Den Bybel met groter neersticheyt ghecorrigeert (Liesveltbijbel 1542)

Hoe dat Agar beurucht wort van Abraham, ende baerde Ismael, Ende hoe Agar vliede van Sara haerder vrouwe, ende die Enghel haer vertrooste

Dat .xvi. Capiirtel

[afbeelding]

1

⁺SArai Abrams wijf en had hem gheene kinderen ghewonnen, maer si had een ioncwijf wt Egypten dye hiet Hagar,

+ A vers 1

2

ende seyde tot Abram, siet de HERE heeft my besloten dat ic niet gebaren en can, legt v bi mijn ioncwijf, oft ic misschien wt haer mocht kinderen vercrijghen, meer dan wt mi,

3

Abraham verhoorde die stemme Sarai.

Doen nam Sarai Abrams wijf haer Egypsche ioncwijf Agar, ende ghafse Abram haren man te wijue, na dien si dat .x. iaer int lant Canaan ghewoont hadde.

4

Ende hi ginc in tot Hagar, ende si ontfinc ende als si sach dat si ontfangen had, achte si te min op haer vrouwe,

5

Doen seyde Sarai tot Abram, Ick moet onrechte lijden om uwen wille, Ick heb mijn ionckwijf bi v gheleydt, Maer nv si siet dat si ontfanghen heeft, moet ic veracht worden van haer die HEERE si een rechter tusschen mi ende v,

6

Abram sprack tot Sarai, Siet uwe maecht is onder v gheweldt, doet met haer alsoot v ghelieft.

Doense nv Sarai woude verootmoedigen, vloot si van haer,

7

Mer die Engel des HEREN, vantse bi eender waterfonteynen, inder woestinen, te weten bider fonteynen aenden weghe tot Sur,

8

ende die sprack tot haer, Hagar Sara ioncwijf van waer coemdi? ende waer wildi henen? Si sprac, Ic ben van mijnder vrouwen Sarai geuloden,

9

Ende die Enghel des HEREN sprac tot haer, Keert wederom tot uwer vrouwen ende verootmoedicht v onder haer handen

10

Ende die Enghel des HEREN sprack tot haer, Siet ic sal uwe saet vermeerderen, dattet van groote menichten niet getelt en sal mogen worden. Noch seide die Engel des HEEREN tot haer,

11

Siet ghi hebt ontfangen ende ghi sult baren eenen sone, sinen naem suldy Ismael heeten, om dat die HERE uwe mismaectheyt verhoort heeft,

12

Hi sal een wilt mensce sijn, Sijn hant tege eenen yegelijcken, ende eens yegelicx hant tegen hem, ende sal tegen alle sijne broeders woonen

13

Ende si hiet den naem des HEEREN die met haer sprac. Ghi god die mi siet, Want si seide, warachttich hier heb ic den rugge gesien, van dien die mi sach,

14

daerom hiet si die fonteyne, Een fonteyn des leuenden die mi sach, die daer is tusschen Kades ende Bared,

15

ende Hagar baerde Abram eenen sone, Ende Abram hiet den sone die hem Hagar baerde Ismahel,

16

ende Abram was lxxxvi. iaer out, doe hem Agar Ismael baerde.