Den Bybel met groter neersticheyt ghecorrigeert (Liesveltbijbel 1542)

Iacob trect sinen broeder Esau met sinen volcke teghen, Sy spreken minlijcken met malcanderen, ende wordens eens, Esau belooft veel duechden sinen broeder, Iacob coemt tot Sochot, ende Salem, Ende daer woont hi.

Dat .xxxiij. Capictel

1

⁺IAcob hief sijn oogen op, ende sach sinen broeder Esau comen met vierhondert mannen, ende deylde sine kinderen tot Lea ende tot Rahel, ende tot beyden ioncwiuen,

+ A vers 1

2

ende stelde die ioncwijuen met haren kinderen voor, ende Lea met haren kinderen daer nae, ende Rahel met Ioseph ten laetsten,

3

ende ginc voor haer henen, ende neech hem seuenmael ter aerden, tot dat hi bi sinen broeder quam.

4

Esau liep hem te gemoete, ende omhelsde hem, vallende om den hals, custe hi hem, ende weende,

5

ende hief sijn oogen op, ende sach die vrouwen met den kinderen, ende seyde, wie sijn dese die bi v sijn? ⁺ Hi antwoorde, het zijn die kinderen die God uwen knecht verleent heeft,

+ B vers 5

6

ende die ioncwijfs quamen daer bi met haren kinderen, ende negen voor hem,

7

Lea quam ooc daer toe met haren kinderen, ende neech voor hem, daer na quam Ioseph ende Rahel daer bi, ende neghen voor hem.

8

Ende Esau seyde, wat wildy met alle den heyre, dat mi te ghemoet comen is? Iacob antwoorde, dat ick ghenade vinde voor mijnen heere.

9

Esau sprac, Ic hebbe genoech mijn broeder, behout dat ghi hebt.

10

Iacob antwoorde, Och neen, heb ick ghenade vonden voor v, so neemt mijn gifte van mijnder hant, Want ic sach v aensicht, als oft ic sage Gods aensicht, ende nemet in dancke van mi,

11

Ontfanct die gifte, die ic v gebracht hebbe, want God heeft mi verleent, ende ick hebbe al genoech. Also dwonc hi hem, dat hijt ontfinck.

12

⁺Ende Esau sprack, laet ons voort trecken, ende reysen, ende wil beneuen v reysen.

+ C vers 12

13

Iacob antwoorde hem, Mijn here ghi weet, dat ic teere kinderen bi mi hebbe, ooc cleyn ende groot vee, dat noch ionc is, werden si eenen dach ouerdreuen, dan soude my alle die gantse cudde af steruen.

14

Mijn here gae voor sinen knecht, Ic sal allenskens volgen, daer na dat vee, ende die kinderen gaen connen, tot dat ic come tot mijnen heere te Seyr.

15

Esau antwoorde, so wil ic doch bi v laten sommighen van mijnen volcke, dat by mi is, ⁺ Hi antwoorde, wat is dat van node, laet mi slechts genade voor minen heere vinden,

+ D vers 15

16

Alsoe troc Esau dien dage wederomme sinen wech tot Seyr,

17

ende Iacob troc tot Sucoth, ende timmerde hem een huys, ende maecte sinen vee wooningen, daer af heet die stede Sucoth.

18

Daer na quam Iacob te Salem totter stadt Sichem, dye int lant Canaan leyt, nae dyen dat hi wt Mesopotanien gecomen was, ende maecte sinen leegere voor die stadt,

19

ende cocht een stuc lants vanden kinderen Hemor, des vaders Sichem, om hondert penninghen.

20

Aldaer stelde hy sijn wooninge, ende stelde aldaer eenen outaer, ende aenriep den naem des stercsten Gods Israel.