Den Bybel met groter neersticheyt ghecorrigeert (Liesveltbijbel 1542)

¶ Hoe dat Abraham buyten den lande reysde, ende Abimelech coninc van Gerar Abrahams huysurouwe nam ende hem God daerom sloech

Dat .xx. Capittel.

1

⁺ABraham tooch van daer in dat zuyden lant ende woonde tusschen Cades ende Sur, ende wert een vreemdelinc te Gerar,

+ A vers 1

2

ende seyde van sinen wijue Sara, Het is mijne suster, doen sandt na haer Abimelech, die coninc was te Gerar, ende lietse halen.

3

Mer God quam tot Abimelech des nachts inden droom ende sprac tot hem, Siet, ghi sijt der doot schuldich om des wijfs wille, die ghi genomen hebt, want si is eens mans getrout wijf,

4

Maer Abimelech en hadse noch niet aengetast, ende seyde HERE wildi dan ooc een gerechtich volc dooden,

5

Heeft hi niet tot my geseyt, si is mijn suster, ende si heeft ooc geseyt hi is mijn broeder. Ic hebbe doch dat gedaen met simpelder herten ende onsculdigen handen,

6

⁺Ende God sprac tot hem inden droom Ic weet ooc dat ghijt met simpelder herten gedaen hebt. daeromme heb ic v ooc bewaert dat ghy niedt gesondicht en hebt tegen mi, ende ic en hebs v niet toe gelaten dat ghijse aengetast hadt,

+ B vers 6

7

So geeft nv den man sijn wijf weder want hi is een propheet, ende laet hem voor v bidden, also suldy leuendich blijuen, Mer waer ghijse hem niet weder en gheeft, so weet dat ghi die doot sult moeten steruen ende al dat uwe is.

8

Doen stont Abimelech vroech op des morgens ende riep alle sijn knechten, ende seyde hen allen dit voor haren ooren, ende die lieden vreesden seer,

9

ende Abimelech riep Abraham ooc ende seyde hem, Waerom hebdi ons dat gedaen? ende wat heb ic v misdaen? dat ghi alsulcken grooten sonden wildet brenghen op mi ende minen rijcke ghi hebt met ons gheleeft niet alsomen soude,

10

Ende voort noch seyde Abimelech tot Abraam, wat saechde ghi aen, dat ghi dit gedaen hebt.

11

⁺Abraham antwoorde, Ic dachte misschien in dese plaetse en is gheen vreese Gods, ende sullen mi om mijns wijfs wille dooden,

+ C vers 11

12

Ooc is si warachtich mijn suster want si is mijns vaders dochter mer niet mijnder moeder dochter, ende het is mijn wijf geworden,

13

doen mi god wt mijns vaders huys hiet wandelen, seide ic tot haer, dye barmherticheyt doet aen mi, dat waer wy comen, suldy van mi segghen dat ic v broeder ben.

14

Dus nam Abimelech scapen, runderen, knechten ende maechden, ende gafse Abraham, ende gaf hem weder sijn wijf Sara, ende seyde,

15

Siet mijn lant staet open, woonter waert v belieft,

16

ende seyde tot Sara, Siet daer, ic heb uwen broeder duysent silueren pennigen gegeuen, Siet die sal v een decksel der ooghen sijn, voor alle die bi v sijn, ende ouer al, ende een verantwoorder.

17

Mer Abraham badt tot God, doen ghenas God Abimelech ende sijn wijf, ende sijn maechden, dat si kinderen baerden,

18

Want die HERE hadde te voren vaste ghesloten alle dye moeders des huys Abimelechs om Sara abrahams wijfs wille.