welluste ro. viij.a

13

Doen sprac God tot Noah, Dat eynde van allen vleesch is gecomen voor mi, want die aerde is vol van haerder quaetheden, ende siet, ic wilse verderuen met der aerden,

14

Maect v een arcke van Dennen hout ende maeckt cameren daer inne, ende bepectse met peck van binnen ende van buyten, ende maectse aldus

15

⁺Drie hondert ellen sal die lencte sijn .L. ellen dye wijde, ende .xxx. ellen die hoochte.

+ C vers 15

16

Een venster suldy maken bouen int opperste, een elle groot sijnde, Die duere suldy setten midden in haer side, Dat onderste deel suldy twee bi een ende drie bi een maken

17

Want ic sal een diluuie van water laten comen opter aerden, ⁺ om te verderuen alle vleessche, daer een leuende adem in is onder den hemel,

+ D vers 17

18

al watter opter aerden is sal vergaen, mer met v wil ic een verbont stellen, ende ghi sult inder arcken gaen, met uwen sonen, met uwen wijue, ende met uwer sonen wijuen,

19

Ende ghi sult inder arcken doen alderley dier van allen vleessche een paer manneken ende wijfken, dat si leuende blijuen mogen bi v.

20

Vanden vogelen na haerder aert, vanden beesten na sijnder aert, ende van alderley gewormte opter aerden nae sijnder aert. ⁺ Van elcken sal een paer tot v ingaen, op dat si leuende blijuen, Ende ghi sult alderley spijse nemen diemen eet, ende ghi sultse bi v vergaderen dat si v ende hen wesen tot spijsen,

+ Die werelt had ghestaen ij.M.cc.lxxix. iaren ende was voor cristus gheboorte ij.M.viij.c. ende xx. iaer

21

ende Noah dedet al wat hem God gheboot.