Den Bybel met groter neersticheyt ghecorrigeert (Liesveltbijbel 1542)

Hoe dat Lot geuangen wort, ende Abraham hem verlost, ende Melchisedech broot ende wijn bracht Abrahame, ende seegende den seluen.

Dat .xiiij. Capittel.

1

⁺IN dien tijde geschiede dat die coninc Amraphel van Sinear, Arioch die Coninc van Ellazar, Kedorlaomor conink van Elan, ende Thideal coninc der Heidenen,

+ A vers 1

2

dat si streden met Bera den coninc van Sodoma, ende met Birsa den coninck van Gomorra, ende met Sineab den coninc van Adama, ende met Senebir den coninc van Zeboim, ende met den coninck van Bela die Zoar heet, ⁺

+ Bela is die stadt daer Loth in vloodt met beyde sijne dochteren

3

Dese quamen al te samen in dat breede dal, daer nv die ^b soute zee is,

b Soute zee, dat is die dode zee, daer Sodoma gestaen heuet

4

want si waren xij. iaer onder den coninck Kedorlaomor gheweest, ende inden .xiij. iaer waren si hem af geuallen

5

Daerom quam Kedorlaomor, ende die coningen die met hem waren, inden .xiiij. iaer, ende sloegen die Ruesen te Astarot, Karnaim ende Sufin, te Haim, ende die Emin inden velden Kiriathaim,

6

ende die Horiten op haren gheberchte Seir, tot aen dat breet velt Pharan welc aen die woestijne stont.

7

Daer na keerden si wederom, ende quamen aen des gherechts fonteyn, dat is Kades, ende sloegen dat heele lant der Amalekiten, ooc die Amoriten, die te HazezonThamar woonden.

8

Doen trocken wt die coninghen van Sodoma ende Gomorra, van Adama van Zeboim, ende die Coninck Bela, die Zoar hiet, ende si stelden hen ten strijde, int breede dal

9

tegen Kedorlaomor den coninc van Elan ende tegen Thideal den coninc der Heydenen, ende Amraphel den coninc van Sinear, ende Arioth den coninck van Ellazar, vier coninghen tegen vijf, ende dat breede dal had veel lijm grachten

10

Mer die coninc van Sodoma ende van Gomorra werden daer gheslaghen int vluchten ende neder geleyt ende watter ouer bleef, dat vloot op dat gheberchte.

11

Doen namen si alle die haue te Sodoma ende te Gomorra,

12

ende al dat der spijsen toebehoort, ende trocken van daer, ende si namen ooc met hen Lot Abrahams broeders sone, ende sijn goet, want hi woonde te Sodoma, ⁺ ende si trocken van daer.

+ C vers 12

13

Doen quam daer een die ontloopen was, ende seyde Abram den buyten manne, die daer woonde in dat dal Mamre, der Amoriten, die welc een broeder Escol ende Aner was, dese waren met Abram in een verbont.

14

Als nv Abram hoorde dat sijn broeder geuangen was, wapende hi sijn eygen knechten drie hondert ende xviij. in sinen huyse geboren, ende iaechde haer na tot Dan,

15

ende deylde hem, ende viel tsnachts op hen met sinen knechten, ende sloechse ende iaechdese tot Hoba, die ter slincker siden der stadt Damascos leyt,

16

ende bracht al die haue weder, daer toe ooc Lot sinen broeder met sijnder hauen, ⁺ ooc die wijuen ende dat volc

+ D vers 16

17

Als hi weder quam vanden slage des Kedorlaomor ende der coningen die met hem waren, ginc hem teghen die coninc van Sodoma in dat velt dat tsconincx dal hiete.

18

Mer ^c Melchizedech die coninc van Salem, bracht broot ende wijn voort, Ende hi was een priester Gods, des alderhoochsten.

c Melchisedech, soo sommige meynen, was Sem die sone van Noe ende was doen .cccc. iaer out. He. vij.a

19

Ende gebenedide hem ende sprac Abram sijt gebenedijt den alderhoochsten God, die hemel ende aerde besidt,

20

ende ghelooft si God dye alderhoochste, die v vianden in v hant besloten heeft,

21

Ende dien gaf Abram die thiende van al den buete

22

Doen sprac die coninc van Sodoma tot Abram, gheeft mi die sielen, die haue behout di.

23

Mer Abram sprac tot den coninc van Sodoma, Ic hefse op mijn handen tot den HERE den alderhoochsten God, die hemel ende aerde besit

24

dat ic van alle dat v is niet eenen draet noch eenen scoenriem nemen en sal, dat ghi niet en segt, ghi hebt Abram rijc gemaect,

25

wtgenomen, dat die iongers verteert hebben, ende die mannen Aner, Escol ende mamre, die met mi getogen sijn, laet die haer deel nemen.